“Aral teńizi basseyniniń ekologiyalıq tikleniwinde fotoelektr quyash energiyasın paydalanıw tájiriybesin qollanıw hám kѳrgizbeli túrde kѳrsetip beriw” joybarı start aldı
1369
Prezidentimiz Shavkat Mirziyoev usı jıl 29-mart kúni Qıtay Kommunistlik partiyasi Oraylıq komiteti siyasıy byurosı aǵzası, Sinczyan-Uyǵur avtonom rayonı (SUAR) Partkomı sekretarı Ma Sinjuy basshılıǵındaǵı QXR delegaciyasın qabıl etip, ushırasıwda Ѳzbekstan aymaqları hám SUAR ortasındaǵı ѳz-ara paydalı ámeliy sheriklikti jolǵa qoyıw máseleleri kѳrip shıǵılǵan edi. Onda Ѳzbekstan aymaqlarında Qıtaydıń jetekshi kompaniyaları qatnasıwında qayta tikleniwshi energetika, transport infrastrukturasın rawajlandırıw, sanaat parkleri hám awıl xojalıǵı klasterlerin shѳlkemlestiriw tarawlarında qospa joybarlardı ámelge asırıw boyınsha sóz etildi.
Ushırasıwda kelisip alınǵan birge islesiw máselelerin hám Prezidentimizdiń Araldıń qurıǵan ultanında innovaciyalıq usıllardı qollanǵan halda jasıl toǵayzarlıqlar hám jasıl qaplamalı jaylawlar jaratıw boyınsha qoyǵan wazıypaların ámelge asırıw maqsetinde, Ózbekstan Respublikası Prezidenti janındaǵı Aralboyı xalıqaralıq innovaciya orayı miráti menen Qıtay Ilimler Akademiyasına qaraslı Sinczyan ekologiya hám geografiya institutınıń bir topar ilimpazları Karaqalpaqstanǵa keldi.
Delegaciya menen ѳtkerilgen ushırasıwda Qaraqalpaqstan Respublikası Joqarǵı Keńesi Baslıǵınıń orınbasarı R.Saparbaev qatnastı hám tárepler ortasındaǵı birge islesiwlerdi bekkemlew máseleleri keńnen talqılandı.
Onda innovaciyalıq iskerlik, ámelge asırılıp atırǵan ilimiy-ámeliy innovaciyalıq joybarlar, Aralboyı aymaǵındaǵı ekologiyalıq mashqalalar hám olardıń sheshimin tabıw ilajları haqqında keń túrde túsinik berildi.
Ѳz náwbetinde, Qıtay ilimpazları tárepinen Aral teńiziniń ekologiyalıq basqarıwında fotovoltaik texnologiyanı tajiriybe hám kѳrgizbeli túrde kѳrsetip beriwge dıqqat qaratqan halda Qıtaydıń jetik innovaciyalıq texnologiyaların qorshaǵan ortalıqtı basqarıwǵa integraciyalaw, sanaat konvergenciyası hám texnologiya integraciyası arqalı Aral teńiziniń ekologiyalıq mashqalaların sheshiw boyınsha eksperimentler hám kѳrgizbeler ѳtkiziwge qaratılǵan jańa innovaciyalıq joybardıń prezentaciyası ѳtkerildi.
Ushırasıw sheńberinde bahası 500 mıń AQSh dolların quraytuǵın “Aral teńizi basseyniniń ekologiyalıq tikleniwinde fotoelektr quyash energiyasın paydalanıw tájiriybesin qollanıw hám kѳrgizbeli túrde kѳrsetip beriw” innovaciyalıq joybarın birgelikte ámelge asırıw haqqında Ózbekstan Respublikası Prezidenti janındaǵı Aralboyı xalıqaralıq innovaciya orayı menen Sinczyan ekologiya hám geografiya institutı arasında kelisimge qol qoyıw máresimi bolıp ѳtti hám joybarǵa start berildi.
Joybardı tiyisli xalıqaralıq hám jergilikli shѳlkemler menen birgelikte 2023-2025-jıllarda ámelge asırıw kѳzde tutılǵan.
Onıń áhmiyetli tárepi sonnan ibarat, bul joybar keleshekte Aralboyı aymaǵındaǵı awıllıq punktlerinde kúshli shorlanǵan jerlerde «fotoelektrik + ekologiyalıq» sanaattı rawajlandırıw tájiriybesin tarqatıwǵa, kishi ѳlshemdegi fotoelektr stanciyaları menen energiya saqlawshı qurılmalar ornatıw, quyash panelleri astında galofit hám shѳlge-shorǵa shıdamlı ѳsimliklerdi ѳsiriw arqalı jasıl rawajlanıwǵa hám bular arqalı xalıqtıń turmıs dárejesin jaqsılawǵa xızmet etedi.
Ilájdan soń qıtaylı delegaciya Nѳkis rayonındaǵı "KPC NUKUS HERBAL TECHNOLOGY" Ѳzbekstan-Qıtay qospa kárxanasında bolıp, boyan tamırı hám ekstraktın Qıtay mámleketine eksport etiw boyınsha alıp barılıp atırǵan jumıslar hám jılına 300 tonna balıq jetistiriw quwatlılıǵına iye «Nukus agrofish klaster» JShJ jumısları kózden ótkerildi.
Delegaciya sonday-aq, Akademik Maxmud Mirzaev atındaǵı baǵshılıq, júzimshilik, vinoshılıq ilimiy-izertlew institutınıń Kegeyli rayonındaǵı stanciyası intensiv baǵın barıp kѳrdi.
Bolıp ѳtken ushırasıwlardan soń miymanlar menen tarawlarǵa innovaciyalıq usıllar menen kѳnlikpelerdi keńirek eńgiziw boyınsha pikir hám usınıslar bѳlisildi.
Qaraqalpaqstan Respublikası Joqarǵı Keńesiniń Málimleme xızmeti