Puqaralardıń mashqalalarına sheshim tabıw boyınsha Joqarǵı Keńes Baslıǵınıń jeke qabıllawı bolıp ótti
1238
Húrmetli Prezidentimiz «Biytákirar elimizge, ullı xalqımızǵa sadıqlıq penen xızmet etiw – bárshemizdiń maqtanıshlı hám muqáddes wazıypamız bolıp esaplanadı»-dep atap ótken edi. Haqıyqatında da, insan qádiri ulıǵlanǵan elde hár bir basshı xalqımızdıń búgingi turmısınan razılıǵın támiyinlew, olardıń mashqalalarına sheshim tabıw jolında xızmet etiwi tiyis hám bul iygilikli wazıypanı atqarıw boyınsha búgingi kúnde barlıq zárúrli is-ilajlar ámelge asırılmaqta. Orınlarda ótkerilip atırǵan kóshpeli qabıllawlar sheńberinde 25-mart kúni Qaraqalpaqstan Respublikası Joqarǵı Keńesiniń Baslıǵı Amanbay Orınbaevtıń Kegeyli rayonında Bozataw, Kegeyli hám Nókis rayonları puqaraları ushın gezektegi jeke qabıllawı bolıp ótti.
Qabıllawda óziniń mashqalaları menen kelgen puqaralardıń múrájatları tıńlanıp, ornında sheshim tabıwdıń barlıq ilajları kórildi. Puqaralar tárepinen tiykarınan materiallıq hám medicinalıq járdemler kórsetiw, sociallıq qollap-quwatlaw, bank kreditleri menen baylanıslı máseleler, jaslarǵa ǵamqorlıq kórsetiw, bántlik, turaq-jayın ońlap beriw, máhálleler infrastrukturası menen baylanıslı bir qatar sheshimin kútip turǵan hám isbilermenlik jumısında ushırasıp atırǵan mashqalalar boyınsha múrájatlar bildirildi.
Bolıp ótken qabıllawda kewlinde úmit penen kelgen puqaralardıń bildirilgen múrájatlarınıń basım kópshiligi ornında unamlı sheshimin taptı, waqıt talap etiletuǵın múrájatlar Qaraqalpaqstan Respublikası Joqarǵı Keńesi Baslıǵınıń jeke qadaǵalawına alınıp, tez pursatta unamlı sheshiw boyınsha tiyisli taraw basshılarına tapsırmalar berildi. Qabıllawda sociallıq qollap-quwatlawǵa mútáj, baǵıwshısınan ayırılǵan hám mashqalası sebepli qıynalıp kelgen puqaralardıń máseleleri ornında sheship berildi, óz náwbetinde bul puqaralar mámleketimizde alıp barılıp atırǵan siyasattan, búgingi kúnde ámelge asırılıp atırǵan reformalar hám «Insan qádiri ushın» principi tiykarındaǵı iygilikli, sonıń menen birge ámeliy jumıslardan kewili tolıp, minnetdarshılıqların bildirmekte.
Prezidentimiz basshılıǵında xalqımızdıń turmıs dárejesin jaqsılaw, olardıń kúndelikli ómirinde ushırasıp atırǵan mashqalalarǵa sheshim tabıw, eń baslısı, máselelerin sheship berip búgingi turmısınan razılıǵın támiyinlew baǵdarında jumıslar orınlarda dawam ettirilmekte. Mashqalalardı sheshiwdiń anıq mexanizmleriniń biri bolǵan kóshpeli qabıllawlar Joqarǵı Keńes Baslıǵı tárepinen barlıq orınlarda shólkemlestiriledi.
Qaraqalpaqstan Respublikası Joqarǵı Keńesiniń Málimleme xızmeti