Tutınıw bazarlarında bahalardıń turaqlılıǵın támiyinlewge baylanıslı qosımsha ilajlar haqqında
1293
Ózbekstan Respublikası Prezidentiniń pármanı
Xalıqtıń satıp alıw qábiletin bekkemlew, tiykarǵı túrdegi azıq-awqat hám tutınıw ónimlerine bolǵan talaptı támiyinlew, tovarlar támiynatınıń globallıq shınjırların diversifikaciyalaw hám inflyaciya dárejesin toqtatıw maqsetinde: 1. 2024-jıl 1-yanvarǵa shekem Ózbekstan Respublikası aymaǵında alıp kiriwde bajıxana bajısınıń nollik stavkası qollanılatuǵın tovarlardıń dizimi 1-qosımshaǵa muwapıq tastıyıqlansın. 2. Ózbekstan Respublikası Prezidentiniń 2022-jıl 31-maydaǵı «Tutınıw bazarlarında bahalardıń turaqlılıǵın támiyinlewge hám monopoliyaǵa qarsı ilajlardıń tásirsheńligin arttırıwǵa baylanıslı qosımsha ilajlar haqqında»ǵı PP-145-sanlı pármanında: 1-bánttegi hám 1-qosımshanıń atalıwındaǵı «2023-jıl 1-iyulge shekem» sózleri «2024-jıl 1-yanvarǵa shekem» sózleri menen almastırılsın; 4-bánttegi «2023-jıl 1-yanvarǵa shekem» sózleri «2024-jıl 1-yanvarǵa shekem» sózleri menen almastırılsın. 3. Ministrler Kabineti (J.Xodjaev) bir ay múddette: mápdar ministrlikler hám uyımlar menen birgelikte azıq-awqat hám awıl xojalıǵı ónimlerin respublika aymaǵına alıp kiriwde mámleketlik qadaǵalawdan ótkeriw procesiniń nátiyjeliligin arttırıw jáne onıń qáwpin tallaw principi tiykarında jolǵa qoyıw; import etiwde bajıxana bajısınıń nollik stavkası qollanılatuǵın kúndelikli tutınıw tovarlarınıń dizimin keńeytiw boyınsha usınıslardı Ózbekstan Respublikası Prezidenti Administraciyasına kirgizsin. 4. Investiciyalar, sanaat hám sawda ministrligi mápdar ministrlikler hám uyımlar menen birgelikte eki ay múddette nızamshılıq hújjetlerine usı pármannan kelip shıǵatuǵın ózgerisler hám qosımshalar haqqında Ministrler Kabinetine usınıslar kirgizsin. 5. Usı pármannıń orınlanıwın qadaǵalaw Bas ministrdiń orınbasarı J.A.Xodjaevqa júklensin.Ózbekstan Respublikası Prezidenti Sh.MIRZIYOEV