Joqarǵı Keńes Baslıǵı Bostan kanalınıń shıǵıs bóleginiń ashılıw máresiminde qatnastı
1496
Qaraqalpaqstan Respublikası Joqarǵı Keńesiniń Baslıǵı Amanbay Orınbaev Jáhán banki qatnasıwındaǵı “Qubla Qaraqalpaqstanda suw resursların basqarıwdı jaqsılaw” joybarı sheńberindegi Bostan kanalınıń shıǵıs bóleginiń ashılıw máresiminde qatnastı.
Ótkerilgen ilajda Joqarǵı Keńes Baslıǵı respublikamızdıń qubla rayonların aǵın suw menen támiyinlewde kanalda alıp barılǵan rekonstrukciya jumıslarınıń áhmiyeti, egislik maydanlarınıń suw menen támiyinleniwiniń jaqsılanǵanı, búgingi kúnge kelip eń alıs aymaqlarǵa shekem suw jetkerilip beriliwi támiyinlengeni boyınsha atap ótti.
Ilajda respublikamızdıń qubla rayonları hákimleri, awıl hám suw xojalıǵı tarawı wákilleri, nuranıylar hám basqa da taraw xızmetkerleri qatnastı.
Aytıp ótiw orınlı, sonǵı jılları húrmetli Prezidentimizdiń baslaması hám Qaraqalpaqstan Respublikasına aǵın suw jetkerip beriliwin jaqsılawǵa qaratılǵan itibarı nátiyjesinde bir qatar unamlı jumıslar ámelge asırıldı.
Usı tiykarda Jáhán banki qatnasıwında “Qubla Qaraqalpaqstanda suw resursların basqarıwdı jaqsılaw” joybarı ámelge asırılıp atırǵan bolıp, búgingi kúnde juwmaqlanıw basqıshındaǵı qurılıs jumısları alıp barılıp atır.
Joybar sheńberinde 614,5 km uzınlıqtaǵı magistral hám xojalıqlararalıq kanallar hám 1470 gidrotexnikalıq obektler qayta tiklenedi, 16 mıń ga suwǵarılatuǵın maydanlar lazer járdeminde tegislenedi hámde tereń jumsartıladı, 33,4 km uzınlıqtaǵı jańa kanal hámde 91 dana gidrotexnikalıq obektler qurılıwı belgilenip, búgingi kúnde bul jumıslar jedel pátte dawam ettirilmekte.
Usı ilajlar ámelge asırılıwı nátiyjesinde Qaraqalpaqstan Respublikasınıń Ellikqala (33,2 mıń ga), Beruniy (34 mıń ga) hám Tórtkúl (32,8 mıń ga) rayonlarınıń 100 mıń gektar suwǵarılatuǵın jerlerinde suw resursları basqarılıwı jaqsılanadı hám jılına 269 mln. m3 suw únemlep qalınadı.
Ámiwdáryadan suw kóterip berip atırǵan “Beruniy nasos stanciyaları” basqarması balansındaǵı 3 iri Doslıq 16,2 m3/sek, Qilchinaq 26,4 m3/sek hám Nayman-Bestam 22 m3/sek, 20 úlken hám kishi nasos stanciyaları toqtatıladı, qosımsha SIU hám fermer xojalıqları esabındaǵı 402 den artıq nasos agregatları toqtatıladı hám nátiyjede jılına 6,9 mln. dollar muǵdarındaǵı elektroenergiya hám paydalanıw shıǵınları tejep qalınadı.
Ámelge asırılǵan jumıslar nátiyjesinde jámi 610 km tiykarǵı hám xojalıqlararalıq suwǵarıw kanalları qayta tiklendi, 29,5 km uzınlıqta jańa kanallar hámde jańadan 932 gidrotexnikalıq obektler qurıldı, 15,44 mıń ga suwǵarılatuǵın maydanlar lazer járdeminde tegislendi hámde tereń jumsartıldı.
Kanal tolıq iske túskennen soń 100 mıń gektarlıq egislik maydanların suwǵarıw imkaniyatı jaratıladı. Aldın Túyemoyın suw saqlaǵıshınan egislik maydanlarǵa shekem suw jetip baraman degenshi 48 procent suw joǵaltılatuǵın edi, yaǵnıy suwdıń paydalılıq koefficienti 52 procentti quraytuǵın edi. Rekonstrukciya jumısları juwmaqlanǵannan soń kóbi menen joǵaltılatuǵın suw muǵdarı 15 procentke shekem azayıp, egislik maydanlarına suw jetip barıwı 85 procentke shekem kóbeyedi. Bul óz gezeginde diyqanshılıq penen shuǵıllanıwshı, qıytaq jer iyeleri, fermer hám klasterler ushın ekonomikalıq jaqtan salmaqlı payda keltiredi.
Aytıp ótiw orınlı, suw jetkerip beriliwin támiyinlew baǵdarında húrmetli Prezidentimiz baslaması menen alıp barılıp atırǵan jumıslardıń nátiyjesinde Qaraqalpaqstandaǵı suwǵarılatuǵın awıl xojalıǵı egislik maydanlarına, puqaralardıń úy aldı qıytaq jerlerine suw jetip barıwı jaqsılanbaqta. Bıyılǵı jılda Túyemoyın suw saqlaǵıshında jıynalǵan suw muǵdarınıń kóbeyiwi, eń alıs shetki aymaqlarǵa shekem aǵın suwdıń jetip barıwı, kanal hám arnalarda suwdıń mol aǵıp turǵanı bunıń ayqın mısalı esaplanadı.
Ulıwma aytqanda, búgingi kúnde húrmetli Prezidentimizdiń Qaraqalpaqstanǵa ayrıqsha itibarı nátiyjesinde tirishilik deregi bolǵan suw mol bolıp, aǵın suw jetip barıwı mashqala bolǵan aymaqlar suw menen támiyinlenbekte.
Qaraqalpaqstan Respublikası Joqarǵı Keńesiniń Málimleme xızmeti