Shımbayshılar ushın bayram qosa keldi
2129
Búgin Shımbay rayonında jańarıw hám jasarıw bayramı bolǵan Nawrız qarsańında jańa Amfiteatrdıń ashılıw máresimi bolıp ótti.
Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, jıynalǵanlardı Nawrız bayramı qarsańında jańa Amfiteatrdıń paydalanıwǵa tapsırılǵanı múnásibeti menen qutlıqladı.
Aytıp ótiw orınlı, jańadan boy tiklegen, rayon kórkine ózgeshe shıray baǵıshlap turǵan 1 mıń 400 orınlıq zamanagóy Amfiteatr qurılısı ushın jergilikli byudjet esabınan 5.5 mlrd. sumnan aslam qarjı jumsaldı hám qurılıs jumısları sapalı etip juwmaqlandı.
Qurıp pitkerilip, paydalanıwǵa tapsırılǵan Amfiteatr uzaq jıllar dawamında xalqımızdıń ruwxıy dúnyasın bayıtıwǵa, jaslardıń bos waqıtların mazmunlı ótkeriwge, mádeniyatımız hám kórkem ónerimizdi elede rawajlandırıwǵa xızmet eteri anıq.
Aytıp ótiw orınlı, húrmetli Prezidentimizdiń Qaraqalpaqstanǵa bolǵan saparında berilgen tapsırmalar tiykarında Shımbay rayonında 4 sociallıq taraw obektinde derlik 15 mlrd. sumlıq, 14,8 km ishimlik suw tarmaqların jaqsılawǵa 2,9 mlrd. sumlıq, 30,7 km ishki jollardı 7,3 mlrd. sumlıq qurılıs-ońlaw hám rekonstrukciya jumısları alıp barıldı.
Bul berilgen tapsırmalar tiykarında rayonlıq medicina birlespesi, «Jaslar orayı», Madeniyat úyi imaratlarında, futbol stadionında, «Jaslar alleyası»nda, «Hásiretli ana» esteliginde hám basqa da bir qatar obektlerde keń kólemli jumıslar ámelge asırıldı. Tınısh turmıs táriziniń, ómir dawamlılıǵınıń simvolı esaplanǵan Kurant saatı iske tústi.
Bul ámelge asırılǵan jumıslardıń barlıǵı Shımbay rayonı xalqınıń turmıs abadanlıǵın támiyinlewge qaratılǵan.
Amfiteatrdıń ashılıw máresimi rayon turǵınları, kórkem óner sheberleri menen birgelikte Nawrız bayramına jalǵasıp, kóterińki ruxta dawam etti.
Záwlim Amfiteatr aldında hár bir xalıqtıń milliyligin sáwlelendirgen taǵamlar, buyımlar hám kiyim-kenshekler kórgizbesi miymanlar názerine usınıldı.
Jańa Amfiteatr Nawrız bayramına óz qushaǵın ashıp bayram keshesi dawam etti.
Qaraqalpaqstan Respublikası Joqarǵı Keńesiniń Málimleme xızmeti