Kegeyli rayonında Nawrız bayramı keń túrde belgilendi
2821
Pútkil elimiz boylap jasarıw hám jańalanıw, jaqsılıq hám keńpeyillik áyyyamı – Nawrız ulıwma xalıqlıq bayramı joqarı shólkemleskenlik penen belgilenbekte. Búgin ulıstıń ullı kúni kegeylishiler ushın rayondaǵı Júzimbaǵ awıl puqaralar jıyınındaǵı at shabar maydanında milliy oyınlar tamashalarına bay bolǵan Nawrız bayramı saltanatı bolıp ótti. Bayram ilajında Qaraqalpaqstan Respublikası Joqarǵı Keńesiniń Baslıǵı Amanbay Orınbaev qatnasıp, xalqımız benen birge bayram tamashaladı.
Nawrız úsh áwlad wákillerin birlestirip, ɵsip kiyatırǵan jaslarımız kewline qádiriyatlarımızǵa húrmet, milliy oyınlarımızǵa bolǵan súyispenshiligin asıradı desek aljaspaǵan bolamız. Bayram seyili "Qız quwıw" milliy dástúri menen baslanǵan bolsa, bunnan soń milliy oyınlarımız esaplanǵan at shabıs, ılaq oyını, túrli aylawlarǵa at jiberiw, jorǵa jarısı, qoshqarlar dúgisi, palwanlar gúresi sıyaqlı basqa da milliy oyınlarda respublikamızdıń barlıq orınlarınan hám qońsı wálayatlardan kelgen qatnasıwshılar bas bayraq ushın óz-ara bellesti.
13 aylawda Nókis rayonınan Ǵayrat Kasımovtıń "Doslıq" laqaplı atı birinshilerden bolıp jetip kelip, bas bayraqqa qoyılǵan "Túye" ni jeńip aldı. Nawrız seyillerinde xalqımızǵa inam etilgen bayram tamashaları jıynalǵanlarǵa úlken zawıq baǵıshladı.
Qaraqalpaqstan Respublikası Joqarǵı Keńesiniń Málimleme xızmeti