Bozatawda jańa sanatoriyanıń irge tası qoyıldı

Húrmetli Prezidentimizdiń baslaması menen Bozataw rayonı jańadan shólkemlestirilip, rayon xalqınıń abadan turmısın támiyinlew, eń baslısı xalqımızdıń salamatlıǵın bekkemlew baǵdarında kóp ǵana jumıslar ámelge asırıldı. Bunıń nátiyjesinde Bozataw rayonı gúllep-jasnap, búgingi kúnde ózgeshe túske endi, xalıqtıń turmıs abadanlıǵı jańa basqıshqa kóterildi. Atap ótiw orınlı, Mámleketimiz basshısınıń Qaraqalpaqstan Respublikasına bolǵan saparı dawamında berilgen tapsırmasına muwapıq Ózbekstan kásiplik awqamları Federaciyası tárepinen Bozataw rayonında sanatoriya qurıw boyınsha wazıypa belgilep alınǵan edi.

Usı tiykardaǵı jumıslardıń orınlanıwın támiyinlew baǵdarında búgin Qaraqalpaqstan Respublikası Joqarǵı Keńesiniń Baslıǵı Amanbay Orınbaev hám Ózbekstan Respublikası kásiplik awqamları Federaciyası Keńesi Baslıǵınıń orınbasarı Qobiljon Qirǵizaliev Bozataw rayonı «Erkindárya» awıl puqaralar jıyını aymaǵında jańa sanatoriyanıń saltanatlı irge tasın qoyıw máresimine qatnastı. Ózbekstan kásiplik awqamları Federaciyası tárepinen qarjılandırılıp, qurılısı baslanıp atırǵan joybardıń bahası 123 mlrd. sum bolıp, sanatoriya 200 adamǵa mólsherlengen.

  Altı etajlı záwlim imarattıń qurılıs jumısları juwmaqlanǵannan soń 120 jańa jumıs ornı jaratılıp, puqaralardıń bántligi támiyinlenedi hám xalqımızdıń salamatlıǵın tiklew hám bekkemlew boyınsha nátiyjeli jumıslar jolǵa qoyıladı. Álbette, búgin elimizde Prezidentimizdiń baslaması menen ámelge asırılıp atırǵan túpkilikli reformalardıń tórkininde insannıń qádir-qımbatın qásterlew degen jaqsı niyet jámlengen.

 

Qaraqalpaqstan Respublikası Joqarǵı Keńesiniń Málimleme xızmeti