Ózbekstan-Qırǵızstan: Qáwipsizlik tarawındaǵı birge islesiw bekkemlenbekte

Tashkentte 17-mart kúni Ózbekstan Respublikası Prezidenti janındaǵı Qáwipsizlik keńesiniń apparatı hám Qırǵız Respublikası Qáwipsizlik keńesi sekretariatı arasındaǵı másláhátlesiwdiń ekinshi dógeregi bolıp ótti. Ózbekstan Respublikası Prezidenti janındaǵı Qáwipsizlik keńesiniń xatkeri Viktor Mahmudov hám Qırǵız Respublikası Qáwipsizlik keńesiniń xatkeri Marat Imankulov basshılıǵında bolıp ótken ilajda mámleketlerimiz arasındaǵı strategiyalıq sheriklik múnásibeti óz-ara isenim hám húrmet, bir-biriniń máplerin esapqa alıw hám konstruktivlik qarım-qatnas principleri tiykarında rawajlanıp atırǵanı atap ótildi. Tárepler mámleketlerimiz basshılarınıń isenimli háreketi sebepli keyingi jılları óz-ara qatnasıqlardı túpkilikli jaqsılawǵa erisilgeni, baylanıslarımız mazmunı jaǵınan bayıp baratırǵanı, kóp tárepleme birge islesiwdi tereńlestiriw ushın bekkem tiykar qoyılǵanın atap ótti. V.Mahmudov sóziniń aldında Qırǵızstan delegaciyasınıń barlıq aǵzaların jaqınlasıp kiyatırǵan Nawrız áyyyamı menen qutlıqlap, Ózbekstan Qırǵızstan menen ásirler dawamında bizdi baylanıstırıp kiyatırǵan qatnasıqlar – jaqsı qońsıshılıq qatnasıǵı ulıwma qádiriyat hám máplerimizdi joqarı qádirleytuǵının atap ótti. Másláhátlesiw waqtında xalıqaralıq terror, ekstremizm, transmilliy jámlesken jınayatshılıq, náshebentlik zatlardıń nızamsız aylanısı sıyaqlı regionallıq qáwipsizlik penen baylanıslı hám basqa da qáwip-qáterlerge qarsı gúres boyınsha birge islesiwdi keńeytiw máseleleri dodalandı.

Ózbekstan – Qırǵızstan shegaraların delimitaciyalaw procesiniń juwmaqlanıwı tariyxıy waqıya ekeni atap ótildi. Wákillikli uyımlardıń birgekliktegi háreketlerin muwapıqlastırıw eki tárepleme hám regionallıq kún tártibine baylanıslı áhmiyetli máselelerdi sheshiwge qaratılǵan birgeliktegi qararlar islep shıǵıw maqsetinde Másláhátlesiwdiń izbe-iz mexanizmin jolǵa qoyıw zárúr ekenligi ayqın tán alındı. – Búgingi qáwip-qáterli dáwirde ushırasatuǵın hesh bir mashqalanı ayırım mámlekettiń ózi erkin sheshe almaydı,-dedi óz gezeginde M.Imankulov. – Sonıń ushın barlıq tarawlar qatarında qáwipsizlik penen baylanıslı máselelerdi sheshiwde de birge islesiw oǵada áhmiyetli. 2019-jılı bolıp ótken másláhátlesiwdiń birinshi dógereginen soń óz-ara baylanıslarımız sezilerli dárejede tereńlesti. Házirgi sóylesiwlerimiz sherikligimizdi jáne de bekkemleydi, degen úmittemiz. Ilaj dawamında tárepler qáwipsizlik tarawındaǵı sheriklikti keńeytiw boyınsha ulıwma baslama hám usınıslardı alǵa qoydı, birgeliktegi jumıslardıń nátiyjeliligin turaqlı arttırıp barıw, paydalanılmaǵan potencialdı júzege shıǵarıw arqalı háreketlerge jańa, jedel pát baǵıshlaw áhmiyetli ekenligin maqulladı. Tárepler konstruktivlik birge islesiwdi bunnan keyin de qollap-quwatlawǵa sadıqlıǵın, qáwipsizlik tarawındaǵı Ózbekstan – Qırǵızstan sherikligin, sonıń ishinde, shártnamalıq-huqıqıy bazanı bekkemlew, birgeliktegi ámeliy háreketler mexanizmin muwapıqlastırıw arqalı rawajlandırıwǵa isenimli tayar ekenligin tastıyıqladı. Ushırasıw juwmaǵında qáwipsizlikti támiyinlew tarawındaǵı birge islesiwdi jáne de keńeytiw hám tereńlestiriwge qaratılǵan anıq baǵdarlar, ilajlar belgilengen Másláhátlesiw protokolına qol qoyıldı.