Oqıwshı jaslardıń áskeriy tayarlıǵı hám Watanǵa súyispenshilik sezimleri artpaqta

Húrmetli Prezidentimizdiń basshılıǵında 2020-jıl 20-noyabr kúni ótkerilgen májiliste 11-klass oqıwshılarınıń Shaqırıqqa shekemgi baslanǵısh tayarlıq páninen alǵan teoriyalıq bilimlerin bekkemlew maqsetinde ámeliyat, yaǵnıy oq atıw boyınsha oqıw-shınıǵıwların ótkeriw belgilengen edi. Usı belgilengen wazıypalardıń orınlanıwın támiyinlew maqsetinde Ózbekstan Respublikası Qorǵanıw ministrligi menen Xalıq bilimlendiriw ministrliginiń qospa qararı qabıl etilip, usı qarar tiykarında bıyılǵı jılda Qaraqalpaqstan Respublikası boyınsha 11-klasstıń jámi 8 mıń 700 oqıwshısı arasında oq atıw boyınsha oqıw-shınıǵıwların ótkeriw, sonday-aq, jámlespegen jaslar menen mádeniy hámde psixologiyalıq ilajlar shólkemlestiriw belgilep alınǵan. Búgin Qaraqalpaqstan Respublikası Joqarǵı Keńesiniń Baslıǵı Amanbay Orınbaev Arqa-Batıs áskeriy okruginiń jawıngerlik poligonına barıp, 11-klass oqıwshılarınıń áskeriy oqıw-shınıǵıwları menen jaqınnan tanıstı.

  Dáslep, Joqarǵı Keńes Baslıǵı shıǵıp sóylep, sońǵı jılları Húrmetli Prezidentimiz – Qurallı Kúshlerimizdiń Joqarı Bas sárkardası tárepinen elimizdiń qorǵanıw potencialın kúsheytiw, qurallı kúshlerimizdiń materiallıq-texnikalıq bazasın bekkemlew, áskeriy xızmetkerlerdiń jawıngerlik tayarlıǵın arttırıw, olarǵa hám shańaraq aǵzalarına barlıq qolaylı sharayatlar jaratıw, jaslardı Watansúyiwshilik ruwxında tárbiyalaw máselelerine úlken itibar qaratılıp atırǵanlıǵın atap ótti. Sonday-aq, oqıw-shınıǵıwlarında bilim-kónlikpelerin arttırıp atırǵan jaslarǵa tabıslar tiledi. Aytıp ótiw orınlı, bul oqıw-shınıǵıwları 27-martta, yaǵnıy Ózbekstanda birinshi bolıp Arqa-Batıs áskeriy okruginde baslandı. Sonnan hár kúni 450 bala, búgingi kúnge deyin jámi 5188 bala bul áhmiyetli ilajda qatnasıw baxtına miyasar bolǵan bolsa, qalǵan 3512 balanı 17-aprelge deyin tolıǵı menen qatnastırıw rejelestirilgen.

  Oqıw-shınıǵıwları barısında jaslarımız áskeriy texnikalar menen jaqınnan tanısıp, oq atar qurallarınan paydalanıw kónlikpelerin ózlestirmekte. Sonıń menen birge, oqıw-shınıǵıwları barısında oqıwshılardıń áskeriy bilimlerin bekkemlew boyınshada bir qatar kórgizbeli shınıǵıwlar shólkemlestirilgen. Jaslar menen ushırasıw dawamında olardıń áskeriy tayarlıǵı hám jawıngerlik shınıǵıwlardı orınlaw qábileti kózden ótkerildi.

  Ilaj dawamında oqıwshı-jaslar ushın áskeriy texnikalar hám qurallardan ibarat kórgizbe usınıldı. Aytıp ótiw kerek, hár bir er azamat ushın áskeriy forma kiyip, ózin Watan qorǵawshısı sıpatında seziniw – bul úlken baxıt sanaladı. Sonlıqtan, jaslardı milliy Watansúyiwshilik ruwxında tárbiyalaw, olardıń áskeriy kónlikpelerin bekkemlew boyınsha ótkerilip atırǵan ilajlar bunnan-bılayda dawam ettiriledi.  

Qaraqalpaqstan Respublikası Joqarǵı Keńesiniń Málimleme xızmeti