Mámleketlik aktivlerdi basqarıw agentliginiń jumısın nátiyjeli shólkemlestiriw ilajları haqqında
1287
Ózbekstan Respublikası Prezidentiniń qararı
Ózbekstan Respublikası Prezidentiniń 2023-jıl 25-yanvardaǵı «Respublika atqarıw hákimiyatı uyımlarınıń jumısın nátiyjeli jolǵa qoyıwǵa baylanıslı birinshi gezektegi shólkemlestiriw ilajları haqqında»ǵı PP-14-sanlı Pármanınıń orınlanıwın támiyinlew maqsetinde: 1. Tómendegiler: Mámleketlik aktivlerdi basqarıw agentligi jumısınıń tiykarǵı baǵdarları 1-qosımshaǵa muwapıq; Mámleketlik aktivlerdi basqarıw agentligi sisteması shólkemlerin qayta tiklew boyınsha ilajlar rejesi 2-qosımshaǵa muwapıq; Mámleketlik aktivlerdi basqarıw agentliginiń shólkemlestiriw strukturası 3-qosımshaǵa muwapıq; Mámleketlik aktivlerdi basqarıw tarawında reformalardı tereńlestiriw hám sistemanıń jumısın transformaciyalaw boyınsha «jol kartası» 4-qosımshaǵa muwapıq; «Mámleketlik múlk» málimleme sistemasına integraciyalanatuǵın ministrlik hám uyımlardıń málimleme sistemalarınıń dizimi 5-qosımshaǵa muwapıq tastıyıqlansın. 2. 2023-jıl 1-maydan baslap, mámleketlik múlk esabın júrgiziw, onıń tolıqlıǵı hám durıslıǵın támiyinlewdiń tómendegi tártibi engizilsin: respublika múlki bolǵan mámleketlik kóshpes múlkler hám mámleketlik akciya paketleri (úlesleri) Mámleketlik aktivlerdi basqarıw agentligine ótkeriledi, oǵan Strategiyalıq reformalar agentligi, Tikleniw hám rawajlanıw qorına tiyisli úlesler sonday-aq, Ózbekstan Respublikası Prezidentiniń qararlarında názerde tutılǵan jaǵdaylar kirmeydi; mámleketlik mákemeler hám mámleket qatnasıwındaǵı kárxanalardı shólkemlestiriw, sonday-aq, mámleketlik úlestiń payda bolıwı hám muǵdarınıń ózgeriwi menen baylanıslı shólkemlestiriw hújjetlerine kirgiziletuǵın ózgerislerdi mámleketlik dizimnen ótkeriw Davaktiv agentliginiń tiyisli buyrıǵı bar bolǵanda ámelge asırıladı; mámleketlik kóshpes múlk obekti hám bos jer uchastkaları tiykarında ámelge asırılatuǵın mámleketlik-jeke menshik sheriklik joybarları haqqındaǵı maǵlıwmatlar mámleket sherigi tárepinen tiyisli kelisim dúzilgennen soń on kún múddette «Mámleketlik múlk» málimleme sistemasına kirgiziledi; ministrlik hám uyımlar, jergilikli mámleketlik hákimiyat uyımlarınıń mámleketlik kóshpes múlki tiykarında investiciyalıq joybarlardı ámelge asırıw hám olardı alıw sonday-aq, mámlekettiń qatnasındaǵı kárxanalar hám olardıń sistemasındaǵı kárxanalarǵa úshinshi shaxslar tárepinen investiciya kirgiziwge baylanıslı kelisimleri (kelisim, shártnama, memorandumlar) boyınsha májbúriy tártipte Mámleketlik aktivlerdi basqarıw agentliginiń juwmaǵı alınadı. 3. 2023-jıl 1-iyulden baslap mámlekettiń qatnasındaǵı kárxanalarda zamanagóy korporativ basqarıw sistemasın engiziw, olardıń jumıs nátiyjeliligin arttırıw hám divident siyasatın jetilistiriw maqsetinde: mámleket qatnasındaǵı kárxanalardıń basshısı hám onıń orınbasarların tayınlaw (saylaw) tańlaw tiykarında ámelge asırılatuǵını, oǵan Ózbekstan Respublikası Prezidentiniń qararlarında názerde tutılǵan jaǵdaylar kirmeytuǵını; mámleket qatnasındaǵı kárxanalardıń jumısı haqqındaǵı nızamshılıq hújjetlerinde belgilengen maǵlıwmat «Mámleketlik múlk» málimleme sistemasına óz waqıtında berilmegende olardıń atqarıw uyımı basshılarınıń xoshametleniwine jol qoyılmaytuǵını; mámleket úlesi boyınsha divident muǵdarı kárxananıń investiciyalıq joybarları, biznes-reje kórsetkishleri hám qarjı jaǵdayınan kelip shıqqan halda mámleket qatnasındaǵı kárxanalardıń mámleketlik úlesi boyınsha saylanǵan baqlaw keńesi aǵzaları tárepinen Mámleketlik aktivlerdi basqarıw agentligi menen kelisilgen halda akcionerler (qatnasıwshılar)diń ulıwmalıq májilisine usınıs etiletuǵını belgilensin. 4. 2023-jıl 1-iyulden baslap, mámleketlik uyımlar hám mákemeler, mámleket qatnasındaǵı kárxanalar hákimshilik imaratlarınan xızmetkerler ushın belgilengen normadan kelip shıǵıp, nátiyjeli paydalanıw tártibi engizilsin. Onda, mámleketlik uyımlar hám mákemeler, mámleket qatnasındaǵı kárxanalardıń hákimshilik imaratlarında kommerciyalıq shólkemlerdi «nol»lik stavkada yamasa tikkeley jaylastırıwǵa jol qoyılmaydı, bul imaratlardıń bos maydanları ijaraǵa beriw ushın elektron onlayn-aukcion sawdalarına shıǵarıladı hám ijara shártnamaları salıq uyımlarınıń «E-ijara» elektron sistemasında dizimnen ótkeriledi. 5. Mámleketlik aktivler, olardı basqarıw hám menshiklestiriw haqqında jámiyetshilikti xabardar etiwdiń tómendegi jańa sisteması engizilsin: mámleketlik kóshpes múlk obektleri, mámleketlik úles, mámleketlik unitar kárxanalar hám mámleketlik mákemeler sonday-aq, olarǵa tiyisli avtotransport quralları haqqındaǵı maǵlıwmatlar Mámleketlik aktivlerdi basqarıw agentliginiń rásmiy veb-saytında real waqıt rejiminde járiyalanadı, nızamshılıqta belgilengen jaǵdaylar oǵan kirmeydi; mámleket qatnasındaǵı kárxanalardıń ekonomikadaǵı ornı hám úlesi, qarjı nátiyjeleri, biznes-reje kórsetkishleriniń orınlanıwı hám basqa da áhmiyetli málimlemelerdi óz ishine alatuǵın mámleket qatnasındaǵı kárxanalardıń toplanǵan esabatı hár jılı 1-avgustqa shekem Mámleketlik aktivlerdi basqarıw agentliginiń rásmiy veb-saytında járiyalanadı; 2023-jıl 1-oktyabrge shekem «Mámleketlik múlk obektleri menen sawdalardı ótkeriw haqqındaǵı maǵlıwmatlardı jaylastırıw portalı» jaratıladı, onda barlıq mámleketlik múlk obektlerin sawdaǵa shıǵarıw hám onıń nátiyjeleri haqqındaǵı málimlemeler jaylastırıladı sonday-aq, bul sistema salıq uyımlarınıń málimleme sistemasına integraciyalanadı. 6. «E-auksion» elektron sawda platformasında: jeke menshik múlk iyeleriniń buyırtpasına tiykarlanıp olardıń múlklerin ápiwayılastırılǵan tártip hám múddetlerde satıw boyınsha sawdalar ótkeriletuǵını; 2023-jıl 1-sentyabrden baslap mámleket qatnasındaǵı kárxanalardıń bos pul qarjıların depozitke jaylastırıw boyınsha kommerciyalıq bankler arasında procent artıp barıw tárizinde bank kapitalınıń jeterli ekenligi, bank kapitalınıń onıń minnetlemelerine qatnası, likvidlik koefficienti sıyaqlı shártlerdi názerde tutqan halda aukcion sawdaları ótkeriletuǵını belgilensin. 7. Usı qarardıń orınlanıwın qadaǵalaw Ózbekstan Respublikasınıń Bas ministri A.N.Aripovqa júklensin.Ózbekstan Respublikası Prezidenti Sh.MIRZIYoEV