Kóshpeli qabıllawlar múrájatlardı unamlı sheshiwdiń mexanizmi

Biz búgin xalıqshıl hám demokratiyalıq principlerge tiykarlanǵan erkin puqaralıq jámiyet qurıp atırmız. Mámleketimizde insan mápleri joqarı qádiriyat dárejesine kóterildi. Sol sebepli «Insan mápleri hámme nárseden ústem» hám «Xalıq mámleket uyımlarına emes, al mámleketlik uyımlar xalıqqa xızmet etiwi kerek»-degen principler tiykarında puqaralarımızdıń mashqalaların úyreniw hám saplastırıw, nızamlı máplerin támiyinlew jolında barlıq iygilikli jumıslar alıp barılmaqta. Usı jıldıń 4-mart kúni Qaraqalpaqstan Respublikası Joqarǵı Keńesiniń Baslıǵı puqaralardıń múrájatların úyreniw hám olardı saplastırıw maqsetinde aymaqlarda kóshpeli qabıllawların baslaǵan edi. 11-mart kúni Joqarǵı Keńes Baslıǵı Amanbay Orınbaevtıń Qaraózek rayonında Shımbay Taxtakópir hám Qaraózek rayonları puqaraları ushın gezektegi jeke qabıllawı ótkerildi. Qabıllawǵa Ózbekstan Respublikası bas prokurorınıń orınbasarı S.Samadov qatnastı.

Ótkerilgen qabıllawda mashqalalar menen kelgen puqaralardıń múrájatları tıńlanıp, ornında sheshim tabıw ilajları kórildi.

    Puqaralar tárepinen tiykarınan sociallıq, materiallıq hám medicinalıq járdemler, bántligin támiyinlew, bilimlendiriw, isbilermenlik iskerligindegi ushırasıp atırǵan mashqalalar, máhálleler infrastrukturası menen baylanıslı máseleler boyınsha múrájatlar bildirildi.

  Aytıp ótiw orınlı, qabıllawda puqaralar tárepinen bildirilgen múrájatlardıń basım kópshiligi ornında unamlı sheshimin taptı, waqıt talap etiletuǵın múrájatlar Qaraqalpaqstan Respublikası Joqarǵı Keńesi Baslıǵınıń jeke qadaǵalawına alınıp, tez pursatta unamlı sheshiw boyınsha tiyisli taraw basshılarına tapsırmalar berildi. Álbette, puqaralar mashqalaların sheshiw jolındaǵı bunday qabıllawlar elimizde «Insan qádiri ushın» principinde húrmetli Prezidentimiz basshılıǵında alıp barılıp atırǵan reformalardıń jáne bir kórinisi boları sózsiz. Xalıqtıń mashqalalarına sheshim tabıw hám olardıń turmıs abadanlıǵın támiyinlep, búgingi turmısınan razı etiw boyınsha Joqarǵı Keńes Baslıǵınıń jeke qabıllawları dawam etedi.  

Qaraqalpaqstan Respublikası Joqarǵı Keńesiniń Málimleme xızmeti