BMSHniń Insan huqıqları boyınsha Bas komissarınıń Aralboyına saparı

BMShniń Insan huqıqları boyınsha Bas komissarı Folker Tyurk basshılıǵındaǵı delegaciya mámleketimizge saparı dawamında respublikamızda da boldı. Dáslep delegaciya aǵzaları ushın Qaraqalpaqstan Respublikası Joqarǵı Keńesinde qabıllaw boldı. Onda Joqarǵı Keńes Baslıǵı Amanbay Orınbaev miymanlardı respublikamızǵa saparı menen qutlıqlap, Prezidentimizdiń basshılıǵında Aralboyın sociallıq-ekonomikalıq jaqtan rawajlandırıw, búgingi kúnniń baslı mashqalası bolǵan ekologiyalıq jaǵdaydı turaqlastırıw, xalıqtıń abadan turmısın támiyinlew baǵdarında qabıl etilgen párman hám qararlar, olardıń orınlanıwı boyınsha ámelge asırılıp atırǵan keń kólemli jumıslarǵa toqtap ótti.

  Álbette, bul reformalardıń túp mánisi insan hám onıń baxıtlı keleshegin támiyinlew bolıp tabıladı.

  BMShniń Insan huqıqları boyınsha Bas komissarı Folker Tyurk jıllı júzlilik penen qabıl etkenligi ushın Joqarǵı Keńes Baslıǵına minnetdarshılıq bildirdi. Ushırasıw barısında insan huqıqların támiyinlew baǵdarındaǵı bir qatar jumıslar sóz etildi. Bunnan soń miymanlar Qaraqalpaqstan Respublikası Ministrler Keńesinde de boldı. Ministrler Keńesi Baslıǵınıń orınbasarı, senator A.Daniyarov penen bolǵan ushırasıwda jaslardı qollap-quwatlaw, olardıń qábiletin, talant hám uqıplılıǵın júzege shıǵarıw, mashqalalarına sistemalı túrde sheshim tabıw baǵdarında elimizde alıp barılıp atırǵan jumıslar baǵdarında sóylesildi.

  Kúnniń ekinshi yarımında BMShniń Insan huqıqları boyınsha Bas komissarı Folker Tyurk Nókis qalasındaǵı Ámiwdárya mákan puqaralar jıyınındaǵı 21-sanlı ulıwma bilim beriw mektebi janında bir qatar nuranıylar, máhálle belsendileri menen ushırastı. Ushırasıwda qısqa waqıt ishinde máhállede Prezidentimiz tapsırması menen puqaralarǵa múnásip sharayat jaratıw boyınsha ámelge asırılǵan qurılıs-ońlaw hám abadanlastırıw jumısları, kóp milletli aymaq turǵınlarınıń tatıwlıqta ómir súrip atırǵanı boyınsha sóz etildi.

  Sonday-aq, miymanlar I.Savickiy atındaǵı Qaraqalpaq mámleketlik kórkem óner muzeyinde boldı. Usınıń menen BMShniń Insan huqıqları boyınsha Bas komissarı Folker Tyurk basshılıǵındaǵı delegaciyanıń respublikamızǵa saparı juwmaqlandı.

 

Qaraqalpaqstan Respublikası Joqarǵı Keńesiniń Málimleme xızmeti