Azanǵı saat 10:00 de baslanǵan qabıllaw túngi saat 03:00 ge shekem yaǵnıy, 17 saat dawam etti. Búgin Qońırat rayonındaǵı Xanjan MPJ aymaǵındaǵı Medicina texnikumı imaratında Qońırat, Moynaq, Qanlıkól hám Shomanay rayonları puqaraları ushın Qaraqalpaqstan Respublikası Joqarǵı Keńesiniń Baslıǵı Amanbay Orınbaevtıń jeke qabıllawı bolıp ótti.

Bolıp ótken qabıllawda puqaralardıń múrájatları tıńlanıp, ornında sheshimin tabıw ilajları kórildi. Atap ótiw orınlı, ótken 2022-jıldan Joqarǵı Keńes Baslıǵınıń jeke qabıllawı shólkemlestirilip, puqaralardı qıynap kiyatırǵan, olardıń sociallıq turmısında ushırasıp atırǵan mashqalalar, sonday-aq, bántlik, isbilermenlik, járdem kórsetiw hám basqa da máselelerge sheshim tabıw boyınsha barlıq taraw basshıları menen birgelikte orınlarda bolıp, xalqımızdıń táshwish hám mútájlikleri úyrenilgen edi. Sonıń menen birge, barlıq orınlarda puqaralardıń kewil-keypiyatına tásir etiwshi baslı mashqalalarǵa sheshim tabıw, «Mehir háreketi» sheńberinde járdemge mútáj xojalıqlardıń qıstan biyziyan shıǵıwın támiyinlew, úy-jayın ońlawǵa zárúrligi bolsa da imkaniyatı jetpey atırǵan shańaraqlardıń turaq-jayların ońlap beriw sıyaqlı bir qatar iygilikli isler búgingi kúnde de dawam ettirilmekte. Qabıllawda tiykarınan puqaralardı qıynap kiyatırǵan mashqalalar qatarında sociallıq qollap-quwatlaw, bántligin támiyinlew, járdemge mútáj xojalıqlarǵa járdem kórsetiw, qurılıs, kommunallıq mashqalalar boyınsha múrájatlar bildirildi.

Máselen, Qońırat rayonı Qırıq qız APJ turǵını Q.Ótegenov 1000 xojalıqqa shamalas awılı internet tarmaǵına jalǵanbaǵanlıǵı boyınsha bildirgen múrájatı ornında sheshimin tawıp, usı jılı xojalıqlardıń barlıǵına tolıq internet tarmaǵı tartılıwı belgilep alındı. Moynaqlı R.Ayapovanıń múrájatı boyınsha materiallıq járdem berilip, rayonlıq medicina birlespesine jumısqa ornalastırıldı. P.Nıǵmetovtıń múrájatı da ornında sheshimin taptı hám Moynaq rayonı Qızıljar APJ hám Áliy awılın baylanıstırıwshı joldı ońlaw boyınsha jumıslar baslap jiberildi. Sonday-aq, Tashkent qalasında neft-gaz jónelisi boyınsha oqıp, derlik 4 jıldan berli qániygeligi boyınsha jumısqa ornalasa almay atırǵan B.Nurmanovtıń da múrájatı ornında sheshimin taptı hám Ústirt gaz qazıp shıǵarıw basqarmasına jumısqa ornalastırıldı. A.Nawrızbaevanıń múrajatı boyınsha kontrakt pulları tólep beriletuǵın boldı. Shomanay rayon turǵını S.Allanazarov shańaraqlıq baqsha shólkemlestirgeni biraq, onı ashıw ushın tolıq imkaniyatı jetpey atırǵanlıǵı boyınsha bildirgen múrájatı da unamlı sheshimin taptı hám óz jumısın jolǵa qoyıw ushın 1 hápte múddette kredit qarjıları ajıratılıp, nátiyjede 14 jańa jumıs ornı ashılatuǵın boldı. Bıyıl Mamıy APJ turǵını B.Embergenovtıń shańaraǵında músiybet bolıp, úyi janıp ketken edi hám bul boyınsha Joqarǵı Keńes Baslıǵına múrájat etti. Bul múrájat ta unamlı sheshilip, Ózbekstan Respublikası Ministrler Kabinetiniń 2023-jıl 2-fevraldaǵı 52-sanlı «Qaraqalpaqstan Respublikasında puqaralar ushın múnásip turmıs sharayatın jaratıw hám máhálleler infrastrukturasın ele de jaqsılaw is-ilajları haqqında»ǵı qararı boyınsha úyi jańadan qurıp beriletuǵın boldı. Qanlıkól rayonınan baǵıwshısınan ayırılǵan, úy-jayǵa mútájligi bar U.Xalmuratova rayon orayınan sociallıq úyge jaylastıralatuǵın boldı. G.Ermanova bolsa, jańadan qurıp pitkerilgen baqshaǵa jumısqa jaylastırılıp, bántligi támiyinlendi.

Qabıllawda bunnan basqada kópshilik puqaralardıń bántligi támiyinlenip, student jaslardıń kontrakt pulları tólep berildi hám múrájatlar tiykarında mashqalalar sheshim taptı. Ulıwmalastırıp aytqanda, búgingi qabıllawda 700 ge shamalas múrájat kelip tústi hám onıń basım kópshiligi yaǵnıy 55 payızı ornında unamlı sheshimin taptı. Waqıt talap etiletuǵın múrájatlar Qaraqalpaqstan Respublikası Joqarǵı Keńesi Baslıǵınıń jeke qadaǵalawına alınıp, tez pursatta unamlı sheshiw boyınsha tiyisli taraw basshılarına tapsırmalar berildi.

Qaraqalpaqstan Respublikası Joqarǵı Keńesiniń Málimleme xızmeti