Múbárek Ramazan ayın múnásip ótkeriw haqqında
1627
Ózbekstan Respublikası Prezidentiniń qararı
Keyingi jılları elimizde «Insan qádiri ushın» degen ideya tiykarında hár bir puqara erkin hám abadan jasaytuǵın Jańa Ózbekstandı qurıw maqsetinde xalqımızdıń ázeliy arzıw-niyetlerine únles halda keń kólemli reformalar alıp barılmaqta. Aldımızǵa qoyǵan bunday ullı wazıypanı ámelge asırıwda biz, bárinen burın, áyyemgi tariyxımız hám bay mádeniyatımızǵa, joqarı adamgershilik principlerin ózinde jámlegen milliy hám diniy qádiriyatlarımızǵa súyeniwimiz tábiyǵıy. Ásirese, el-xalqımız bárqulla ármanlap, úlken quwanısh penen kútip alatuǵın, jámiyetimizde tınıshlıq, doslıq, miyrim-shápáát hám keńpeyillik ortalıǵın bekkemlewge xızmet etetuǵın muqaddes Ramazan ayınıń bul baǵdarda ayrıqsha ornı hám áhmiyeti bar ekenligin atap ótiw zárúr. Pútkil dúnya musılmanları qatarı xalqımız ushın jaqsılıq, saqawat, ullılıq hám shúkirshilik tımsalı bolǵan múbárek Ramazan ayın múnásip kútip alıw hám joqarı dárejede ótkeriw, diniy-aǵartıwshılıq, mádeniy qádiriyatlarımızdı qásterlep saqlaw hám ulıǵlaw maqsetinde: 1. 2023-jıl múbárek Ramazan ayınıń baslanıwı 23-mart kúnine tuwra keliwi haqqındaǵı Ózbekstan musılmanları mákemesiniń málimlemesi maǵlıwmat ushın qabıl etilsin. 2. Qaraqalpaqstan Respublikası Ministrler Keńesi, wálayatlar hám Tashkent qalası hákimlikleri Din isleri boyınsha komitet hám birge islesiwshi shólkemler menen birgelikte Ramazan ayın milliy dástúr hám qádiriyatlarǵa sáykes hám múnásip túrde ótkeriwge baylanıslı ilajlardı ámelge asırsın. Aymaqlarda Ramazan ayınıń mazmun-mánisinde jámlengen adamgershilik, insan qádirin ulıǵlaw, jaqsılıq hám mehir-saqawat sıyaqlı pazıyletlerdi kórsetetuǵın, házirgi kúngi tınısh hám tatıw turmısımızdı qádirlew, shańaraq hám máhállelerde, pútkil elimizde miyrim-shápáát, óz-ara húrmet ortalıǵın bekkemlew, kem támiyinlengen, sociallıq qorǵawǵa mútáj adamlardı hár tárepleme qollap-quwatlawǵa qaratılǵan ilajlardı shólkemlestiriwge ayrıqsha itibar qaratılsın. 3. Ózbekstan Milliy teleradiokompaniyası, Ózbekstan Milliy málimleme agentligi hám basqa da ǵalaba xabar qurallarına Ramazan ayın ótkeriwge baylanıslı ilajlardı keńnen sáwlelendiriw usınıs etilsin. 4. Usı qarardıń orınlanıwın qadaǵalaw Ózbekstan Respublikasınıń Bas ministri A.N.Aripovqa hám Ózbekstan Respublikası Prezidentiniń keńesgóyi M.M.Kamilovqa júklensin.Ózbekstan Respublikası Prezidenti Sh.MIRZIYoEV