Kóshpeli qabıllawlar tiykarında puqaralardıń mashqalaları óz sheshimin tawıp atır
1913
Xojeli rayonında 1-aprel kúni azanǵı saat 10:00 de baslanǵan qabıllaw 2-aprel tańǵı saat 04:00 ge shekem, yaǵnıy 18 saat dawam etti. Búgingi kúnde mámleketimizde insan mápleri joqarı qádiriyat dárejesine kóterilgen bolıp, bunda barlıq ilajlar «Insan qádiri ushın», al, iygilikli ámeller bolsa «Insan mápleri hámme nárseden ústem»-degen princip tiykarında turmısta óz sáwleleniwin tawıp atır. Bunda puqaralardıń mashqalaların úyreniw hám saplastırıw, nızamlı máplerin támiyinlew jolında barlıq ilajlar kórilmekte. Húrmetli Prezidentimiz óz sózinde "Ámelge asırılıp atırǵan barlıq reformalarımız tórkininde insan qádirin uluǵlawǵa qaratılǵan iygilikli ideya jámlengen." dep atap ótken edi. Haqıyqatında da, búgingi kúnde puqaralardıń abadan turmısın támiyinlew, olarǵa múnásip sharayat jaratıw boyınsha oǵada kólemli jumıslar ámelge asırılmaqta. Orınlarda ótkerilip atırǵan kóshpeli qabıllawlar da mine usı "Insan qádiri ushın" principi tiykarında shólkemlestirilmekte. Usı jıldıń 1-aprel kúni Xojeli rayonında Joqarǵı Keńes Baslıǵı Amanbay Orınbaevtıń Ámiwdárya, Taqıyatas hám Xojeli rayonları puqaraları ushın gezektegi jeke qabıllawı bolıp ótti.
Ótkerilgen qabıllawda óziniń mashqalaları menen 450 den aslam puqara kelgen bolsa, sonnan 231 puqara 256 máselede Joqarǵı Keńes Baslıǵına múrájat etti hám olarǵa ornında sheshim tabıw ilajları kórildi. Puqaralar tárepinen tiykarınan sociallıq qollap-quwatlaw, medicinalıq járdemler kórsetiw, awıl xojalıǵı tarawı, bilimlendiriw, mektepke shekemgi tálim, bank kreditleri menen baylanıslı máseleler, jumıssız puqaralardıń bántligin támiyinlew, isbilermenlik jumısında ushırasıp atırǵan mashqalalar, máhállelerdegi jol, ishimlik suw, gaz máseleleri, turmıslıq, sociallıq mashqalalar boyınsha múrájatlar bildirildi.
Aytıp ótiw orınlı, qabıllawda puqaralar tárepinen bildirilgen múrájatlardıń basım kópshiligi yaǵnıy 61 payızı ornında unamlı sheshimin taptı, waqıt talap etiletuǵın múrájatlar Qaraqalpaqstan Respublikası Joqarǵı Keńesi Baslıǵınıń jeke qadaǵalawına alınıp, tez pursatta unamlı sheshiw boyınsha tiyisli taraw basshılarına tapsırmalar berildi. Sociallıq qollap-quwatlawǵa mútáj, baǵıwshısınan ayırılǵan hám mashqalası sebepli qıynalıp kelgen puqaralardıń máseleleri ornında sheship berildi, óz náwbetinde bul puqaralar mámleketimizde alıp barılıp atırǵan siyasattan, búgingi kúnde ámelge asırılıp atırǵan reformalar hám «Insan qádiri ushın» principi tiykarındaǵı iygilikli, sonıń menen birge ámeliy jumıslardan kewili tolıp, minnetdarshılıqların bildirmekte.
Húrmetli Prezidentimiz «Insan qádiri ullı. Ol erteń emes, uzaq keleshekte emes, áyne búgin óz ómirinen razı bolıp jasawı kerek»-dep atap ótken edi. Prezidentimizdiń baslaması hám basshılıǵında ámelge asırılıp atırǵan reformalardıń turmısta óz sáwlesin tabıwı hám puqaralarımızdıń búgingi turmısınan razı bolıp jasawın támiyinlew maqsetinde olardıń mashqalaların sheshiw boyınsha ilajlar dawam etpekte.
Qaraqalpaqstan Respublikası Joqarǵı Keńesiniń Málimleme xızmeti