Joqarǵı Keńes Baslıǵı Qaraqalpaq mámleketlik universitetinde ótkerilgen Nawrız bayramı saltanatına qatnastı

Búgin Berdaq atındaǵı Qaraqalpaq mámleketlik universitetinde «Hár kúniń Nawrız bolsın, janajan Ózbekstanım!» súreni astında bayram saltanatı bolıp ótti. Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, búgingi kúnde elimizde jaslarǵa jaratılıp atırǵan imkaniyatlar, student-jaslardı hár tárepleme qollap-quwatlaw baǵdarında húrmetli Prezidentimiz basshılıǵında ámelge asırılıp atırǵan jumıslardı atap ótti. Joqarǵı Keńes Baslıǵı óz sózinde milliy bayramımız, jańarıw hám jasarıw paslınıń gúltajı bolǵan nawrız bayramı múnásibeti menen jıynalǵanlardı qutlıqladı.

  Bunnan soń milliy nama ırǵaqları jańlap, ilim, mádeniyat, kórkem óner ǵayratkerleri, túrli taraw wákilleri, nuraniy aǵa-apalar, universitet professor-oqıtıwshıları, student jaslar qatnasıwında bayram saltanatı baslandı. Bayramǵa tán sán-saltanat penen bezelgen sahnada qosıqlar jańlap, úrp-ádet hám dástúrlerimizge say sahnalıq kórinisler jıynalǵanlar názerine usınıldı. Bayram ilajı dawamında Joqarǵı Keńes Baslıǵı universitet fakultetleri tárepinen tayarlanǵan milliy taǵamlar menen bezetilgen dástúrxanlar átirapında jaslar menen ushırasıp, olardı bayram múnásibeti menen qutlıqladı.

  Atap ótiw kerek, qádirdanlıqtı, kóp milletler aralıq awızbirshilikti,  húrmet-izzetti tastırıp jiberetuǵın diydarlasıwlar Nawrızdıń keńpeyillik hám jaqsılıq tımsalı ekeniniń jáne bir ayqın mısalı bola aladı. Nawrızdıń janǵa jaǵımlı naması shalınıp, milliy kiyimleri menen átirapqa sán bergen universitet jasları bir ananıń perzentlerindey bekkem awızbirshilik penen bayramdı múnásip belgilemekte. Talantlı jaslar tárepinen milliy úrp-ádet, dástúrler, ayaq-oyınlar atqarılıp, milletler aralıq tatıwlıqtı jırlaytuǵın qosıqlar atqarıldı hám jıynalǵanlarǵa bayram keypiyatın inám etti.

  «Hár kúniń Nawrız bolsın, janajan Ózbekstanım!» súreni astında bayram ilajları joqarı oqıw orınları, sonday-aq, respublikamızdıń barlıq orınlarında kóterińki túrde dawam ettirilmekte.  

Qaraqalpaqstan Respublikası Joqarǵı Keńesiniń Málimleme xızmeti