Qaraqalpaqstan Respublikası Konstituciyasınıń qabıl etilgenliginiń 30 jıllıǵı múnásibeti menen Qaraqalpaq mámleketlik universitetinde saltanatlı ilaj ótkerildi
963
Berdaq atındaǵı Qaraqalpaq mámleketlik universitetinde Qaraqalpaqstan Respublikası Konstituciyasınıń qabıl etilgenliginiń 30 jıllıǵı múnásibeti menen ilaj bolıp ótti. Onda Qaraqalpaqstan Respublikası Joqarǵı Keńesiniń Nızamshılıq, sud-huqıq hám korrupciyaǵa qarsı gúresiw komiteti baslıǵı Z.Reymova, Qaraqalpaqstan Respublikası sudı baslıǵı K.Tarixov, Qaraqalpaqstan Respublikası prokurorınıń aǵa járdemshisi D.Elmuratov hám universitettiń professor-oqıtıwshıları, student-jaslar qatnastı.
Ótkerilgen ilaj Ózbekstan hám Qaraqalpaqstan Respublikalarınıń mámleketlik gimnleri menen baslandı.
Onda Qaraqalpaqstan Respublikası Joqarǵı Keńesiniń Nızamlılıq, sud-huqıq hám korrupciyaǵa qarsı gúresiw máseleleri komiteti baslıǵı Z.Reymova shıǵıp sóylep, jıynalǵanlardı sáne múnásibeti menen qızǵın qutlıqladı. Sonıń menen birge, xalqımızdıń turmıs abadanlıǵın arttırıw, olardıń nızamlı máplerin, xuqıq hám erkinliklerin támiyinlewde – Konstituciyanıń ornı hám áhmiyeti joqarı ekenligin atap ótti.
Konstituciya mámlekettiń tiykarǵı nızamı bolıp, hár bir insannıń nızamlı mápleri usı hújjette óz sáwleleniwin tabadı. Búgin elimizde júz berip atırǵan jańalanıwlar, demokratiyalıq huqıqıy mámleket tiykarların bekkemlew, ádil puqaralıq jámiyetin qáliplestiriw jolında erisip atırǵan jetiskenliklerimizdiń barlıǵı Konstituciyada kórsetilgen tiykarǵı principlerdiń turmısqa tolıq engiziliwi menen baylanıslı.
Ótkerilgen ilajda konstituciyamızdıń turmısımızda tutqan ornı, onıń áhmiyeti, puqaralarımızdıń huqıq hám erkinliklerin támiyinlewdiń tiykarı ekenligi atap ótildi.
Qaraqalpaqstan Respublikası Joqarǵı Keńesiniń Málimleme xızmeti