Respublikamızdın Arqa rayonlarındaǵı ishki xojalıq jolların ońlaw boyınsha keń kólemli jumıslar baslandı

Sonǵı jılları elimizde húrmetli Prezidentimizdiń basshılıǵında aymaqlardı sociallıq-ekonomikalıq jaqtan rawajlandırıwǵa, máhálleler infrastrukturasın, xalıqtıń jasaw sharayatların jaqsılawǵa ayrıqsha itibar qaratılıp bul baǵdarda keń kólemli jumıslar ámelge asırılıp atır. Búgingi kúnde respublikamızdıń arqa rayonları xalqınıń turmısında ushırasıp kiyatırǵan mashqalalardı sheshiw, olardıń kewil-keypiyatına eń keri tásir etiwshi máselelerdiń biri bolǵan ishki xojalıq jolların ońlaw boyınsha úlken kólemde jumıslar baslandı. Búgin usı tiykardaǵı aldaǵı ámelge asırılıwı tiyis wazıypalardı belgilep alıw boyınsha Shımbay rayonında ilaj bolıp ótti. Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, húrmetli Prezidentimizdiń tikkeley tapsırması menen respublikamızdıń arqa rayonlarındaǵı máhállelerdi abadanlastırıw, ishki jolların ońlaw boyınsha ЩPS alıp kelingeni hám bul ele de dawam ettirilip, Taxtakópir, Qaraózek, Shımbay, Kegeyli rayonı xalqın jıllar dawamında qıynap kelgen mashqalalarǵa sheshim tabılatuǵınlıǵın atap ótti.

  Aytıp ótiw orınlı, hurmetli Prezidentimizdiń 2022-jıl 25-oktyabrdegi 408-sanlı qararı tiykarında 2022-2023-jıllarda 252 puqaralar jıyınlarındaǵı 289 infrastruktura obektlerinde 293,7 mlrd. sumlıq qurılıs ońlaw jumısları ámelge asırılıwı, sonday-aq, Ministrler Kabinetiniń 2022-jıl 6-sentyabrdegi 500-sanlı qararı tiykarında bıyılǵı jılda 347 km topıraq jollarǵa 55 mlrd. 678 mln. sumlıq qum-щeben aralaspası tóseliwi belgilenip, bugingi kúnde bul boyınsha barlıq orınlarda jumıslar dawam etpekte. Bunnan tısqarı, Ózbekstan Respublikası Ministrler Kabinetiniń 2023-jıl 2-fevraldaǵı 52-sanlı «Qaraqalpaqstan Respublikasında puqaralar ushın múnásip turmıs sharayatın jaratıw hám máhálleler infrastrukturasın ele de jaqsılaw is-ilajları haqqında»ǵı qararına tiykar járdemge mútáj shańaraqlarǵa tiyisli úy-jaylardıń tóbesin shiferlap beriw, zárúrlerin qaytadan qurıw boyınsha 231,6 mlrd. sum qarjı ajıratılǵan bolıp, jámi 261 máhállede jaylasqan 14 332 úy-jaydı ońlap beriw belgilengen. Házirgi waqıtta arqa rayonlar ushın arnawlı ЩPS kareri ajıratılǵan bolıp, Shımbay rayonına temir jol arqalı alıp kelinbekte. Bul baslanǵan iygilikli isler birinshi náwbette xalqımızdıń búgingi turmısınan razılıǵın támiyinlewge qaratılǵan bolıp, jazda qum shańǵıtlı, jawın-shashınlı kúnlerde ılay bolǵan kósheler tas jollarǵa aylandırıladı. Búgin Shımbay rayonına qum-щeben aralaspasınıń (ЩPS) dáslepki kárwanı 82 vagonda alıp kelindi.

  Joqarǵı Keńes Baslıǵı óz sózinde húrmetli Prezidentimizdiń tapsırması menen ЩPS materialı rayon orayına shekem alıp kelingenligin, sektor basshıları tek ǵana usı alıp kelingen materiallardı ishki jollarǵa jetkerilip, xalqımızdıń iygiligi ushın jumsalıwın basshılıqqa alıwı kerek ekenligin atap ótti. Bul iygilikli wazıypanı orınlawda óz jumısına nemquraydılıq penen qaraytuǵın hákim hám sektor basshılarına qatań juwapkershilik belgilenetuǵınlıǵı eskertildi. Xalqımızǵa múnásip turmıs sharayatın jaratıw, olardıń turmısında ushırasıp atırǵan mashqalalardı sheshiw baǵdarında baslanǵan búgingi úlken abadanlastırıw hám dóretiwshilik jumıslar ele de dawam ettiriledi.

 

Qaraqalpaqstan Respublikası Joqarǵı Keńesiniń Málimleme xızmeti