Miynet haqı, pensiyalar hám napaqalardıń muǵdarın arttırıw haqqında

Ózbekstan Respublikası Prezidentiniń Pármanı

  Xalıqtıń turmıs dárejesin arttırıwǵa qaratılǵan is-ilajlardıń dawamlılıǵın támiyinlew hámde puqaralardıń dáramatların arttırıp barıw maqsetinde: 1. 2023-jıl 1-aprelden baslap pensiyalar hám napaqalardıń muǵdarı 7 procentke arttırılsın. 2. 2023-jıl 1-aprelden baslap Ózbekstan Respublikası aymaǵında: pensiyanı esaplawdıń bazalıq muǵdarı – ayına 347 000 sum; jasqa baylanıslı eń kem pensiya muǵdarı – ayına 677 000 sum; mayıplıq pensiyaları, sonnan, miynet stajı tolıq bolmaǵan waqıttaǵı mayıplıq pensiyasınıń eń kem muǵdarı – ayına 747 000 sum; miynetke jaramsız puqaralarǵa beriletuǵın mayıplıq napaqası hám balalıqtan mayıplıǵı bolǵan shaxslarǵa beriletuǵın napaqa muǵdarı – ayına 747 000 sum; 1941–1945-jıllardaǵı urıs aqıbetinde mayıp bolǵan shaxslar hám onıń qatnasıwshıları, sonday-aq, fashistler konclagerleriniń er jetpegen aldınǵı tutqınları hám Leningrad qalası qamal etilgen dáwirde miynet etken shaxslardıń eń kem pensiya muǵdarı ústemelerdi esapqa alǵan túrde – ayına 3 296 000 sum; belgilengen jasqa tiyisli eń kem pensiya muǵdarınan (677 000 sumnan) 747 000 sumǵa shekem pensiya alıwshılardıń jasqa baylanıslı pensiyaları muǵdarı – ayına 747 000 sum; zárúr miynet stajına iye bolmaǵan kekse jastaǵı puqaralarǵa beriletuǵın napaqa muǵdarı – ayına 535 000 sum; miynet stajı tolıq bolmaǵan waqıttaǵı jasqa baylanıslı pensiyanıń eń kem muǵdarı qosımsha tólemdi esapqa alǵan halda – ayına 535 000 sum; ózgelerdiń kútimine mútáj mayıplıǵı bolǵan 18 jasqa shekemgi balalardıń kútimi menen bánt bolǵan balanıń nızamlı wákiline beriletuǵın napaqa muǵdarı – ayına 535 000 sum; baǵıwshısınan ayırılǵanlıq napaqasın alıwshılardıń bir miynetke jaramsız shańaraq aǵzası ushın napaqa muǵdarı – ayına 535 000 sum etip belgilensin hám keyingi hár bir miynetke jaramsız shańaraq aǵzası ushın – 198 000 sumnan qosıp berilsin; baǵıwshısınan ayırılǵanlıq pensiyasın alıwshılardıń bir miynetke jaramsız shańaraq aǵzası ushın pensiyanıń eń kem muǵdarı – ayına 535 000 sum etip belgilensin hám keyingi hár bir miynetke jaramsız shańaraq aǵzası ushın ámeldegi tártipke muwapıq pensiya tólensin. 3. 2023-jıl 1-maydan baslap byudjet mákemeleri xızmetkerleriniń is haqı muǵdarı 7 procentke kóbeytilsin. 4. 2023-jıl 1-maydan baslap Ózbekstan Respublikası aymaǵında: miynetke haqı tólewdiń eń kem muǵdarı – ayına 980 000 sum; bazalıq esaplaw muǵdarı – ayına 330 000 sum etip belgilensin. 5. Belgilep qoyılsın: byudjet mákemeleri xızmetkerleriniń is haqıların arttırıw menen baylanıslı qárejetler – Ózbekstan Respublikasınıń «2023-jıl ushın Ózbekstan Respublikasınıń Mámleketlik byudjeti haqqında»ǵı Nızamına muwapıq is haqı, pensiyalar, stipendiyalar hám napaqa muǵdarın, sonday-aq, ayırım xızmet túrleri boyınsha tariflerdi arttırıw menen baylanıslı qárejetler ushın ajıratılǵan byudjet qarjıları esabınan; pensiyalar hám napaqalar muǵdarların arttırıw menen baylanıslı qárejetler – Mámleketlik byudjet hámde Ekonomika hám qarjı ministrligi janındaǵı byudjetten tısqarı Pensiya fondı qarjıları esabınan qaplanadı. 6. Usı párman talapların orınlaw ushın talap etiletuǵın qosımsha qarjılar Ózbekstan Respublikasınıń respublika byudjeti qárejetlerin arttırıw esabınan qarjılandırılsın. Jumıs beriwshilerge is haqı muǵdarın nızamshılıq hújjetlerinde belgilengen miynetke haqı tólewdiń eń kem muǵdarınan kem bolmaǵan túrde tólewdi támiyinlep, is haqı muǵdarın miynetke haqı tólewdiń eń kem muǵdarına muwapıq arttırıw usınıs etilsin. 7. Ekonomika hám qarjı ministrligi: Ózbekstan Milliy málimleme agentligi, Ózbekstan Milliy teleradiokompaniyası, Málimleme hám ǵalaba kommunikaciyalar agentligi menen birgelikte usı Pármannıń maqseti, wazıypaları hám onnan kútilip atırǵan nátiyjelerdi ǵalaba xabar quralları hám Internet hám sociallıq tarmaqlarda keń sáwlelendiriw jumısların shólkemlestirsin; mápdar ministrlik hám mákemeler menen birgelikte eki ay múddette nızamshılıq hújjetlerine usı Pármannan kelip shıǵatuǵın ózgerisler hám qosımshalar haqqında Ministrler Kabinetine usınıslar kirgizsin. 8. Usı pármannıń orınlanıwın nátiyjeli shólkemlestiriwge jeke juwapker etip ekonomika hám qarjı ministri Sh.D. Kudbiev belgilensin. Pármannıń orınlanıwın dodalap barıw, orınlaw ushın juwapker shólkemlerdiń jumısların muwapıqlastırıw hám qadaǵalaw Bas ministr orınbasarı J.A. Qwchqorovqa júkletilsin.  

Ózbekstan Respublikası Prezidenti                   Sh. Mirziyoev