Qaraqalpaqstannıń alıs aymaqları jańasha túske enip barmaqta

Eń áhmiyetli mashqalalardı saplastırıwǵa qaratılǵan ámeliy jumıslar respublikamız aymaǵında qızǵın pátlerde dawam etpekte. Xalqımızdıń uzaǵın jaqın, awırın jeńil etetuǵın jollardı ońlaw, taza ishimlik suwı hám gaz tarmaǵın tartıw, elektr energiyasın jaqsılaw, mektep hám baqsha, medicina punktlerin qurıw boyınsha alıp barılıp atırǵan keń kólemli jumıslar húrmetli Prezidentimizdiń jeke qadaǵalawına alınǵan. Atap aytqanda, Bozataw rayonı aymaǵında ishki xojalıq jolların ońlaw, ishimlik suwı hám aqaba suw támiynatı obektlerin jańalaw baǵdarında 6 joybar boyınsha 8,6 mlrd. sum qarjı ajıratılǵan bolıp, sonnan búgingi kúnde 6,3 mlrd. sum jumıs kólemi juwmaqlandı.Ishki xojalıq jolların ońlaw boyınsha 4 obektte 4 mlrd sumlıq 15,3 km topıraq jollarǵa qum-щeben aralaspası tóseliwi rejede belgilenip, jumıslar baslap jiberilgen edi. Házirgi kúnde 2,6 mlrd sumlıq 11,3 km jollarda qurılıs ońlaw jumısları alıp barıldı. Sonıń menen xalqımızǵa eń kerekli bolǵan tirishilik deregi ishimlik suwı tarmaqların jaqsılaw ushın 4,6 mlrd. sum ajıratılıp, 21 km suw tarmaǵın jańalaw belgilep alınǵan bolıp, búgingi kúnge kelip 3,7 mlrd. sumlıq 11,4 km suw tarmaǵı tartıldı.Bul jumıslardıń barlıǵı Ózbekstan Respublikası Prezidentiniń 2022-jıl 25-oktyabr sánesindegi PQ-408-sanlı «2022-2023-jıllarda máhálleler infrastrukturasın ele de jaqsılaw boyınsha qosımsha is-ilajlar haqqında»ǵı qararına tiykar alıp barılmaqta.

Qaraqalpaqstan Respublikası Joqarǵı Keńesiniń Málimleme xızmeti