Joqarǵı Keńes Baslıǵı bayram qarsańında qońıratlı 10 hayal-qızǵa jańa turaq-jaylardıń giltin tapsırdı

Sońǵı jılları elimizde Húrmetli Prezidentimizdiń basshılıǵında hayal-qızlardı hár tárepleme qollap-quwatlawǵa, olardıń mashqalaların úyreniw hám unamlı sheshiwge, bántligin támiyinlewge, sociallıq-siyasiy belsendiligin arttırıwǵa ayrıqsha itibar qaratılıp, bul baǵdarda keń kólemli iygilikli isler ámelge asırılmaqta. Sonday-aq, awır turmıs sharayatına túsip qalǵan, kem támiyinlengen hám turaq-jayǵa mútáj hayal-qızlardı qollap-quwatlaw ilajları da jańa basqıshlarǵa kóterilip barmaqta. Usınday iygilikli jumıslar respublikamız aymaǵında da keń túrde dawam ettirilip atır. Búgin Qaraqalpaqstan Respublikası Joqarǵı Keńesiniń Baslıǵı Amanbay Orınbaev Qońırat rayonındaǵı sociallıq járdemge mútaj 10 hayal-qızǵa jańa turaq-jaylardıń giltin tapsırdı.

  Aytıp ótiw orınlı, húrmetli Prezidentimizdiń arnawlı qararına muwapıq «Hayallar dápteri», «Jaslar dápteri» hám «Temir dápter»ge kirgizilgen hayal-qızlardı turaq-jay menen támiyinlew maqsetinde rayon aymaǵınan jámi 1 mlrd. 664 mln. swmlıq 10 turaq-jay satıp alındı. Zamanagóy etip qurıp pitkerilgen bul turaq-jaylarda barlıq qolaylı sharayatlar jaratılǵan bolıp, óz náwbetinde jańa úylerdiń iyeleriniń kózinde húrmetli Prezidentimiz basshılıǵında búgingi kúnde ámelge asırılıp atırǵan reformalardan minnetdarshılıq sezimi kórinedi. Joqarǵı Keńes Baslıǵı hayal-qızlardı kirip kiyatırǵan bayram múnásibeti menen qızǵın qutlıqlap, jańa imarat olardıń jaqsı kúninde xızmet etiwin tiledi.

 

Qaraqalpaqstan Respublikası Joqarǵı Keńesiniń Málimleme xızmeti