Búgin Qaraqalpaqstan Respublikasına 40 tan aslam sırt mámleketleriniń wákilleri keldi. Delegaciya qatarında 40 tan aslam mámleket elshileri, Birlesken Milletler Shólkemi, Birlesken Milletler Shólkemi rawajlanıw baǵdarlaması, YuNESKO, YuNISEF, Xalıqaralıq qızıl atanaq kómiteti, Jáhán densawlıqtı saqlaw shólkemi, Evropa qáwipsizlik hám birge islesiw shólkemi wákilleri respublikamız aymaǵına kelgen bolıp, miymanlardı dáslep Moynaq aeroportında Qaraqalpaqstan Respublikası Joqarǵı Keńesiniń Baslıǵı Amanbay Orınbaev saltanatlı túrde kútip aldı. Onda Ózbekstan Respublikası Prezidentiniń keńesgóyi T.Xudaybergenov, Ózbekstan Respublikası Sırtqı isler ministri B.Saidov qatnastı.

Bunnan keyin delegaciya aǵzaları Aral teńizi tariyxı muzeyi hám ashıq aspan astındaǵı kemeler kompleksin barıp kórdi. Bul jerde miymanlar bir waqıtları Ózbekstannıń balıqshılıq sanaatına qánigelesken birden-bir port qalası esaplanǵan Moynaqtıń balıqshılıq óndirisi, Aral teńizi menen baylanıslı estelikler, puqaralardıń jasaw tárizin sáwlelendiriwshi kartinalar hám basqa da tariyxıy eksponatlar menen jaqınnan tanıstı.

Bunnan soń Aral teńiziniń qurıǵan ultanında jasıl aymaqlardı payda etiw boyınsha ámelge asırılıp atırǵan jumıslar, sonıń qatarında seksewil hám basqa da shólge shıdamlı ósimlikler nállerin hám tuqımların egiw procesi kózden ótkerildi. Atap ótiw orınlı, Húrmetli Prezidentimizdiń 2018-jıl 15-16-noyabr kúnleri Qaraqalpaqstan Respublikasına bolǵan saparında Aral teńiziniń qurıǵan maydanlarında «Jasıl qaplamalar» – qorǵaw toǵayzarlıqların payda etiw, aymaqtaǵı ekologiyalıq jaǵdaydı jaqsılaw, zıyanlı duz hám shańlardıń Aral teńiziniń ultanınan kóteriliwiniń aldın alıw maqsetinde bir qatar tapsırmalar belgilep berilgen bolıp, usı tiykarda ámeliy jumıslar dawam etpekte. Bul ámeliy jumıslardıń nátiyjesinde 2018-2022-jıllar dawamında jámi 1 mln. 624 mıń gektar maydanlarǵa shól ósimlikleri egildi.

Bunnan soń miymanlar menen birgelikte Aral teńiziniń qurıǵan ultanınan 70 km qashıqlıqta jaylasqan maydanlarda payda etilgen jasıl toǵayzarlıqlar, seksewillikler kórip shıǵıldı. Sonday-aq, húrmetli Prezidentimiz basshılıǵında Aral teńiziniń qurıǵan maydanlarında jasıl qaplamalardı payda etiw boyınsha ámelge asırılıp atırǵan jumıslar boyınsha keń túrde maǵlıwmat berildi.

Aral teńizi maydanlarına sapar dawamında Aral boyı aymaǵında ámelge asırılıp atırǵan jumıslar boyınsha prezentaciyalar jıynalǵanlar názerine usınıldı. Onda Joqarǵı Keńes Baslıǵı shıǵıp sóylep, Prezidentimiz basshılıǵındaǵı Aral apatshılıǵı aqıbetlerin jumsartıw boyınsha ámeliy jumıslar haqqında keń túrde maǵlıwmat berdi. Sonday-aq, ótkerilgen ilajda xalıqaralıq shólkemler wákilleri Aralboyı aymaǵında ekologiyalıq jaǵdaydı jaqsılaw, zıyanlı duz hám shańlardıń kóteriliwiniń aldın alıw, xalıqtı sociallıq qollap-quwatlaw baǵdarında prezentaciyaları menen bólisti.