Joqarǵı Keńes Baslıǵı Pro Liga oyınları aldınan Aral futbol komandası aǵzalarına áwmet tiledi

Sonǵı jılları húrmetli Prezidentimiz basshılıǵında jaslardı hár tárepleme qollap-quwatlaw, olardıń qábiletin júzege shıǵarıwda kómeklesiw, ozıq oylı, fizikalıq jaqtan shınıqqan, ana Watanǵa muxabbat ruwxında tárbiyalawǵa ayrıqsha itibar qaratılıp kelinbekte. Ásirese, elimizdiń bayraǵın dúnyaǵa tanıtıwda salmaqlı úles qosıp atırǵan sport tarawına ayrıqsha dıqqat awdarılıp, sportshılarımızdıń miynetleri barqulla itibarǵa alınıp kelinbekte. Bul baǵdarda elimizde futboldı rawajlandırıw hám onı ǵalabalastırıw boyınsha da bir qatar jumıslar ámelge asırılıp atır. Jaqında respublikamızdıń Aral komandası jemisli júrisin dawam etip, Pro Ligada oynaw imkaniyatın jeńip alǵan edi. Búgin Qaraqalpaqstan Respublikası Joqarǵı Keńesiniń Baslıǵı Amanbay Orınbaev Aral komandası aǵzaları menen ushırasıp, Pro Liga oyınları aldınan futbolshılarǵa áwmet tiledi hám qaraqalpaqstanlı futbol ıqlasbentleri olardan jaqsı nátiyjeler kútip qalatuǵınlıǵın bildirdi. Sonday-aq, ushırasıwda Aral futbol komandasına jańadan qabıl etilgen futbolshılar tanıstırılıp, maydanda oynaw tártip nomerleri túsirilgen oyın formaları tapsırıldı.

  Sh.Nasimov – dárwazaman-Shortan (Qashqadárya) Ǵ.Sariboev – qorǵawshı-Turan (Ferǵana) O.Rajabov – qorǵawshı-Nasaf (Qashqadárya) S.Qutıbaev – yarım qorǵawshı-Neftchi (Ferǵana) Sh.Turopov – yarım qorǵawshı-Qızılqum (Nawayı) A.Yusupov – hújimshi-Buxara (Buxara) T.Usmonov – hújimshi-Buxara (Buxara) Atap ótilgen futbolshılar joqarıda kórsetilgen komandalardan Aral komandasına tartılǵan bolıp, Pro Liga oyınlarında futbol komandamız atınan maydanǵa túsedi. Sonıda ayrıqsha atap ótiw kerek, Qaraqalpaqstan futbol associaciyası, «Jayxun» hám «Aral» professional futbol klubın qollap-quwatlaw, olardıń fizikalıq shınıǵıwlardı alıp barıwın támiyinlew ushın inventarlar, sport kiyimlerin alıw, zárúr dári-darmaqlar hám awqatlanıw racionına tiykar ónimler menen támiyinlew maqsetinde Joqarǵı Keńes Baslıǵı tárepinen 11,0 mlrd. sum qarjı ajıratıldı. Sonıń menen birge, hár bir jeńiske erisken oyınında xoshametlep barıw maqsetinde 280 mln sum qosımsha qarjı ajıratıldı.

  Óz náwbetinde, ushırasıw dawamında futbol komandası trenerleri hám oyınshılar Joqarǵı Keńes Baslıǵına kórsetilip atırǵan itibar ushın minnetdarshılıǵı sheksiz ekenligin atap ótti hám bildirilip atırǵan isenimdi aqlawǵa bar qush-jigerin jumsaytuǵınlıǵın aytıp ótti.

 

Qaraqalpaqstan Respublikası Joqarǵı Keńesiniń Málimleme xızmeti