NAWRÍZ QUTLÍQLAWÍ
2405
Áziz watanlaslar!
Eń dáslep, bársheńizdi, kóp milletli pútkil xalqımızdı janajan Ózbekstanımızǵa, áziz Qaraqalpaqstanımızǵa kirip kelgen Nawrız bayramı menen qızǵın qutlıqlap, eń jaqsı tileklerimizdi bildiremiz.
Húrmetli doslar!
Hámmemiz jaqsı bilemiz, Nawrız tınıshlıqtı, tatıwlıqtı qádirlep, bir-birimizge miyirmanlıq etip, qásterlep jasawǵa shaqıradı.
Tınıshlıq hám tatıwlıqtı, awızbirshilikti saqlasaq, qalǵan nárselerge álbette erisemiz.
Gózzal úlkemizde jasap atırǵan, milleti, tili hám dinine qaramastan, barlıq watanlaslarımız bekkem awızbirshilikte, doslıq, tatıwlıqta Watanımızdıń gúllep jasnawı jolında xızmet etip, birgelikte jasap kelmekte.
Búgingi kúnde «Hár kúniń Nawrız bolsın, janajan Ózbekstanım!» súreni astında bayram saltanatı respublikamız boylap keń túrde dawam etpekte.
Aytıp ótiw kerek, qádirdanlıqtı, húrmet-izzetti tastırıp jiberetuǵın diydarlasıwlar Nawrızdıń keńpeyillik hám jaqsılıq tımsalı ekeniniń jáne bir ayqın mısalı bola aladı. Nawrızdıń janǵa jaǵımlı naması shalınıp, milliy kiyimleri menen átirapqa sán bergen jaslar, aq pátiyası menen bárhama olarǵa tuwrı joldı kórsetip otıratuǵın nuranıylar, qádirli Watanlaslarımız bekkem awızbirshilik penen bayramdı múnásip belgilemekte.
Húrmetli watanlaslar!
Ilayım, kewlimizdegi barlıq jaqsı niyetlerimiz ámelge assın!
Elimiz tınısh, xalqımız aman, awızbirshiligimiz dawamlı bolsın!
Nawrız bayramı bárshemizge múbárek bolsın!
Qaraqalpaqstan Respublikası Joqarǵı Keńesiniń Baslıǵı Amanbay Orınbaev