Agrar sektordı zamanagóy awıl xojalıǵı texnikaları menen támiyinlewdi xoshametlewdiń qosımsha ilajları haqqında

Ózbekstan Respublikası Prezidentiniń qararı

Awıl xojalıǵı ónimlerin jetistiriwde zárúr agrotexnikalıq ilajlardı óz waqtında hám sapalı ámelge asırıw, agrar sektorda awıl xojalıǵı texnikasına bolǵan talaptı qanaatlandırıw, awıl xojalıǵı kárxanaların ruwxıy hám fizikalıq jaqtan eskirgen texnikalardıń ornına zamanagóy hám resurstı únemleytuǵın texnikalar menen támiyinlewdi xoshametlew sistemasın jetilistiriw maqsetinde: 1. Ózbekstan Respublikasında islep shıǵarılǵan awıl xojalıǵı texnikalarınıń satıp alıwın mámleket tárepinen qollap-quwatlawdıń tómendegi birden-bir tártibi 2023-jıl 1-aprelden baslap engizilsin: Ózbekstan Respublikası Prezidentiniń 2021-jıl 11-noyabrdegi «Shırshıq qalasında awıl xojalıǵı mashina qurılısı klasterin dúziw ilajları haqqında»ǵı PQ-7-sanlı qararında názerde tutılǵan subsidiyalar barlıq jergilikli awıl xojalıǵı texnikasın islep shıǵaratuǵın kárxanalarǵa engiziledi; awıl xojalıǵı kárxanaları hám isbilermenlik subektleri tárepinen ornatılǵan tártipte qáliplestiriletuǵın dizim boyınsha sırt elden alıp kelinetuǵın barlıq túrdegi awıl xojalıǵı texnikaları hám agregatları jáne olardıń komplektlewshi hám awısıq bólekleri, burınǵısınan basqasha tárizde, 2025-jıl 1-yanvarǵa shekem bajıxana tólemlerinen (qosımsha qun salıǵı hám bajıxana rásmiylestiriwi jıyımlarınan tısqarı) hám utilizaciya jıyımınan azat etiledi hám isbilermenlik subektlerine erkin aylanısqa shıǵarıw (import) bajıxana rejimine jaylastırılǵan sáneden baslap qosımsha qun salıǵın 270 kúnge shekemgi múddetke keshiktirip tólewge ruxsat beriledi; xalıqaralıq finans institutları tárepinen lizing kompaniyalarına ajıratılǵan qarjılar sheńberinde ózin-ózi bánt etken shaxslar hám jeke tártiptegi isbilermenlerge awıl xojalıǵı texnikasın hám agregatlardı lizingke beriwge ruxsat etiledi; 2. 2023-2024-jıllarda awıl xojalıǵı texnikasın satıp alıwdı qarjılandırıw ushın jámi 2,6 trillion sum qaratılsın, sonnan: Ózbekstan Respublikası Prezidentiniń 2022-jıl 28-iyuldaǵı PQ-335-sanlı qararına tiykarlanıp Ekonomika hám qarjı ministrligi tárepinen awıl xojalıǵı texnikaların satıp alıw ushın kommerciyalıq banklerge jaylastırılǵan 100 million AQSh dollarınan 2022-jılı ózlestirilmey qalǵan 670 milliard sum (59 million AQSh dolları) muǵdarındaǵı qarjı texnika satıp alıwı ushın 10 procent stavkada 10 jılǵa kredit ajıratıw ushın; 800 milliard sum (70 million AQSh dollar) – xalıqaralıq finans institutlarınıń qarjıları esabınan awıl xojalıǵı texnikaların satıp alıw ushın lizing shólkemlerine jaylastırıw esabınan; 1,1 trillion sum (100 million AQSh dollar) – xalıqaralıq finans institutları qarjıları esabınan awıl xojalıǵı texnikaların satıp alıw ushın kommerciyalıq banklerge jaylastırıw esabınan. Onda: xızmet kórsetetuǵın kommerciyalıq bankler tárepinen lizing shólkemlerine kredit ajıratılıwında girew támiynatı sıpatında lizingke beriletuǵın texnikalar hám qamsızlandırıw polisiniń qabıl etiliwi múmkin; xalıqaralıq finans institutlarınan tartılǵan qarjılar esabınan qarıydarlarǵa awıl xojalıǵı texnikaları lizing marjası jıllıq 3 procentten artpaǵan stavkada 10 jılǵa shekemgi múddetke Awıl xojalıǵı ministrliginiń buyırtpası tiykarında lizingke beriledi. 3. Kommerciyalıq banklerge lizing kompaniyalarına awıl xojalıǵı texnikaların jetkerip beriw ushın qarız qarjıların girew támiynatı sıpatında satıp alınatuǵın awıl xojalıǵı texnikasın, kredittiń pútkil dáwiri ushın qarız qarjıların qaytarmaw qáwiplerinen 100 procent girew sıpatında qamsızlandırıw polisin yamasa úshinshi shaxslardıń kepilligin qabıllaw arqalı ajıratıw usınıs etilsin. Oraylıq bank Ekonomika hám qarjı ministrligi menen birgelikte on kún múddette kommerciyalıq bankler tárepinen girew támiynatı sıpatında qabıl etiletuǵın qamsızlandırıw kompaniyaları tárepinen usınılatuǵın qarız qarjıların qaytarmaw qáwiplerinen qamsızlandırıw polisi (shártnaması)niń úlgi formasın islep shıǵıp, ámeliyatqa engizsin. Ekonomika hám qarjı ministrligi eki ay múddette qamsızlandırıw bazarın jetilistiriw, qáwip-qáterlerdi durıs bahalaw, ásirese, byudjet qarjıları esabınan qarjılandırıw ushın resurslar esabınan kreditlerge qamsızlandırıw operaciyaları ústinen prudencial qadaǵalawdı kúsheytiw boyınsha usınıs kirgizsin. 4. Awıl xojalıǵı ministrligi hám Investiciyalar, sanaat hám sawda ministrligi hár jılı 1-oktyabrge shekem jergilikli hám dúnyanıń jetekshi islep shıǵarıwshıların tartqan halda keyingi jıl ushın awıl xojalıǵı texnikaların jetkerip beriwdiń maqsetli parametrlerin islep shıǵıp, Ekonomika hám qarjı ministrligine usınılıwın támiyinlesin. Ekonomika hám qarjı ministrligi hár jılı usınılatuǵın awıl xojalıǵı texnikaların jetkerip beriwdiń maqsetli parametrleri hám jetkerip beriletuǵın awıl xojalıǵı texnikalarınıń túrlerinen kelip shıǵıp, awıl xojalıǵı texnikasın lizing shártlerinde jetkerip beriwdiń qarjılandırıw dáreklerin olardı ajıratıw dáwirleri kesiminde qáliplestirsin hám Qordan qarjılar ajıratılıwın támiyinlesin. 5. Ózbekstan Respublikası Prezidentiniń hám Ózbekstan Respublikası Húkimetiniń ayırım qararları qosımshaǵa muwapıq 2023-jıl 1-aprelden óz kúshin joyıtqan dep eaplansın. 6. Awıl xojalıǵı ministrligi mápdar ministrlikler hám uyımlar menen birgelikte nızamshılıq hújjetlerine usı qarardan kelip shıǵatuǵın ózgerisler hám qosımshalar haqqında Ministrler Kabinetine usınıslar kirgizsin. 7. Usı qarardıń orınlanıwın nátiyjeli shólkemlestiriwge juwapker hám jeke juwapker etip Bas ministrdiń orınbasarı J.A.Qwchqorov, ekonomika hám qarjı ministri Sh.D.Kudbiev hám awıl xojalıǵı ministri A.B.Voitov belgilensin. Qarardıń orınlanıwın dodalap barıw, orınlaw ushın juwapker uyımlardıń jumısın muwapıqlastırıw hám qadaǵalaw Ózbekstan Respublikasınıń Bas ministri A.N.Aripovqa júklensin.  

Ózbekstan Respublikası Prezidenti            Sh.MIRZIYOEV