Respublikamızdıń Qubla rayonları ushın Joqarǵı Keńes Baslıǵınıń jeke qabıllawı bolıp ótti

Insan qádiri ulıǵlanǵan elde hár bir múrájat itibardan shette qalmaydı Búgingi kúnde mámleketimizde insan mápleri joqarı qádiriyat dárejesine kóterilgen bolıp, bunda barlıq ilajlar «Insan qádiri ushın», al, iygilikli ámeller bolsa «Insan mápleri hámme nárseden ústem»-degen princip tiykarında turmısta óz sáwleleniwin tawıp atır. Bunda puqaralardıń mashqalaların úyreniw hám saplastırıw, nızamlı máplerin támiyinlew jolında barlıq ilajlar kórilmekte. Usı jıldıń 4-mart kúni Qaraqalpaqstan Respublikası Joqarǵı Keńesiniń Baslıǵı puqaralardıń múrájatların úyreniw hám olardı saplastırıw maqsetinde aymaqlarda kóshpeli qabıllawların baslaǵan bolıp, respublikamızdıń Arqa hám Arqa-Batıs rayonları puqaralarınıń mashqalaları tıńlanǵan edi. 18-mart kúni Joqarǵı Keńes Baslıǵı Amanbay Orınbaevtıń Beruniy rayonında Tórtkúl, Ellikqala hám Beruniy rayonları puqaraları ushın gezektegi jeke qabıllawı bolıp ótti.

Ótkerilgen qabıllawda óziniń mashqalaları menen kelgen puqaralardıń múrájatları tıńlanıp, ornında sheshim tabıw ilajları kórildi. Puqaralar tárepinen tiykarınan sociallıq qollap-quwatlaw, materiallıq hám medicinalıq járdemler kórsetiw, bilimlendiriw, mektepke shekemgi tálim, bank kreditleri menen baylanıslı mashqalalar, jumıssız puqaralardıń bántligin támiyinlew, isbilermenlik jumısında ushırasıp atırǵan mashqalalar, máhállelerdegi jol, ishimlik suw, gaz máseleleri, turmıslıq, sociallıq mashqalalar boyınsha múrájatlar bildirildi.Aytıp ótiw orınlı, qabıllawda puqaralar tárepinen bildirilgen múrájatlardıń basım kópshiligi ornında unamlı sheshimin taptı, waqıt talap etiletuǵın múrájatlar Qaraqalpaqstan Respublikası Joqarǵı Keńesi Baslıǵınıń jeke qadaǵalawına alınıp, tez pursatta unamlı sheshiw boyınsha tiyisli taraw basshılarına tapsırmalar berildi. Húrmetli Prezidentimiz «Insan qádiri ullı. Ol erteń emes, uzaq keleshekte emes, áyne búgin óz ómirinen razı bolıp jasawı kerek»-dep atap ótken edi. Prezidentimizdiń baslaması hám basshılıǵında ámelge asırılıp atırǵan reformalarınıń turmısta óz sáwlesin tabıwı hám puqaralarımızdıń búgingi turmısınan razı bolıp jasawın támiyinlew maqsetinde olardıń mashqalaların sheshiw boyınsha ilajlar dawam ettiriledi.

Qaraqalpaqstan Respublikası Joqarǵı Keńesiniń Málimleme xızmeti