Ekonomikada mámlekettiń qatnasın qısqartıwdıń qosımsha ilajları haqqında
1532
Ózbekstan Respublikası Prezidentiniń qararı
Keyingi jıllarda ekonomikada mámlekettiń qatnasın qısqartıw, mámleketlik aktivlerdi menshiklestiriw arqalı jeke menshik múlkshilikti keńeytiw, nátiyjesiz jumıs alıp barıp atırǵan hám perspektivasız kárxanalardı saplastırıw boyınsha sistemalı reformalar ámelge asırılmaqta. Atap aytqanda, keyingi úsh jılda ustav fondında mámleketlik úlesi bar 300 ge shamalas xojalıq jámiyetleri hám mámleketlik unitar kárxanaları (keyingi orınlarda – mámleket qatnasıwındaǵı kárxanalar) hám 1 600 den aslam kóshpes múl obektleri menshiklestirildi, 650 den aslam kárxanalar saplastırıldı hám 160 i qayta shólkemlestirildi. Jeke menshik sektor tabıslı jumıs alıp barıp atırǵan hám báseki rawajlanǵan tarawlarda mámlekettiń qatnasın jáne de qısqartıw maqsetinde: 1. Mámleketlik aktivlerdi basqarıw agentligi (keyingi orınlarda – Mámaktiv agentligi) tárepinen Qaraqalpaqstan Respublikası Ministrler Keńesi, wálayatlar hám Tashkent qalası hákimlikleri, ministrlikler hám uyımlar, mámleket qatnasıwındaǵı kárxanalar menen birgelikte 30 mıńnan aslam mámleketlik mákemeler, mámleket qatnasıwındaǵı kárxanalar jáne olardıń sistema kárxanaları hám kóshpes múlk obektleri tallanıp, olardı qısqartıw boyınsha usınıs islep shıǵılǵanı maǵlıwmat ushın qabıl etilsin. Tómendegiler: ǵalabalıq sawdalar arqalı tolıqlıǵınsha satılatuǵın 1 001 kárxananıń akciya paketleri (úlesleri)niń dizimi 1-qosımshaǵa muwapıq; akciya paketleri «bir akciya – bir lot» principi tiykarında xalıq IPOsın ótkeriw tártibinde ǵalabalıq sawdalar arqalı satılatuǵın 40 kárxanalar dizimi 1a-qosımshaǵa muwapıq; ǵalabalıq sawdalar arqalı satılatuǵın 1 046 mámleketlik hám mámleket qatnasıwındaǵı kárxanalardıń kóshpes múlk obektleriniń dizimi 2-qosımshaǵa muwapıq; municipal múlk obektlerin belgilew normaları 3-qosımshaǵa muwapıq tastıyıqlansın. 2. Usı qararǵa 1a-qosımshadaǵı mámleketlik akciya paketlerin satıw sheńberinde: eń jaqsı usınıslardı tańlap alıw tiykarında professional shólkemler sawda processlerin shólkemlestiriw ushın tartılıwı múmkin ekenligi; jergilikli investorlarǵa «E-auksion» elektron sawda platforması, sonıń ishinde, mobil qosımshası arqalı real waqıt rejiminde olardı identifikaciyalaw, investiciya dáldálshileri menen shártnama dúziw hám depo esapbetin ashıw imkaniyatı jaratıladı; akciyalardı satıp alıwda «E-auksion» elektron sawda platformasında barlıq investiciya dáldálshileri hám olardıń qarıydarları qatnasıwı ushın teń sharayatlar jaratılatuǵını; akciyalardı satıp alıw ushın elektron arzalar jergilikli investordıń ózi tárepinen yamasa investorlar atınan háreket etetuǵın investiciya dáldálshisi arqalı beriliwi múmkin ekenligi; onlayn aukcionlardıń juwmaqlarına bola aldı-sattı shártnamaları bahalı qaǵazlar sawdaları shólkemlestiriwshileriniń sawda maydanshalarınan tısqarıda dizimnen ótkeriletuǵını hám onıń nátiyjesi haqqındaǵı maǵlıwmat investordıń jeke kabinetine jiberiletuǵını belgilensin. 3. Mámleketlik múlkti satıwda tender sawdaların ótkeriw boyınsha mámleketlik komissiya Mámleketlik aktivlerdi menshiklestiriw processlerin muwapıqlastırıw mámleketlik komissiyası dep qayta atalsın hám onıń jańalanǵan quramı 4-qosımshaǵa muwapıq tastıyıqlansın. Mámleketlik akvtivlerdi menshiklestiriw hám menshiklestiriw processlerin muwapıqlastırıw mámleketlik komissiyası (A.Aripov): eki hápte múddette usı qararǵa 1-, 1a- hám 2-qosımshalardaǵı aktivlerdi 2023-jılı sawdaǵa shıǵarıw grafiklerin tastıyıqlasın; aktivlerdi sawdaǵa shıǵarıwda, zárúrlik bolǵanda olardıń ámeldegi jumıs baǵdarın saqlap qalıw yamasa negizinde belgili bir baǵdardaǵı jumıstı shólkemlestiriw sıyaqlı shártlerdiń belgileniwin esapqa alsın; bir ay múddette 1a-qosımshada belgilengen kárxanalardıń akciyaların xalıq IPOsın ótkeriw tiykarında satıw tártibin tastıyıqlasın. 4. Mámaktiv agentliginiń «Elektron onlayn-aukcionların shólkemlestiriw» AJ hám «Bahalı qaǵazlardıń oraylıq depozitariysi» AJnıń keminde 10 procent akciyaların jergilikli fond bazarında xalıq IPOsın ótkeriw arqalı ǵalabalıq jaylastırıw haqqındaǵı usınısı maqullansın. 5. a) fond birjasına shıǵarılǵan mámleketlik akciya paketlerin satıwǵa hám aldı-sattı shártnamasın rásmiylestiriwge tek ǵana sawda processlerinde keminde eki qatnasıwshı qatnasqanda ruxsat beriletuǵını; b) barlıq mámleketlik mákemelerdiń tiykarǵı quralların satıw yamasa ijaraǵa beriw «E-auksion» elektron sawda platforması arqalı ámelge asırılatuǵını; v) 2023-jıl 1-iyuldan baslap, fizikalıq táreplerge «Mámleketlik múlk» málimleme sisteması arqalı maydanı 2 000 metr kvadratqa shekemgi mámleketlik kóshpes múlk obektlerin menshiklestiriw yamasa ijaraǵa beriw ushın tikkeley onlayn aukcion sawdalarına shıǵarıw boyınsha arza beriw huqıqı beriletuǵını; g) 2023-jıl 1-sentyabrden baslap: kóshpes múlk obektleri hám mámleket úlesleri menshiklestirilgeni haqqındaǵı mámleketlik úlgidegi order hám sertifikat Mámleketlik xızmetler orayları hám (yamasa) Birden-bir interaktiv mámleketlik xızmetler portalı (keyingi orınlarda – BIMXP) arqalı QR-kod qoyılǵan halda beriletuǵını; onlayn aukcion sawdalarında mámleketlik múlk obektlerin satıp alǵan qarıydarlar menen shártnamalar sawda nátiyjesi boyınsha protokol tiykarında «E-auksion» elektron sawda platformasında elektron tárizde (sonıń ishinde, elektron sanlı qoltańba arqalı) rásmiylestiriletuǵını; hár sherekte tiyisli ministrlikler hám uyımlar xızmetkerleriniń ornına shıqqan halda investiciya minnetlemeleriniń orınlanıwın aralıq monitoring etiw tártibi biykar etiletuǵını; investiciyalıq minnetlemelerdiń orınlanıwı haqqındaǵı esabatlardı qaǵaz formasında usınıw tártibi biykar etilip, tiyisli mámleketlik uyımlar hám shólkemlerdiń elektron bazasın «Mámleketlik múlk» málimleme sistemasına integraciyalaw isbilermenler elektron sistemaǵa kirgizetuǵın maǵlıwmatlar arqalı esabatlardı alıw jolǵa qoyılatuǵını belgilensin. 6. Ministrler Kabineti: a) eki hápte múddette saplastırılatuǵın hám qayta shólkemlestiriletuǵın mámleket qatnasıwındaǵı kárxanalar hám mámleketlik mákemelerdiń dizimi; b) úsh ay múddette usı qararǵa 3-qosımshaǵa muwapıq municipal múlk obektlerin belgilew normaların esapqa alıp: Ózbekstan Respublikası Húkimetiniń qararlarına tiykarlanıp qaramaǵına ótkeriletuǵın respublikalıq múlklerdi esapqa alıp: Ózbekstan Respublikası Húkimetiniń qararlarına tiykarlanıp qaramaǵına ótkeriletuǵın respublika múlkleriniń dizimi; Qaraqalpaqstan Respublikası Joqarǵı Keńesi, xalıq deputatları wálayatlıq hám Tashkent qalalıq Keńesleri jáne olar menen kelisilgen halda Qaraqalpaqstan Respublikası Ministrler Keńesiniń Baslıǵı, wálayatlar hám Tashkent qalası hákimleri tárepinen qaramaǵına ótkeriletuǵın mámleketlik múlk obektleriniń dizimi tastıyıqlanıwın támiyinlesin. 7. Básekini rawajlandırıw hám tutınıwshılardıń huqıqların qorǵaw komiteti Mámaktiv agentligi menen birgelikte usı qararǵa 1-qosımshada keltirilgen kárxanalarǵa berilgen eksklyuziv huqıqlardı xatlawdan ótkerip, olardı biykarlaw boyınsha usınıslar kirgizip barsın. 8. Mámaktiv agentligi Ekonomika hám qarjı ministrligi, Qaraqalpaqstan Respublikası Ministrler Keńesi, wálayatlar hám Tashkent qalası hákimlikleri menen birgelikte 2023-jıl 1-sentyabrge shekem mámleket ıqtıyarındaǵı dem alıw parklerin xatlawdan ótkerip, olardıń jumısın túp-tiykarınan jetilistiriw boyınsha Ministrler Kabinetine usınıs kirgizsin. Onda, aymaqlardaǵı barlıq mámleketlik dem alıw parkleriniń tiyislisinshe Qaraqalpaqstan Respublikası Ministrler Keńesi, wálayatlar hám Tashkent qalası hákimlikleri janında mámleketlik mákeme túrinde «Dem alıw parklerin basqarıw direkciyaları»n shólkemlestirgen halda olarǵa ótkeriletuǵını názerde tutılsın. 9. Mámaktiv agentligi (A.Ortiqov): a) 2023-jıl 1-iyunǵa shekem maydanı 2 000 metr kvadratqa shekemgi mámleketlik kóshpes múlk obektlerin fizikalıq táreplerdiń arzaları boyınsha menshiklestiriw yamasa ijaraǵa beriw ushın tikkeley onlayn-aukcion sawdalarına shıǵarıw tártibin tastıyıqlasın; b) tómendegilerdi: 2023-jıl 1-iyulǵa shekem respublika múlki hám hákimshilik-aymaqlıq strukturalar múlki (municipal múlk) obektlerin basqarıw haqqındaǵı qarar joybarın; 2023-jıl 1-avgustqa shekem Ádillik ministrligi menen birgelikte Mámleketlik turaq jay fondına qaraslı turaq jaydaǵı kvartiraǵa (turaq jaydıń bir bólegine) múlk huqıqın tán alıw wákilligin jergilikli hákimliklerge ótkeriwdi názerde tutqan halda, Mámleketlik turaq jay fondına qaraslı turaq jaydaǵı kvartiranı (turaq jaydıń bir bólegin) menshiklestiriw boyınsha birden-bir mámleketlik xızmetlerdi kórsetiw boyınsha hákimshilik reglament joybarın; úsh ay múddette mápdar ministrlikler hám úyımlar menen birgelikte nızamshılıq hújjetlerine usı qarardan kelip shıǵatuǵın ózgerisler hám qosımshalar haqqındaǵı usınıslardı Ministrler Kabinetine kirgizsin. 10. Usı qarardıń orınlanıwın qadaǵalaw Ózbekstan Respublikasınıń Bas ministri A.N.Aripovqa júklensin.Ózbekstan Respublikası Prezidenti Sh.MIRZIYOEV