Húrmetli Prezidentimiz Qaraqalpaqstan Respublikasına bolǵan saparında «Sizler menen birge úlken háreket basladıq. Hár bir aymaqtıń dártin bileyik, hár bir insannıń ishine kireyik, erteńgi kúnge isenimin oyatayıq dep tereń reformalardı ámelge asırıp atırmız. Adamlar erteń emes, alıs keleshekte emes, búgin jaqsı jasawı kerek» - dep, xalqımızdıń turmısında ushırasıp atırǵan mashqalalarǵa sheshim tabıw, olardıń búgingi kúninen razılıǵın támiyinlew hár bir basshınıń moynına júkletilgen joqarı wazıypa ekenligin atap ótken edi. Usı tiykarda húrmetli Prezidentimiz baslaması menen barlıq orınlarda xalıqtıń dárt hám táshwishlerin jeńilletiw boyınsha jumıslar ámelde dawam ettirilmekte. Respublikamızdıń alıs aymaqlarında jasawshı puqaralardı ishimlik suwı menen támiyinlew, olardıń kúndelikli turmısında paydalanıwı ushın suw jetkerip beriliwin jolǵa qoyıw da usı tiykardaǵı jumıslardan bolıp, taynapır burǵılawshı texnikalar járdeminde artezian qudıqların qazıw jumısları Taxtakópir rayonınıń alıs Beltaw APJ aymaǵınan baslanǵan edi. Házirgi waqıtta awıl puqaralar jıyını aymaǵınan úlken kólemdegi artezian qudıqları qazılıp, 500-600 mt tereńlikten suw shıǵarıwǵa erisildi.

Sonday-aq, aymaqta jańa egislik jerlerin ashıw maqsetinde 2000 geklar jer maydanı tayarlanıp atır. Bul ushın zárúrli barlıq texnikalar mobilizaciya etilgen. Sonıń menen birge, usı egislik maydanlarına tamshılatıp suwǵarıw jolı menen suw jetkerip beriliwin támiyinlew maqsetinde 12 orında jasalma suw saqlawshı basseynlerdi qazıw jumısları da qızǵın pátte dawam etpekte.

Bul iygilikli jumıslar búgingi kúnniń ózinde óz nátiyjesin kórsetpekte. Yaǵnıy, Beltaw APJ aymaǵına ómir qaytıp, qańırap qalǵan jap-salmalar máwijlengen suwǵa tolıp aǵıp atır. Tirishilik dereginiń Beltaw etegindegi jer maydanlarına qayta ómir baǵıshlawı adamlardıń jaynaǵan júzinde de óz sáwlesin tappaqta. Jası úlkenlerdiń hár bir pátiyasında aytılatuǵın «Suw mol bolǵay» degen tilegi búgin Prezidentimiz basshılıǵında real turmısqa kóship, aymaq turǵınlarınıń quwanıshısına sebep bolmaqta. Aldın «suw qashan keledi» degen sorawlı baǵıs qılatuǵın puqaralardıń kózinde búgin húrmetli Prezidentimizge, el basshılarına minnetdarshılıq sezimleri kórinedi.

Óz náwbetinde tayarlanıp atırǵan egislik maydanlarda baǵ jaratıw hám awıl xojalıǵı eginlerin egiw rejelestirilgen. Bunıń nátiyjesinde aymaq turǵınları, jergilikli puqaralar ushın jańa jumıs orınları jaratıladı. Eń baslısı, adamlardıń shańaraǵına dáramat kirip, turmıs abadanlıǵı artadı. Xalıq iygiligi jolında ámelge asırılıp atırǵan bul jumıslar álbette óz nátiyjesin bereri sózsiz hám bul, búginniń ózinde turmısta óz sáwlesin tawıp úlgermekte. Xalqımızǵa múnásip turmıs sharayatın jaratıw boyınsha jumıslar ele de qızǵın pátte dawam ettiriledi.

Qaraqalpaqstan Respublikası Joqarǵı Keńesiniń Málimleme xızmeti