Ilimpazlar Qaraqalpaqstan Respublikası Joqarǵı Keńesiniń Baslıǵı atınan qutlıqlanıp, «Ardaqlı nuraniy» kókirek belgileri menen sıylıqlandı
1192
Qaraqalpaq mámleketlik universitetinin Mádeniyat sarayında Qaraqalpaqstan Respublikasına miyneti sińgen jaslar ustazı, ximiya ilimleriniń kandidatı, docent Bazarbay Táńirbergenovtıń 80 jıllıq yubileyine baǵıshlanǵan «Aralboyı aymaǵında ximiya hám ximiyalıq texnologiyanıń rawajlanıwınıń házirgi zaman tendenciyaları» atamasında respublikalıq ilimiy-ámeliy konferenciya bolıp ótti.
Oǵan Tashkent qalası hám bir qatar wálayatlardan ilimpazlar qatnastı hám B.Táńirbergenovtıń ilimdi rawajlandırıwǵa qosqan úlesi, shákirtler hám jaslar tárbiyasındaǵı xızmetleri atap ótildi.
Ilaj sheńberinde B.Táńirbergenovqa Qaraqalpaqstan Respublikası Joqarǵı Keńesiniń Baslıǵı A.T.Orınbaevtıń qutlıqlawı oqıp esittirildi hámde yubilyarǵa «Ardaqlı nuranıy» kókirek belgisi tapsırıldı.
Sonday-aq, Berdaq atındaǵı Qaraqalpaq mámleketlik akademiyalıq muzıkalı teatrında Qaraqalpaqstan Respublikasına miyneti sińgen ilim ǵayratkeri, awıl xojalıǵı ilimleriniń doktorı, professor, Ózbekstan awıl xojalıǵı Ilimler Akademiyasınıń xabarshı aǵzası Biysenbay Mámbetnazarovtıń 80 jıllıq yubileyine baǵıshlanǵan «Aralboyı aymaǵında awıl xojalıǵı hám bioekologiyalıq izertlewlerdińinnovaciyalıq tiykarları» atamasındaǵı xalıqaralıq ilimiy-ámeliy konferenciya bolıp ótti.
Konferenciya dawamında B.Mámbetnazarovtıń ómir jolı hám ilimiy-pedagogikalıq xızmetlerine ayrıqsha toqtap ótildi.
Ilimpazǵa Qaraqalpaqstan Respublikası Joqarǵı Keńesi Baslıǵınıń qutlıqlawı jetkerilip, oǵan «Ardaqlı nuranıy» kókirek belgisi tapsırıldı.
Esletip ótemiz, jaqında ǵana Ózbekstan Ilimler Akademiyasınıń Qaraqalpaqstan bóliminde Qaraqalpaqstan Respublikasına miyneti sińgen ilim ǵayratkeri, texnika ilimleriniń doktorı Sali Bauatdinovtıń 80 jıllıq yubileyine baǵıshlanǵan «Degradaciyalanǵan topıraqlardı qayta tiklewde jergilikli minerallardan paydalanıwdıń nátiyjeliligi» atamasında respublikalıq ilimiy-ámeliy konferenciya ótkerilip, ilimpazǵa Qaraqalpaqstan Respublikası Joqarǵı Keńesi tárepinen húrmet kórsetilgen edi.
Qaraqalpaqstan Respublikası Joqarǵı Keńesiniń Málimleme xızmeti