«Ámelge asırıp atırǵan jumıslarımız kóp, xalqımızdıń ózi bul ózgerislerge ádil bahasın beredi» - Prezident

Sonǵı altı jılda Qaraqalpaqstanda 15 trillion sum investiciya esabına 5300 den aslam joybar ámelge asırıldı. Isbilermenler sanı 2 esege kóbeyip, 46 mıń turaqlı jumıs ornı jaratıldı. Aldın sanaatı eń tómen bolǵan 6 rayonda islep shıǵarıw 2-3 esege artıp, Qaraqalpaqstandaǵı úlesi 12 procentke jetti. Qaraózekte sanaat 5 esege, Ellikqala, Moynaq, Taxtakópirde 3 esege, Shomanay hám Nókis rayonında 2 esege artıp, bul rayonlarda islep shıǵarıw 2 trillion sumǵa jetti. «Ulıwma, sonǵı altı jılda Qaraqalpaqstanda sanaat 1,3 esege ósti, 61 túrdegi jańa ónimlerdi islep shıǵarıw jolǵa qoyıldı. Ásirese, ximiya, qurılıs materialları, azıq-awqat, tekstil hám toqımashılıq, farmacevtika sanaatı ónimlerin islep shıǵarıw 2 eseden artıq ósti. Mine, búgin de sizler menen birgelikte 1 mıń 100 jańa turaqlı jumıs ornına iye 6 kárxana iske túsiriledi», - dedi mámleket basshısı. Usı kárxanalar arqalı, Qaraqalpaqstanda islep shıǵarıwǵa 300 milliard sum, eksportqa 20 million dollar qosıladı. «Biraq, ekonomikanı rawajlandırıw hám xalıqtıń bántligin támiyinlew boyınsha ele imkaniyatlar kóp. Ótken jılı avgust ayında kelip, hámme wazıypalardı belgilep alǵan edik. Sonnan, Qaraqalpaqstanda isbilermenlikti rawajlandırıw hám sociallıq máselelerdi sheshiw boyınsha úlken qarar hám baǵdarlama qabıl etildi. Bular menen 2023-jıldıń ózinde 670 milliard sum hám 340 million dollar qarjılar ajıratıldı”, — dedi mámleket basshısı. Shavkat Mirziyoev isbilermenler ushın payda, aylanbadan salıq, jer hám mal-múlk salıqları 2 esege páseytilgeni, sonday-aq, sociallıq salıq 1 procent etip belgilengenin atap ótti. «Bul arqalı, Qaraqalpaqstannıń barlıq isbilermenlerinde (23 mıń) jılına 500 milliard sum qalıp atır. Tek ǵana usı aymaq isbilermenlerine kommercialıq kreditleriniń 75 procentine Isbilermenlik fondı kepilligi beriliwi belgilendi. Hár bir rayonǵa ministrler, wálayat hákimleri, mákeme hám bankler basshıları biriktirildi. Ámelge asırıp atırǵan jumıslarımız kóp hám bunı xalqımız kórip turıptı. Olardıń ózi bul ózgerislerge ádil bahasın beredi», — dep qosımsha etti Prezident.