Búgin Berdaq atındaǵı Qaraqalpaq mámleketlik akademiyalıq muzıkalı teatrında «Máhálle sisteması xızmetkerleri kúni» múnásibeti menen saltanatlı bayram keshesi bolıp ótti. Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev shıǵıp sóylep, jıynalǵanlardı qutlıqladı.

Aytıp ótiw orınlı, húrmetli Prezidentimizdiń “Bárshemiz ushın Watan bir. Bizdi birden-bir, ullı bir maqset birlestiredi. Ol da bolsa, elimiz tınıshlıǵı, Watanımız rawajlanıwı, xalqımız abadanlıǵı” dep atap ótken edi hám óz gezeginde bul iygilikli ideyanı turmısqa engiziw húrmetli máhálle aqsaqalları menen belsendilerine ayrıqsha juwapkershilik júkleydi. Sońǵı jılları elimizde Húrmetli Prezidentimizdiń basshılıǵında xalıqtıń turmıs tárizin jaqsılaw, kem támiyinlengen, járdemge mútáj shańaraqlardı qollap-quwatlaw, orınlardaǵı mashqalalardı unamlı sheshiw, máhálle institutın jetilistiriw, onıń sistemalı jumıs alıp barıwı ushın qolaylı sharayatlar jaratıw boyınsha keń kólemli jumıslar ámelge asırılmaqta. Ótken qısqa dáwir ishinde tarawǵa baylanıslı bir qatar Nızam, Párman hám Qararlardıń qabıl etilgeni bul baǵdardaǵı ilajlar kólemin jańa basqıshlarǵa kóteriwge tiykar bolmaqta. Bul óz gezeginde máhálleni shın mánisinde adamlardıń awırın jeńil etetuǵın strukturaǵa aylandırıwda áhmiyetli orın tutpaqta. «Haqıyqatında-da, búgin puqaralarımız máhálleni ózleriniń jaqın súyenishi hám ǵamxorshısı dep biledi. Sebebi, Húrmetli Prezidentimizdiń máhállelerdegi wákili, puqaralardıń turmıs sharayatların, másele hám mashqalaların eń jaqsı biletuǵın hám olar menen tıǵız islesetuǵın – bul máhálle aqsaqalları sanaladı. Sonlıqtan da máhálle aqsaqallarına húrmet penen qaraw menen birge, olardan úlken juwapkershilik hám ayrıqsha belsendilik talap etiledi. Bunnan tısqarı, hákim járdemshisi, hayal-qızlar belsendisi, jaslar jetekshisi hám profilaktika inspektorı jumıslarınıń jolǵa qoyılǵanı – máhálle institutın jáne de rawajlandırıwda áhmiyetli orın iyeleydi.»-dep atap ótti Joqarǵı Keńes Baslıǵı óz sózinde. Haqıyqatında da, búgingi kúnde máhálle institutınıń jámiyetimizde atqaratuǵın roli artıp barmaqta. Shın mánisinde xalqımız benen tıǵız islesetuǵın jámiyettiń bir buwını sıpatında taraw xızmetkerleri oǵada mashaqatlı, sonıń menen birge maqtanıshlı wazıypanı atqarıp kelmekte. Ótkerilgen saltanatlı ilaj dawamında búgingi bayram múnásibeti menen ózleriniń joqarı nátiyjeleri hám tabısları menen ajıralıp kiyatırǵan bir qatar taraw pidayıları húrmetli Prezidentimizdiń arnawlı Pármanı tiykarında orden hám medallar, sonday-aq, Qaraqalpaqstan Respublikası Joqarǵı Keńesi hám Ózbekstan Respublikası Kámbaǵallıqtı qısqartıw hám bántlik ministrligi tárepinen kókirek belgileri hám Húrmet jarlıqları menen sıylıqlandı.

Ilaj kórkem óner sheberleri tárepinen tayarlanǵan koncert baǵdarlaması menen dawam etti.

Qaraqalpaqstan Respublikası Joqarǵı Keńesiniń Málimleme xızmeti