Joqarǵı Keńes Baslıǵı turizm, mádeniyat, mádeniy miyras, milliy kinemotografiya tarawları boyınsha ámelge asırılıp atırǵan jumıslarǵa arnalǵan videoselektor májilisin ótkerdi

Qaraqalpaqstan Respublikası Joqarǵı Keńesiniń Baslıǵı Amanbay Orınbaev turizm, mádeniyat, mádeniy miyras, milliy kinemotografiyanı rawajlandırıw hámde bul tarawlarda jol qoyılıp atırǵan kemshilikler haqqındaǵı máselelerge arnalǵan videoselektor májilisin ótkerdi. Onda tiyisli ministrlik, basqarma hám basqarıw uyımları, jergilikli hákimlikler qatnastı. Sonǵı jılları turizm hám mádeniy miyras obektleriniń infrastrukturasın rawajlandırıw, usı jónelistegi jumıslardı qollap-quwatlaw baǵdarında keń kólemli reformalar ámelge asırılmaqta. Biraq, jaratılǵan qolaylıqlarǵa qaramastan, búgingi kúnde bul tarawda alıp barılıp atırǵan ilajlar talap dárejesinde ámelge asırılmay atır. Ótkerilgen májiliste Joqarǵı Keńes Baslıǵı tárepinen tarawlarda búgingi kúnde ámelge asırılıp atırǵan jumıslar sınǵa alındı.

  Atap ótiw kerek, húrmetli Prezidentimiz tárepinen ishki hám sırtqı turizmdegi jaǵday, máwsimge tayarlıq kóriw hám bul tarawdaǵı mashqalalardı saplastırıw boyınsha bir qatar tapsırmalar belgilep berilgen. Usıǵan qaramay, juwapkerler tárepinen búgingi kúnde bul wazıypalardı orınlawda artta qalıwshılıq jaǵdaylarına jol qoyılmaqta. 2022-jılda qala hám rayonlarda turizm tarawında ámelge asırılıwı belgilengen 6 joybar iske túsirilmegen, 2023-jılǵa reje etip belgilengen 31 turizm joybarlarında usı kúnge shekem hesh qanday jumıslar baslanbaǵan. Usılar menen bir qatarda, belgilengen wazıypalar tiykarında qala hám rayonlarda turizm tarawına isbilermenlik subektlerdi keńnen tartqan halda olar menen birgelikte hár qıylı kewil ashar parklerdi, komplekslerdi shólkemlestiriw belgilengen bolsa da, bul baǵdardaǵı jumıslar da talap dárejesinde orınlanbay atır. Sonday-aq, Joqarǵı Keńes Baslıǵı óz sózinde “Jaslar, qalamızǵa keliwshi miymanlar hám xalqımız mádeniy dem alıw ushın qay jerge baradı? Kewil ashar, dem alıw maydanlarımız barma ózi?”- degen oǵada áhmiyetli máseleni qoydı hám bul boyınsha juwapkerlerge kewil ashar maydanlar, kinoteatrlar, qıyaban hám jaslar seyil etiwi ushın baǵ shólkemlestiriw ilajların kóriw boyınsha tapsırma berdi.

  Bunnan tısqarı, turizm tarawındaǵı kadrlardı tayarlaw hám olardıń mamanlıǵın arttırıw jumısları da jeterli dárejede jolǵa qoyılmaǵanlıǵı, sonday-aq, sırt elli turistlerdi qızıqtıratuǵın festival hám mádeniy ilajlar shólkemlestiriw boyınsha jumıslar búgingi kúnniń talabına juwap bermey atırǵanlıǵı atap ótildi. Joqarıdaǵılar menen bir qatarda, bıyılǵı jılı respublikamızǵa 80 mıń sırt el turistlerin alıp keliw hám turizm eksportın 25 million dollarǵa jetkeriw boyınsha reje belgilep alınǵan. Biraq, tiyisli mákeme, qala hám rayon hákimlikleri tárepinen jumıslar jeterli dárejede shólkemlestirilmey atır. Usılar menen bir qatarda, búgingi kúnde jámi  mádeniy miyras obektlerin saqlap qalıw hám olardıń turistlik imkaniyatlarınan nátiyjeli paydalanıw boyınsha ámelge asırılıp atırǵan jumıslar da talap dárejesinde emes. Sonıń menen birge, arxeologiyalıq mádeniy miyras obektlerin ilimiy jaqtan úyreniw jumısları da durıs shólkemlestirilmey atır. Bunday obektlerde ilimiy izertlew jumısların ámelge asırıw arqalı olardı saqlaw, qorǵaw hám úgit-násiyatlaw arqalı turizmdi rawajlandırıwǵa erisilgen bolar edi.

  Májiliste Joqarǵı Keńes Prezidiumınıń 2023-jıl 28-fevraldaǵı qararı tiykarında “Qaraqalpaq film” kino studiyasınıń imaratında kapital ońlaw jumısların alıp barıw ushın qarjı ajıratılıp atırǵanlıǵı hám materiallıq-texnikalıq bazasın bekkemlew boyınsha tiyisli ilajlar kórilip atırǵanlıǵı atap ótildi. Sonıń menen birge “Qaraqalpaq kino” agentligi jumısları boyınsha da bir qatar sın pikirler bildirildi. Ótkerilgen májiliste óz jumısın orınlawda qáte-kemshiliklerge jol qoyǵanı hám belgilengen tapsırmalardı orınlawda nemquraydılıq penen qaraǵanı ushın Ministrler Keńesiniń Turizm, mádeniyat hám mádeniy miyras sekretariyatı baslıǵına, Turizm hám mádeniy miyras ministri orınbasarına intizamıy jaza sharası qollanıldı.  

Qaraqalpaqstan Respublikası Joqarǵı Keńesiniń Málimleme xızmeti