Ózbekstan Respublikası Prezidenti Shavkat Mirziyoevtiń Nawrız ulıwmaxalıqlıq bayramına baǵıshlanǵan saltanatlı máresimdegi shıǵıp sóylegen sózi

Assalawma áleykum, áziz watanlaslar! Húrmetli miymanlar! Mine usı gózzal hám tolqıtqan máwritlerde ájayıp «Jańa Ózbekstan» parkinde turıp, siz, qádirdanlarımdı, kóp milletli pútkil xalqımızdı ullı áyyyam – Nawrız bayramı menen qızǵın qutlıqlayman. Búgin sheksiz Watanımızdıń oazis hám oypatları, qala hám awılları, baǵ hám maydanlarında elimiz úlken quwanısh penen Nawrız seyillerin ótkermekte. Kewillerimiz quwanıshqı tolıp turǵan bul gózzal demlerde kekse hám jası kishi watanlaslarımızdı qızǵın qutlıqlap, bársheńizge ózimniń joqarı húrmetim hám eń jaqsı tileklerimdi bildiremen. Shıǵısqa tán jańa jılımız múbárek bolsın! Nawrız bayramınıń qádemi qutlı kelsin! Qádirli doslar! Búgin janajan elimizge gózzallıq, jasarıw hám jańalanıw, mehir hám múriwbet bayramı – Nawrız kirip keler eken, atız-dalalarımız,  baǵ hám jaylawlarımız báhár jawınlarınan jibip, keleshekte mol ónim, qut-bereketten dárek bermekte. Hár bir insan ózin tábiyattıń perzenti ekenin jáne de tereń ańlap atırǵan mine usınday quwanıshlı bayramǵa elimiz benen aman-esen jetkenimiz ushın, bárinen burın Jaratqanǵa sheksiz shúkirler aytamız. Húrmetli bayram qatnasıwshıları! Biz búgin elimizde Jańa Ózbekstandı – insan erkin, azat hám abadan jasaytuǵın jámiyet hám mámleketti qurıw jolında pidákerlik penen miynet etpektemiz. Jańa Ózbekstan ideyası – bul 36 millionlıq úlken xalqımızdıń qararı, onıń ómiriniń mazmunı. Bul iygilikli maqset Nawrız bayramı filosofiyası hám qádiriyatları menen oǵada únles bolıp tabıladı. Insan qádirin ulıǵlaw, hár bir puqaranıń huqıqları, nızamlı máplerin ámelde támiyinlew, barlıq qala hám rayonlar, alıs hám shetki aymaqlar xalqı ushın múnásip sharayat jaratıp beriw, ápiwayı etip aytqanda, xalqımızdı razı etiw – mine, bizlerdiń baslı maqsetimiz. Usı iygilikli jolda ekonomikamız hám sociallıq tarawlardı hár tárepleme rawajlandırıw, ilim, bilimlendiriw hám tárbiya, densawlıqtı saqlaw, mádeniyat hám kórkem óner, salamat turmıs tárizi hám sport, ana tábiyattı qásterlep saqlaw baǵdarlarında baslanǵan úlken baǵdarlamalarımızdı jedel dawam ettiremiz. Turmısımızdı jáne de gózzal hám abat etiwde biz ardaqlı atalar hám apalarımızdan, olardıń dana másláhátleri hám duwa-pátiyalarınan kúsh-quwat alamız. Milliy rawajlanıwımızdı jańa basqıshqa kóteriw jolında mártlik penen miynet etip atırǵan húrmetli aǵa-inilerimiz, áziz apa-qarındaslarımızǵa – pútkil xalqımızǵa isenemiz hám súyenemiz. Bul qutlı bayramda sizlerdiń hár birińizge Watannıń rawajlanıwı jolında islep atırǵan múnásip xızmetińiz ushın qolımdı kóksime qoyıp, qızǵın minnetdarshılıq bildiremen. Siz, ázizler aldımızda turǵan áhmiyetli siyasiy ilajda da joqarı siyasiy erk-ıqrar hám mádeniyatıńızdı kórsetip, erisken jetiskenliklerimiz hám reformalarımızdı isenimli dawam ettiriw ushın bekkem huqıqıy tiykar jaratıwǵa óz úlesińizdi qosasızlar, dep isenemen. Mine, usı biytákirar máwritlerde báhárdiń hár bir kúni, hár bir saatın ǵániymet bilip, atızına jol alıp atırǵan miynetkesh diyqan hám fermerlerimizge jaqsı tileklerimizdi bildiremiz. Búgin úlken arzıw-niyetler menen qatarlarımızǵa kirip kiyatırǵan náwqıran ul-qızlarımızdı – Jańa Ózbekstan jaratıwshıların bárshemiz qızǵın qutlıqlap, olarǵa baxıt hám áwmetler tileymiz. Men bir pikirdi qayta-qayta atıwdan hesh sharshamayman – hár tárepleme salamat hám bárkamal, bilimli hám ǵayratlı jaslarımız eń joqarı shoqqılardı iyelewi ushın biz barlıq imkaniyatlar menen sharayatlardı, álbette, jaratıp beremiz. Áziz perzentlerimiz elimizdiń isenimin aqlap, úlken jetiskenliklerge erisip atırǵanı bárshemizdi sheksiz quwantadı. Kúni keshe futbol boyınsha Ózbekstan jaslar saylandı komandası qızǵın bellesiwlerde bekkem erk-ıqrar hám sheberlik úlgisin kórsetip, Aziya chempionı, degen joqarı abıraylı ataqqa iye boldı. Sonıń menen birge olar Indoneziyada bolıp ótetuǵın jáhán chempionatında qatnasıw huqıqın da qolǵa kirgizdi. Sonıń menen birge, Ózbekstan jasları xokkey boyınsha on segiz jas kategoriyasında barlıq qarsılaslardı artta qaldırıp, Aziya chempionı boldı. Mámleketimiz sport tariyxında dáslepki márte, mine, usınday úlken jetiskenliklerge erisken jas xokkeyshilerimizge hár qansha maqtawlar aytsaq, arzıydı. Ásirese, qábiletli hújimshimiz Jasurbek Rustamxonov bellesiw dawamında on tórt gol urıp, chempionattıń haqıyqıy qaharmanına aylandı. Sonday-aq, elimiz jas shaxmatshılarınıń joqarı intellektuallıq potencialı dúnya boylap tillerde dástan bolmaqta, desek, qáte bolmaydı. Jaqında Tashkentte hayal-qızlar arasında ótkerilgen xalıqaralıq turnirde qábiletli shaxmatshı qızımız Nilufar Yoqubboeva 100 den aslam sırt elli qatnasıwshılar qatnasqan bellesiwde húrmetli ekinshi orındı qolǵa kirgizgenin óz aldına atap ótip aytpaqshıman. Mine, usınday úmit baǵıshlaytuǵın jetiskenlikleri menen jigerli perzentlerimiz elimiz jasları qanday úlken islerge uqıplı ekenin jáne bir márte ayqın kórsetti. Bunday oǵada áhmiyetli jetiskenliklerge jaslarımız ilim, mádeniyat hám kórkem óner, ádebiyat tarawlarında da erisip kelmekte. Usı múnásibet penen jas chempion hám sıylı orın iyelerin, olardıń ustaz hám trenerlerin, ata-anaların, barlıq sport ıqlaspentlerin, pútkil xalqımızdı qızǵın qutlıqlayman. Bul, álbette, azamat jaslarımızdıń elimizge haqıyqıy Nawrız sawǵası boldı. Jańa Ózbekstanǵa álbette, mine usınday jetiskenlikler jarasadı. Jańa Ózbekstanǵa millionlaǵan zamanlaslarına órnek hám úlgi bolatuǵın mine usınday watansúygish, qaharman jaslar kerek. Óz dáwirinde dúnyanı tań qaldırǵan ullı ata-babalarımızdıń múnásip dawamshıları bolǵan bunday jaslarımızdı xalqımız, Watanımız haqılı túrde maqtanısh etedi. Úlken raxmet sizlerge, áziz perzentlerim! Turmıs jollarıńızda bársheńige bárqulla jańa áwmet hám jetiskenlikler yar bolsın! Húrmetli watanlaslar! Mir Áliysher Nawayı babamızdıń dúnya xalqına, biz – áwladlarǵa qarata «Hár kúniń Nawrız bolsın» dep aytqan tileklerin hámmemiz jaqsı bilemiz. Usı mániste, kekselerge húrmet, kishilerge izzet kórsetiw, járdemge mútáj insanlardı qollap-quwatlaw, nawqaslardıń dártine dárman bolıw sıyaqlı xalqımızǵa tán sawaplı ámellerdi tek ǵana Nawrız bayramında emes, al hár kúni, hújdanlı túrde orınlawımız kerek. Búgin biz qurıp atırǵan sociallıq hám xalıqshıl mámlekette miyrim-shápáát, saqawat, óz-ara húrmet hám awızbirshilik turmısız qaǵıydasına aylanıwı zárúr. Men bársheńizdi, bárinen burın, basshı hám juwapkerlerdi bul baǵdarda jáne de belsene hám nátiyjeli háreket etiwge shaqıraman. Ázelden adamgershilik diyarı, dep dańq taratqan Watanımızda hár bir insan xalqımız hám mámleketimizdiń mehri hám itibarın tolıq sezinip jasasın. Qádirli doslar! Bıyılǵı qásiyetli Nawrız pasılı elimizge kóplegen quwanıshlı waqıyalar, qos bayramlardı baslap kelmekte. Usı kúnlerde bárshemiz jáne bir qutlı hám pazıyletli ay – muqaddes Ramazan ayı aldında turmız. Búgingi imkaniyattan paydalanıp, elimiz musılmanların, pútkil islam úmmetin mine usı teberik bayram menen qızǵın qutlıqlayman. Bul iláhiy ayda islenetuǵın iygilikli jumıslarımız qabıl bolıp, jaqsı hám pák niyetlerimiz orınlanıwın tileymen. Házirgi waqıtta mámleketimizde erteń belgilenetuǵın Máhálle sisteması xızmetkerleri kúni menen de bársheńizdi qızǵın qutlıqlayman. Ǵárezsizlik jıllarında Nawrız bayramı úlkemizdegi barlıq millet hám xalıq wákillerin birden-bir, tatıw shańaraq etip birlestiretuǵın doslıq bayramına aylanǵanın biz joqarı qádirleymiz. Bunday siyrek ushırasatuǵın hám biybaha baylıǵımızdı hámiyeshe kózdin qarashıǵınday qásterlep saqlaymız. Tınıshlıq hám keńpeyillik elshisi bolǵan bul bayram – 21-mart Birlesken Milletler Shólkeminiń qararı menen Nawrız kúni sıpatında keńnen belgilenip kiyatırǵanı álbette, bárshemizdi quwandıradı. Pursattan paydalanıp, bizge húrmet kórsetip, búgingi seyil-quwanıshımızda qatnasıp atırǵan sırt mámleketlerdiń húrmetli elshilerin, xalıqaralıq shólkemlerdiń wákillerin qızǵın qutlıqlap, olardıń mámleketleri hám xalıqlarına qızǵın sálem hám jaqsı tileklerimizdi jollaymız. Áziz hám húrmetli watanlaslarım! Bársheńizdi, pútkil xalqımızdı Nawrız ulıwmaxalıqlıq bayramı menen jáne bir márte qutlıqlayman. Náwbáhár pasılı náwbáhár hár bir shańaraq, hár bir máhállege, elimizge tınıshlıq hám abadanlıq, baxıt-ıǵbal alıp kelsin! Barlıq iygilikli jumıslarımızda Jaratqannıń ózi mádet bolsın! Elimiz tınısh, xalqımız aman bolsın! Nawrız bayramı bárshemizge múbárek bolsın!