Qaraqalpaqstandaǵı 452 máhálleniń hár birine 500 million sumnan qosımsha qarjı ajıratıladı

Mámleketimiz basshısı Qaraqalpaqstan máhállelerin abat etiw, suw, jol, elektr támiynatın jaqsılaw, mektep, baqsha hám medicina punktlerin qurıw hám ońlaw ushın 2023-jılda 1,5 trillion sum berilip atırganlıǵın atap ótti. Bunnan tısqarı, 452 máhálledegi sharayatı awır 21 mıń úy ońlanadı, 709 úy jańadan qurıp beriledi. Buǵan byudjetten 132 milliard sum, Tashkent qalası hám wálayatlardan 232 milliard sum ajıratılıp atır. Prezident Qaraqalpaqstan xalqı abadanlıǵın ele de arttırıwǵa qaratılgan 3 jańa baslamanı aytıp ótti. «Qaraqalpaqstandaǵı 452 máhálleniń hár birine tuwrıdan-tuwrı 500 million sumnan qosımsha qarjı ajıratıladı. Bunıń ushın óz aldına Qaraqalpaqstan máhállelerin qollap-quwatlaw fondı shólkemlestirilip, oǵan bıyılǵı jılda 250 milliard sum ajıratamız. Mashqalanı máhálleniń ózi kótersin, ózine pul bereyik, ózi qadaǵalasın. Sonda sapa hám mápdarlıq boladı. Adamlar razı boladı», — dedi Shavkat Mirziyoev. Prezident ózine aymaqlardan úy-jaylar kadastri máselesinde oǵada kóp múrájatlar bolıwın ayttı. «Qaraqalpaqstanda da 47 mıń úy-jay hám kóshpes múlklerdiń kadastri joq. Bul – adamlarımızdı ipoteka alıw, qıytaq jerinde diyqanshılıqqa kredit, subsidiya alıw, jasap atırǵan baspanasın perzentlerine miyras qaldırıw imkaniyatın sheklep atır. Kóp oylap, Qaraqalpaqstan xalqına usı máselede jeńillik jaratpaqshıman», — dedi mámleket basshısı. Prezident Joqarǵı Keńes Baslıǵına eki ayda 38 mıń adamnıń qolına kadastrin tolıq islep beriw boyınsha tapsırma berdi. Mámleket basshısı óz sózinde dawam eter eken, Qaraqalpaqstanda jılına 6,5-7 mıń úy-jayǵa talap bar ekenligin ayrıqsha atap ótti. «Sonlıqtan, 2023-jıl ótken jılǵa salıstırǵanda 2 esege kóp yaki 4 mıń úy-jay qurıladı. Buǵan qosımsha etip, tek ǵana Qaraqalpaqstan xalqı ushın jańa imkaniyat jaratamız. Yaǵnıy, zamanagóy joybar tiykarında 4 mıń jeke tártiptegi úy-jay qurıwǵa 4 sotixtan jer ajıratıladı. Infrastrukturanı da islep beremiz. Bunday imkaniyattı basqa aymaqlarımızǵa bermegenbiz», — dedi Prezident.