Joqarǵı Keńes Baslıǵı Taqıyatas rayonınıń kóshe biyleri menen jaqınnan pikirlesti

Ázelden xalqımız arasında kópshilikke sózi ótetuǵın, xalıqtı ózine qaratıp, mashqalalarına sheshim tabıwda belsendilik kórsetetuǵın kátquda insanlardıń ornı úlken bolǵan. Bunday insanlar kóshe biyi dep atalıp, olardıń atqaratuǵın xızmeti salmaqlı bolıp kelgen. Búgin Qaraqalpaqstan Respublikası Joqarǵı Keńesiniń Baslıǵı Amanbay Orınbaev ekinshi márte Taqıyatas rayonındaǵı kóshe biyleri menen ushırastı. Atap ótiw kerek, ótken 2022-jılı da Joqarǵı Keńes Baslıǵı kóshe biyleri, rayon belsendileri menen ushırasqan edi. Búgingi ótkerilgen ushırasıw da ashıq-aydın sóylesiw usılında bolıp, kóshe biyleri menen jaqınnan pikirlesildi. Dáslep Joqarǵı Keńes Baslıǵı shıǵıp sóylep, sonǵı jılları húrmetli Prezidentimiz basshılıǵında elimizde ámelge asırılıp atırǵan reformalar, keń kólemli qurılıs-ońlaw hám abadanlastırıw jumısları haqqında keń túrde atap ótti.

  Jaqında húrmetli Prezidentimizdiń Qaraqalpaqstanǵa bolǵan saparında ayrıqsha respublikamız xalqı turmısın jaqsılaw baǵdarında bir qatar áhmiyetli baslamalardı kótergen edi. Usı baslamalar qatarında, Qaraqalpaqstan máhállelerin abat etiw, suw, jol, elektr támiynatın jaqsılaw, mektep, baqsha hám medicina punktlerin qurıw hám ońlaw ushın 452 máhálleniń hár birine tikkeley 500 million sumnan qosımsha qarjı ajıratılatuǵınlıǵı, onıń ushın óz aldına Qaraqalpaqstan máhállelerin qollap-quwatlaw qorı shólkemlestirilip, oǵan usı jılı 250 milliard sum baǵdarlanatuǵınlıǵın atap ótken edi. Álbette, bul jańalıq máhállelerdegi birinshi dárejeli mashqalalardı sheshiw ushın jańasha mexanizm boldı desek aljaspaǵan bolamız. Sebebi, endigiden bılay mashqala máhálleniń ózinde kóterilip, máhálle aqsaqalları, belsendiler, kóshe biyleri hám puqaralardıń qálewi menen sol máhálleniń ózinde sheshim tabıw imkaniyatına iye boldı. Bunnan tısqarı, kadastrı joq 38 mıń turaq jay boyınsha tiyisli hújjetler islep beriliwi, xalıqtıń talabın inabatqa alıp, usı jılı 4 mıń turaq jay qurılıwı, oǵan qosımsha zamanagóy joybar tiykarında 4 mıń jeke tártiptegi turaq jay qurıwǵa 4 sotixdan jer ajıratılıwı belgilep berildi. Ótkerilgen ushırasıwda usı sıyaqlı xalıqtıń abadan turmısın támiyinlew baǵdarındaǵı turmısqa engizilip atırǵan jańalıqlar, túpkilikli reformalar keń túrde sóz etildi.

  Óz náwbetinde kóshe biyleri bul baǵdardaǵı jumıslardı ámelge asırıwda belsendilik kórsetetuǵınlıǵın atap ótip, búgingi kúndegi ózgeris hám jańalanıwlar hár bir máhállege kirip barıp atırǵanlıǵı ushın Prezidentimizge, respublika basshılarına minnetdarshılıǵın bildirdi. Haqıyqatında da, ázelden “Doslıq qalası” sıpatında belgili bolǵan Taqıyatas rayonında túrli millet hám elat wákilleri tınıshlıqta, awızbirshilikli túrde tatıw turmıs keshirip kelmekte. Búgingi jetiskenlikler menen bir qatarda, máhállelerde ayırım sheshimin tabıwın kútip turǵan mashqalalar da barshılıq. Joqarǵı Keńes Baslıǵı menen ótkerilgen ushırasıwda kóshe biyleri bul máselelerdi sheshiwde “bir jeńnen qol shıǵarıp” háreket etilse álbette, barlıq mashqalalar óz sheshimin tabatuǵınlıǵın ayrıqsha tilge aldı.

  Ótkerilgen ushırasıw dawamında kóshe biyleri tárepinen áhmiyetli máseleler hám usınıslar kóterilip, olardıń barlıǵı sheshimin tabıw boyınsha Joqarǵı Keńes Baslıǵınıń jeke qadaǵalawına alındı.  

Qaraqalpaqstan Respublikası Joqarǵı Keńesiniń Málimleme xızmeti