Prezident Nókistegi Altın jaǵıs máhállesinde miymanda boldı

Prezident Shavkat Mirziyoev 30-mart kúni Nókis qalasındaǵı Altın jaǵıs máhállesinde bolıp, xalıqtıń turmıs sharayatı menen jaqınnan tanıstı. Bul jerde 4 mıńnan zıyat xalıq jasaydı. Máhállelerdegi mánzilli jumıslar Altın jaǵısta da óz nátiyjesin bermekte. Jaqın-jaqınǵa shekem bul mánzil transportlar barıwı qıyın, kommunikaciya tarmaqları jetispeytuǵın orın edi. Ótken jılı bul jer “Abat máhálle” baǵdarlamasına kirgizilip, keń kólemli qurılıs hám abadanlastırıw jumısları alıp barıldı. Jol, elektr energiyası, ishimlik suwı hámde gaz tarmaqları jańalandı.

Máhálle imaratı jańadan qurılıp, onıń átirapında balalar maydanshaları, medicina punkti, isbilermenlikke kómeklesiwshi oray, sawda shaqapshası shólkemlestirildi. Zamanagóy sport kompleksi qurıp pitkerilmekte. Bunday bir pútin kompleks xalıqqa qolaylıq jaratadı. Mámleketimiz basshısı máhálledegi ózgerislerdi kózden ótkerdi, xalıq penen pikirlesti. – Máhálleńiz abat bolǵanın, adamlar júzindegi razılıqtı kórip quwanıshlıman. Bunı hámme orında dawam ettiremiz. Qaraqalpaqstan máhállelerin abat etiw, suw, jol, elektr támiynatın jaqsılaw, mektep, baqsha hám medicina punktlerin qurıw hám ońlaw ushın usı jıl 1,5 trillion sum berip atırmız. Bunnan tısqarı, Qaraqalpaqstandaǵı 452 máhálleniń hár birine 500 million sumnan qosımsha qarjı ajıratıladı. Mashqalanı máhálleniń ózinde kótersin, ózine pul bereyik, ózi qadaǵalasın. Sonda sapa hám mápdarlıq boladı. Adamlar razı boladı, – dedi Prezident. Bul jerde de isbilermenlikti qollap-quwatlaw, jańa jumıs orınların jaratıwǵa itibar qaratılmaqta. Máhálleniń jeri ónimdar emes. Xalıq tiykarınan xızmet kórsetiw arqalı dáramat aladı. Máhállede turmıslıq xızmet shaqapshaları, tigiwshilik kárxanaları, nanbayxana, mebel islep shıǵarıw hám texnikalıq xızmet ustaxanaları bar. Aldaǵı waqıtta qoyanshılıq hám balıqshılıqtı rawajlandırıw rejestirilmekte. Máhálle menen tanısıw uzaq dawam etti. Mámleket basshısı jergilikli turǵın Quwanıshbay Seytnazarovtıń shańaraǵında iftarlik qıldı.

  Elimizdi Nawrız keypiyatı ele tárk etpegen. Prezidentimiz máhálle turǵınlarınıń súmelek seyilinde de qatnastı. Shavkat Mirziyoev usı jerde ǵalaba xabar quralları wákilleri menen de sáwbetlesti.