Prezident qararı tiykarında máhállelerdi abat etiw boyınsha jumıslar dawam etpekte

Ózbekstan Respublikası Prezidenti Sh. Mirziyoevtiń 2022-jıl 25-oktyabrdegi «2022-2023-jıllarda máhálleler infrastrukturasın ele de jaqsılaw boyınsha qosımsha is-ilajlar haqqında»ǵı 408-sanlı qararı tiykarında Qaraózek rayonında bir qatar unamlı jumıslar ámelge asırılmaqta. Qarar tiykarında rayon boyınsha 5 máhállede 5 joybardı ámelge asırıw ushın 6,6 mlrd. sumlıq qurılıs ońlaw jumısların alıp barıw belgilengen. Búgingi kúnde 3,4 mlrd. sumlıq qurılıs jumısları juwmaqlanǵan. Sonnan, 3 joybarda 2,8 mlrd sumlıq 11,6 km ishki xojalıq jolların ońlaw rejede belgilenip, búgingi kúnge shekem 1,4 mlrd sumlıq 6,7 km topıraq jollarǵa qum-щeben aralaspasın tósew jumısları juwmaqlandı. Suw obektleri boyınsha 1 joybarda 2,9 mlrd sumlıq 5 km suw tarmaǵın tartıw hám suwdı dushshılandırıwshı stanciyasın qurıw belgilenip, házirgi kúnde 1,2 mlrd. sumlıq jumıs kólemi orınlanǵan hám 4,2 km suw tarmaǵı jańadan tartılǵan. Suwdı dushshılandırıwshı stanciyada qurılıs jumısları dawam etpekte. Sonday-aq, basqa jónelisler boyınsha «Ata mákan» mákan puqaralar jıyını aymaǵında túngi jaqtılandırıw shıraqların ornatıw boyınsha 1 joybarda 840 mln. sumlıq jumıs kólemi orınlanıwı belgilenip, búgingi kúnde 715 mln. sumlıq jumıslar orınlanǵan.

Atap ótiw orınlı, dáslep aymaqlıq jumısshı topar tárepinen xalıqtıń turmıs dárejesine keri tásir etiwshi máseleler úyrenilip, aymaqlar kesiminde 2022-2023-jıllarda máhálleler infrastrukturasın rawajlandırıw boyınsha baǵdarlamalar islep shıǵıldı. Bir ǵana Esimózek awıl puqaralar jıyını mısalında alatuǵın bolsaq, 2400 den aslam xalıq jasawshı aymaq «Abat awıl» mámleketlik baǵdarlamasına kirgizilip, bul tiykarda kóplegen jumıslar ámelge asırıldı. Atap aytqanda, kósheler ońlanıp, olarǵa jaqtılandırıwshı shıraqlar ornatıldı. Jańadan 160 orınlıq balalar baqshası qurılıp, 11-sanlı ulıwma orta bilim beriw mektebinde rekonstrukciya jumısları júrgizildi. Elektr liniyaları jańadan tartılıp, jańa transformatorlar qurıp berildi. Sonday-aq, ótken jılı jıyın orayında burın jabılıp qalǵan shańaraqlıq shıpakerlik punkti qaytadan ashılıp, óz jumısın basladı. APJ orayı, Atalıq hám Qoshqarbay elatlı punktleri tábiyǵıy gazge qayta jalǵandı. 3 elatlı punktke kishi suwdı dushshılandırıwshı stanciyalar qurıp berildi. Sonıń menen birge ishki jollarda ońlaw jumısları dawam etpekte. Xalqımızdıń kúndelikli turmısında ushırasıp atırǵan máhálle infrastrukturası menen baylanıslı mashqalalardı sheshiw boyınsha jumıslar dawam etpekte. Islengen jumıslar xalqımız turmısında óziniń ámeliy tastıyıǵın tawıp atır.  

Qaraqalpaqstan Respublikası Joqarǵı Keńesiniń Málimleme xızmeti