Joqarǵı Keńes Baslıǵı Qostruba awılı turǵınları menen ushırasıp, jaqınnan sáwbetlesti

Búgingi kúnde húrmetli Prezidentimiz basshılıǵında orınlarda puqaralardıń mashqalalarına sheshim tabıw, olardıń táshwishlerin anıqlaw, turmısında ushırasıp atırǵan qıyınshılıqlardı jeńilletiw boyınsha sistemalı jumıslar ámelge asırılmaqta. Usı maqsette Qaraqalpaqstan Respublikası Joqarǵı Keńesiniń Baslıǵı Amanbay Orınbaev 2022-jıldıń noyabr ayında Qostruba awılı puqaraları menen ushırasqan edi. Búgin Joqarǵı Keńes Baslıǵı bolıp ótken ushırasıwda bildirilgen múrájatlardıń sheshimi hám juwapkerlerge berilgen tapsırmalardıń nátiyjesin kóriw ushın Taxtakópir rayonınıń Qostruba awılına bardı hám elatta puqaralar menen kórisip, jaqınnan sáwbetlesti.

Aytıp ótiw orınlı, Joqarǵı Keńes Baslıǵınıń aldınǵı jeke qabıllawında bildirilgen múrájatlardıń kópshiligi óz sheshimin taptı.  Sonnan, aymaqtaǵı 27 xojalıqqa gaz plitasın alıp beriw máselesi de sheshimin tawıp, Qaraqalpaqstan Respublikası Joqarǵı Keńesi tárepinen gaz plitası menen támiyinlendi. Máhálle imaratın qurıp beriw boyınsha bildirilgen múrájatta unamlı sheshimin taptı. Awılǵa isbilermenler tárepinen ayına 2 márte azıq-awqat ónimlerin alıp keliw ushın transport ajıratıldı, xalıq bilimlendiriw ministrligi usınısı tiykarında bolsa joqarı oqıw ornına qabıl etiw máselesi boyınsha S.Buzǵulbaeva NMPIdiń “Baslawısh klass” tálimi baǵdarı boyınsha 82,10 ball toplap, oqıwǵa qabıllandı, sonday-aq, shártnama pulınıń 50 payızı tólep berildi. Aymaqtaǵı mektep filialın tájiriybeli muǵallimler menen támiyinlew, oqıtıwshılarǵa kvota ajıratıw máselesi de unamlı sheshim tawıp, puqara I.Tlewmuratov qaraqalpaq tili qánigeligi boyınsha jumısqa ornalastırıldı. Awıllıq medicina punktin (jeńil konstrukciyalı) ornatıp beriw boyınsha bir dana medicinalıq konteyner alıp barıp ornatıp berildi.Búgingi ushırasıwda da bir qatar puqaralardıń tilek-ótinishleri tıńlandı hám óz náwbetinde Joqarǵı Keńes Baslıǵı tárepinen ornında sheship berildi.

Atap aytqanda, bildirilgen múrájatlar boyınsha joqarı oqıw ornında oqıp atırǵan aymaq turǵınlarınıń kontrakt pulları tólenip, ózin-ózi bánt etiw qálewshiligi bar puqaralar ushın konditer pech, tigiw mashinaları úskeneleri beriletuǵın boldı. Sonday-aq, joqarı oqıw orınlarında oqıw qálewshiligi bar puqaralarǵada járdem beriletuǵın boldı. Álbette, Prezidentimiz basshılıǵında alıp barılıp atırǵan iygilikli reformalardıń, ámelge asırılıp atırǵan ózgerislerdiń hár bir shańaraqqa jetip barıwın támiyinlew jolındaǵı jumıslar turaqlı túrde dawam ettiriledi.

Qaraqalpaqstan Respublikası Joqarǵı Keńesiniń Málimleme xızmeti