Nókis qalasında xalıqaralıq shólkemler wákilleri hám elshilerinen ibarat delegaciyanıń respublikamızǵa saparı dawam etti
1208
Qaraqalpaqstan Respublikasına 40 tan aslam mámleket elshileri, Birlesken Milletler Shólkemi, Birlesken Milletler Shólkemi rawajlanıw baǵdarlaması, YuNESKO, YuNISEF, Xalıqaralıq qızıl atanaq kómiteti, Jáhán densawlıqtı saqlaw shólkemi, Evropa qáwipsizlik hám birge islesiw shólkemi wákilleri kelgen bolıp, búgin miymanlar Nókis qalasındaǵı «Altın jaǵıs» mákan puqaralar jıyınına bardı.
Delegaciya aǵzaları aymaqta «Súmelek seyili»nde qatnasıp, máhálledegi jergilikli shańaraqta miymanda boldı. Sonday-aq, milliy ónermentshilik úlgilerin kózden ótkerdi hám Prezidentimiz basshılıǵında aymaq turǵınlarınıń turmıs abadanlıǵın támiyinlew baǵdarında máhállede alıp barılǵan keń kólemli qurılıs-ońlaw hám abadanlastırıw jumısları, bul baǵdarda máhálle imaratında jaratılǵan sharayatlar menen jaqınnan tanıstı.
Bunnan soń Qaraqalpaqstan Respublikası densawlıqtı saqlaw ministri M.Qurbanov penen birgelikte Nókis qalalıq perinetal orayı qurılıs jumısları kózden ótkerildi.
Miymanlar Qaraqalpaqstan medicina institutı Klinikasında bolıp, bul jerde institut rektorı O.Ataniyazova tárepinen balalar salamatlıǵın bekkemlew, nuqsanı bar balalardıń operaciyaların ótkerip beriw hám basqa da bir qatar baǵdarlarda ámelge asırılıp atırǵan jumıslar boyınsha keń túrde maǵlıwmat berildi hám klinikada jaratılǵan sharayatlar birgelikte kórip shıǵıldı.
Nókis qalasında delegaciya aǵzaları I.V.Savickiy atındaǵı Qaraqalpaq mámleketlik kórkem óner muzeyine bardı hám «Sahra luvr»ın tamashaladı.
Sapar juwmaǵında saltanatlı sarayda túslik awqat shólkemlestirilip, milliy taǵamlarımızdan ibarat dastúrxan jayıldı.
Óz náwbetinde Joqarǵı Keńes Baslıǵı Amanbay Orınbaev delegaciya aǵzalarına jaqsı tilekler tilep, olardı respublikamız aymaǵında jáne bir márte kóriwden quwanıshlı bolatuǵınlıǵın bildirdi hám birge islesiwge barqulla tayar ekenligin atap ótti.
Usınıń menen xalıqaralıq shólkemler wákilleri hám elshilerinen ibarat delegaciyanıń respublikamızǵa saparı juwmaqlandı.
Qaraqalpaqstan Respublikası Joqarǵı Keńesiniń Málimleme xızmeti