Prezident Nókistegi texnoparkti kózden ótkerdi
1753
Prezident Shavkat Mirziyoev Nókis jaslar texnoparkin barıp kórdi.
Bul kompleks jaslardıń qábileti hám kónlikpelerin qáliplestiriw, jańa jumıs orınların jaratıwǵa qaratılǵan. Sonnan, kompyuter sawatlılıǵı, grafik dizayn, robototexnika, 3D modellestiriw, akseleraciya sıyaqlı 9 jóneliste jılına 1 mıń 500 jigit-qız bilim alıwı múmkin. Bunıń ushın zamanagóy texnika, laboratoriya hám ustaxana úskeneleri ornatılǵan. Búgingi kúnde oqıw kursları pitkeriwshileriniń ideyaları startap formasına keltirilip, “Bolajaq ilimpaz”, “Technoways”, “Start4 Region” sıyaqlı tańlawlarǵa 50 ge jaqın joybar tapsırılǵan. Sonday-aq, “Aral teńiziniń qurǵaqshılıqlı aymaqlarında tuqımgershilik plantaciyasın shólkemlestiriw” temasında ulıwmalıq bahası 955 million sumlıq joybar ámelge asırılmaqta. Bul teńizdiń qurıǵan túbindegi jerlerden paydalanıw, suwdı tejew hámde duzdı kemeytiwge xızmet etedi. Ulıwma alǵanda, usı texnopark jaslardıń umtılıs hám ideyaların jetistiriwine shekem járdem beredi.
Mámleketimiz basshısına jas fermer hám ilimpazlardıń qurǵatılǵan organikalıq pomidor, aqaba suwlardı tazalaw hám balıqlarǵa azıqlıq ósimlik joybarları haqqında maǵlıwmat berildi. Jasıl texnologiyalarǵa tiykarlanǵan bul joybarlar Evropa mámleketleriniń sertifikatlarına iye bolǵan. Prezidentimiz bul joybarlardı qarjılıq qollap-quwatlaw, ámeliyatqa keńirek engiziw kerekligin atap ótti.