Tınıshlıq hám awızbirshilik qádiri ulıǵlandı

Berdaq atındaǵı Qaraqalpaq mámleketlik akademiyalıq muzıkalı teatrında milletler aralıq tatıwlıqqa arnalǵan mádeniy ilaj bolıp ótti. Onda Prezident Shavkat Mirziyoev qatnastı.

Derlik júz jıllıq tariyxqa iye usı dárgay kórkem óner rawajlanıwında, jaslar tárbiyası hám xalıqtıń mádeniy turmısında múnásip orınǵa iye. Aqırǵı jıllarda teatr kúndelikli ońlanıp, ásbap-úskeneler jańalandı. 2017-jılda oǵan akademiyalıq teatr dárejesi berildi. Mámleketimiz basshısı bul jerde nuranıylar, kórkem óner tarawı wákilleri menen birge mádeniy baǵdarlamanı tamashaladı.

  Qaraqalpaqstanda kóplegen millet wákilleri tınısh hám tatıw jasap kelmekte. Baǵdarlamada usı tárepi tásirsheń obrazlarda sáwlelendirildi. Xalıq dástanlarınan úzindiler, “Shaǵala”, “Dembermes”, “Nigarim” sıyaqlı qosıqlar hám namalar atqarıldı. Alisher Nawayı, Berdaq, Maqtumqulı hám Abay dóretiwshiliginen úlgiler oqıldı. Ózbekstan Qaharmanı Ibrayım Yusupov qálemine tiyisli «Tuwısqanlıq» qosıǵı hám «Ózbekstan» qosıǵında milletler aralıq tatıwlıq, awızbirshilik, tınıshlıq qádiri bayan etildi. Prezidentimiz bul jerde qaraqalpaqstanlı dóretiwshiler, mádeniyat tarawı wákilleri menen pikirlesti. Kórkem ádebiy baǵdarlamanı joqarı bahaladı.

  Ózbek hám qaraqalpaq eki tilli bir el. Ásirler dawamında birge jasap, dos, tuwısqan bolıp, bir xalıqqa aylanıp ketken. Olar búgin mámleketimiz tınıshlıǵı hám rawajlanıwı jolında birge. Bul tek ǵana saxnada emes, turmısımızda da óz sáwleleniwin tawıp atır. Mámleketimiz basshısı usı qádiriyatlardı uluǵlawshı shıǵarmalardı kóbirek qoyıw, gastrollarǵa shıǵıp, jaslardı teatrǵa qaytarıw, mádeniyatın bayıtıw áhmiyetliligin atap ótti.