Kegeylishi hayal-qızlar zamanagóy kárxanada jumıslı boldı

Ózbekstan Respublikası Prezidenti Shavkat Mirziyoev Qaraqalpaqstan Respublikasına saparın Kegeyli rayonındaǵı “Aqtuba tekstil” kárxanasınan basladı. Aldın bul rayonda sanaat ulıwma joq edi. Ekonomikanı quramlıq ózgertiw boyınsha ámelge asırılıp atırǵan jumıslar, aymaqlararalıq birge islesiwdiń nátiyjeleri bul jerde sezilmekte. Sonnan, ándijanlı isbilermenler menen birgelikte úsh joybar iske túsirildi.

Olardan biri – “Aqtuba tekstil” jılına 3 million danadan artıq trikotaj islep shıǵarıw quwatlılıǵına iye. Bunıń ushın Germaniya, Yaponiya hám Túrkiyadan zamanagóy úskeneler alıp kelinip ornatılǵan hám 500 jumıs ornı jaratılǵan. Jılına 6 million dollarlıq ónimdi eksportqa shıǵarıw rejelestirilgen. Mámleketimiz basshısı kárxanadaǵı jumıs procesin kózden ótkerdi, jumısshı hayallar menen sáwbetlesti. Shetki aymaqlarda bunday jańa kárxanalar ashılıp atırǵanlıǵı, hayal-qızlar jumıs penen támiyinlenip atırǵanlıǵınıń áhmiyetin atap ótip, bunı dawam ettiriw boyınsha juwapkerlerge kórsetpeler berdi. Kárxananıń ózinde kásip-ónerge qayta tayarlaw oqıw orayı shólkemlestirilgen. Onda jaqın máhállelerdegi jumıssız puqaralar óner úyrenip, óz jolın tabadı.