Jigitler áskeriy xızmetke, Watandı qorǵawǵa atlandı
2628
Búgin Nókis qalasınıń orayındaǵı Ózbekstan hám Qaraqalpaqstan Respublikalarınıń mámleketlik bayraqları jaylasqan maydanda múddetli áskeriy xızmetke shaqırılıwshılardı shıǵarıp salıw hám «Watan tayanıshı» háreketiniń aǵzalarına arnawlı kókirek belgisi hám gúwalıqlardı tapsırıwǵa arnalǵan saltanatlı ilaj bolıp ótti.
Ilajda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, bir qatar jaslardıń múddetli áskeriy xızmetti ótewge múnásip dep tabılıp, ana Watan aldındaǵı perzentlik parızın ótew ushın ketip baratırǵanı hám «Watan tayanıshı» háreketiniń aǵzalarına arnawlı kókirek belgisi hám gúwalıqlardıń tapsırılıwı múnásibeti menen qutlıqladı.
Onda mámleketlik hám jámiyetlik shólkemler wákilleri, Watanımızdıń márt qorǵawshılarınıń ata-anaları, ǵalaba xabar quralları wákilleri hám jaslar qatnastı.
Aytıp ótiw orınlı, sońǵı jılları Húrmetli Prezidentimiz – Qurallı Kúshlerimiz Joqarı Bas Sárkardası tárepinen elimizdiń qorǵanıw potencialın kúsheytiw, Qurallı Kúshlerimizdi bekkemlew, áskerlerdi hár tárepleme qollap-quwatlaw hám basqa da usı baǵdardaǵı máselelerge úlken itibar qaratılmaqta.
Usınday kólemli ilajlar nátiyjesinde Milliy armiyamız xalqımızdı isenimli qorǵaw menen birge, jas áwladtı mártlik, Watanǵa muhabbat hám sadıqlıq sezimleri menen tárbiyalaytuǵın turmıs mektebine aylanıp, onda hár tárepleme salamat jaslar kamalǵa kelmekte.
Húrmetli Prezidentimizdiń 2022-jıl 2-marttaǵı arnawlı qararına muwapıq shólkemlestirilgen «Watan tayanıshı» balalar hám jas óspirimler háreketi de jaslardı watansúyiwshilik ruwxında tárbiyalawda áhmiyetli orın tutpaqta.
Búgingi kúnde Qaraqalpaqstanda jámi 10 mıń 714 jaslardan ibarat 693 “Watan tayanıshı” otryadları dúzilgen.
Ótkerilgen ilajda Nókis qalası hám Nókis rayonındaǵı eń belsendi bolǵan tórt “Watan tayanıshı” otryadı aǵzalarına arnawlı kókirek belgisi hám gúwalıqlar saltanatlı túrde tapsırıldı hám áskeriy orkestor namaları astında Watandı qorǵawǵa atlanǵan jaslarǵa aq jol tilenip, mártler qatarına shıǵarıp salındı.
Ilaj sońında mádeniyat tarawı xızmetkerleri tárepinen tayarlanǵan koncert baǵdarlaması jıynalǵanlar názerine usınıldı.
Qaraqalpaqstan Respublikası Joqarǵı Keńesiniń Málimleme xızmeti