Ózbekstan Respublikası Prezidentiniń pármanı
Watandı qorǵaw hám el-xalqımızdıń tınıshlıǵı jolında qaytıs bolǵan áskeriy xızmetkerdiń shańaraq aǵzaların sonday-aq, olardıń qaramaǵındaǵı shaxslardı hár tárepleme qollap-quwatlaw, olarǵa ǵamxorlıq etiw hám húrmet-izzet kórsetiw, sonday-aq, jámiyette jaqsılıq, tatıwlıq hám adamgershilik ortalıǵın jáne de bekkemlew maqsetinde:
- Qorǵanıw ministrligi, Ishki isler ministrligi, Ayrıqsha jaǵdaylar ministrligi, Milliy gvardiya, Mámleketlik qáwipsizlik xızmeti, Ózbekstan Respublikası Prezidenti mámleketlik qáwipsizlik xızmeti, Bajıxana komiteti hám Elektron texnologiyalardı rawajlandırıw orayınıń (keyingi orınlarda – juwapker ministrlik hám uyımlar) Watandı qorǵaw hám el-xalqımızdıń tınıshlıǵı jolında jaralanǵanlıǵı, kontuziya yamasa mayıp bolǵanlıǵı aqıbetinde qaytıs bolǵan áskeriy xızmetkerlerdiń shańaraq aǵzaları hám olardıń qaramaǵındaǵı shaxslarǵa (keyingi orınlarda – qaytıs bolǵan áskeriy xızmetkerler) tómendegi jeńillik hám kepllikler berilsin:
a) 2023-jıl 1-aprelden baslap:
qaytıs bolǵan áskeriy xızmetkerdiń shańaraq aǵzalarına bir márte beriletuǵın napaqa marhumnıń sońǵı iyelegen lawazımı boyınsha miynet haqısı hám áskeriy (arnawlı) dárejesi miynet haqısı jıyındısınıń
150 esesi muǵdarında belgilensin;
qaytıs bolǵan áskeriy xızmetkerlerdiń mámleketlik májbúriy jeke qamsızlandırıwı sheńberinde áskeriy xızmetker qaytıs bolǵanda tólenetuǵın qamsızlandırıw summası bazalıq esaplaw muǵdarınıń
200 esesi muǵdarında belgilensin;
Qaraqalpaqstan Respublikası Ministrler Keńesi, wálayatlar hám Tashkent qalası hákimliklerine olar tárepinen belgilengen muǵdarlarda (miynetke haqı tólew muǵdarınıń 50 procentine shekemgi summadan aspaǵan halda) jergilikti byudjetlerdiń qosımsha dárekleri esabınan qaytıs bolǵan áskeriy xızmetkerlerdiń tiyisli aymaqta jasap atırǵan shańaraq aǵzalarına
hár ayda tólenetuǵın napaqa tayınlaw tártibin belgilew huqıqı berilsin;
b)
2023-jıl 1-maydan baslap:
shańaraqtıń miynetke uqıpsız hár bir shańaraq aǵzasına baǵıwshısın joyıtqanlıq pensiyası pensiyanı esaplap shıǵıw ushın alınatuǵın pul támiynatınıń (miynet haqısınıń)
50 procenti muǵdarında belgilensin;
shańaraq aǵzaları (ata-anası, ómirlik joldası, 23 jasqa tolmaǵan perzentleri) dáramatlar qaysı ayda alınǵan bolsa, sol ayda hár bir ay ushın miynetke haqı tólew eń az muǵdarınıń
3 esesi muǵdarındaǵı dáramatlar boyınsha fizikalıq táreplerden alınatuǵın dáramat salıǵınan azat etilsin;
belgilengen tártipte turaq jayǵa mútáj dep tán alınǵan jaǵdayda, turaq jay menen
birinshi gezektegi tártipte támiyinlesin;
nızamshılıqta belgilengen áskeriy xızmetkerlerge turaq jay satıp alıw (qurıw) ushın uzaq múddetli jeńilletilgen ipoteka kreditlerin beriw tártibine muwapıq
uzaq múddetli jeńilletilgen kreditlerin alıw huqıqı saqlap qalınsın;
qaytıs bolǵan áskeriy xızmetkerdiń jańa nekege kirmegen ómirlik joldası hám (yamasa) áskeriy xızmetkerdiń qaramaǵında bolǵan ata-anasınan birine Ózbekstan Respublikası Qurallı Kúshleriniń áskeriy xızmetkerlerge turaq jaydı ijaraǵa alǵanı (ijarada turǵanı) ushın
hár aylıq pul kompensaciyasın tólew tártibi qollanılsın (múlkinde turaq jay bolmaǵan jaǵdayda).
- Sonday tártip ornatılsın, oǵan muwapıq 2023-jıl 1-iyunnan baslap:
a) qaytıs bolǵan áskeriy xızmetkerdiń perzentleri mektepke shekemgi bilimlendiriw mákemelerinde
biypul tárbiyalanıwı, sonday-aq, professional hám joqarı bilimlendiriw mákemelerinde
mámleketlik grant tiykarında qosımsha kvotalar boyınsha bilim alıwı támiyinlenedi;
b) qaytıs bolǵan áskeriy xızmetkerdiń ata-analarına jılına eki márte
temir jol hám hawa jolawshıları transportınan biypul paydalanıw huqıqı beriledi;
v) qaytıs bolǵan áskeriy xızmetkerdiń shańaraq aǵzalarına:
usı qaytıs bolǵan áskeriy xızmetkerler xızmetti ótegen juwapker ministrlik hám uyımlardıń medicina mákemelerinde
biypul medicinalıq járdem alıw huqıqı saqlap qalınadı, sonday-aq, medicinalıq járdemniń kepillengen kólemleri sheńberinde medicinalıq járdemdi
tiykarǵı túrde alıw hám
gezekten tıs emlewxanaǵa jatqarıw imkaniyatı jaratıladı;
joqarı texnologiyalıq qánigelestirilgen medicinalıq járdem kórsetiwshi medicina shólkemleri tárepinen Mámleketlik byudjettiń qarjıları esabınan
biypul medicinalıq járdem kórsetiledi;
gezektegi miynet dem alısınan
qolaylı waqıtta paydalanıw, sonday-aq, jılına
eki háptege shekemgi múddetke miynet haqı saqlanbaytuǵın
qosımsha dem alıw huqıqı beriledi.
- Juwapker ministrlik hám uyımlar Mámleketlik byudjetten olarǵa ajıratılǵan qarjılar hám byudjetten tısqarı dárekleri esabınan qaytıs bolǵan áskeriy xızmetkerlerdiń shańaraq aǵzaları ushın olardıń múrájatlarına tiykarlanıp tómendegilerdi támiyinlesin:
Ózbekstan Respublikası aymaǵındaǵı
sanatoriy-kurort mákemeleri hám balalardı salamatlandırıw oraylarında jılına bir márte
biypul salamatlandırıw;
shıpakerlerdiń receptlerine tiykarlanıp 3 aylıq talaptan kelip shıǵıp
dári quralların (jılına bir márte),
medicinalıq hám arnawlı protez-ortopediya úskenelerin alıp beriw hám
xirurgiyalıq operaciyalardıń qárejetlerin qaplaw;
awır diagnozlı kesellikleri hám
mayıplıǵı bolǵanlarǵa shıpakerlerdiń receptlerine muwapıq, jılına bir márte dári qurallarınıń
50 procentine shekemgi summasın kompensaciyalaw.
- Usı Pármanda (1-bánt «a» kishi bántiniń ekinshi hám úshinshi abzaclarınan tısqarı) belgilengen jeńillik hám kepillikler 1991-jıl 1-yanvardan baslap usı Párman kúshke kirgenge shekem qaytıs bolǵan áskeriy xızmetkerlerdiń shańaraq aǵzalarına da qollanılsın.
- Qorǵanıw ministrligi, Ishki isler ministrligi, Ayrıqsha jaǵdaylar ministrligi, Milliy gvardiya, Mámleketlik qáwipsizlik xızmeti, Ózbekstan Respublikası Prezidenti mámleketlik qáwipsizlik xızmeti, Bajıxana komiteti hám Elektron texnologiyalardı rawajlandırıw orayı hár bir qaytıs bolǵan áskeriy xızmetkerlerdiń shańaraǵın ǵamxorlıqqa alsın.
Onda:
qaytıs bolǵan áskeriy xızmetkerdiń shańaraq aǵzalarınan
xabar alınıwı, olardıń turaq jay menen támiyinleniw, jumısqa jaylasıw, bilim alıw, medicinalıq hám sociallıq xızmetlerden paydalanıw sonday-aq, basqa da áhmiyetli máseleleriniń
úyreniliwi hám
mashqalalarınıń sheshiliwi, usı Párman hám basqa da nızamshılıq hújjetlerinde belgilengen
jeńillik hám kepilliklerden paydalanıwda ámeliy járdem kórsetip barılıwı támiyinlesin;
juwapker ministrlik hám uyımlardıń
birinshi basshıları usı bántte belgilengen wazıypalardıń sapalı orınlanıwına jeke juwapker etip belgilensin;
juwapker ministrlikler hám uyımlarda ulıwma shtatlar sanı sheńberinde olardıń birinshi basshılarına usı bántte belgilengen wazıypalardı orınlawǵa járdemlesetuǵın
másláhátshi lawazımı kirgizilsin hám qaytıs bolǵan áskeriy xızmetkerlerdiń shańaraqları menen turaqlı baylanıstı ornatıw ushın
isenim telefonları iske qosılsın;
usı bánttiń orınlanıw nátiyjeleri haqqında Ózbekstan Respublikası Prezidenti Administraciyasına hár ayda
málimleme kirgizip barılsın.
- Qorǵanıw ministrligi Ishki isler ministrligi, Ayrıqsha jaǵdaylar ministrligi, Milliy gvardiya, Mámleketlik qáwipsizlik xızmeti, Ózbekstan Respublikası Prezidenti mámleketlik qáwipsizlik xızmeti, Ekonomika hám qarjı ministrligi hám basqa da shólkemler menen birgelikte jumısshı toparlar dúzgen halda:
eki ay múddette usı Pármannıń 1,2 hám 3-bántlerinde názerde tutılǵan
hár bir jeńillik hám kepillikti beriw tártibin belgilewshi normativlik-huqıqıy hújjetlerdiń joybarların;
2023-jıl 1-dekabrge shekem «Veteranlar haqqında»ǵı,
«Áskeriy xızmetkerlerdiń dárejesi hám olardı sociallıq qorǵaw haqqında»ǵı hám
«Áskeriy xızmetkerlerdiń pensiya támiynatı haqqında»ǵı nızam joybarların islep shıǵıp, Ministrler Kabinetine kirgizsin.
- Ekonomika hám qarjı ministrligi usı Pármannıń orınlanıwın támiyinlew ushın 2023-jılı ministrlik hám uyımlarǵa Mámleketlik byudjetten zárúr qarjılardı ajıratsın, 2024-jıldan baslap Mámleketlik byudjet parametrlerin qáliplestiriwde zárúr qarjılardı názerde tutsın.
- Málimleme hám ǵalaba kommunikaciyalar agentligi Ózbekstan Milliy málimleme agentligi hám Ózbekstan Milliy teleradiokompaniyası menen birgelikte ǵalaba xabar qurallarında usı Pármannıń mazmun-mánisi hám áhmiyetiniń keńnen jarıtılıwın támiyinlesin.
- Usı Pármannıń orınlanıwın nátiyjeli shólkemlestiriwge juwapker hám jeke juwapker etip qorǵanıw ministri B.N.Kurbanov, ishki isler ministri P.R.Bobojonov, Mámleketlik qáwipsizlik xızmetiniń baslıǵı A.A.Azizov, Ózbekstan Respublikası Prezidenti mámleketlik qáwipsizlik xızmetiniń baslıǵı A.A.Usmanov hám Milliy gvardiya sárkardası R.M.Djuraev belgilensin.
Usı Pármannıń orınlanıwın hár sherekte dodalap barıw, orınlaw ushın juwapker uyımlardıń jumısın muwapıqlastırıw hám qadaǵalaw Ózbekstan Respublikası Prezidenti janındaǵı Qáwipsizlik keńesiniń xatkeri V.V.Maxmudovqa júklensin.
Ózbekstan Respublikası Prezidenti Sh.MIRZIYoEV
