Nókis qalasındaǵı záwlim sarayda iftarlıq (awız ashıw) dasturxanı jayıldı

Búgingi kúnde respublikamızdıń barlıq aymaqlarında múbárek ramazan ayı múnásibeti menen máhállelerdegi kekse-nuranıylar, kem támiyinlengen shańaraq aǵzaları hám jas shańaraqlar ushın awızbirshilik hám shúkirshilik belgisi bolǵan iftarlıq (awız ashıw) dasturxanı jayılıp atır. Nókis qalasında búgin záwlim sarayda «Hawa jolları» hám «Qutlı qonıs» máhálleleriniń bir qatar nuranıyları, sonday-aq, kem támiyinlengen shańaraq aǵzaları ushın múbárek ramazan ayı múnásibeti menen iftarlıq (awız ashıw) dasturxanı jayıldı.

  Iftarlıq Quranı Káriym tiláwatı menen baslandı. Onda Qaraqalpaqstan Respublikası Joqarǵı Keńesiniń Baslıǵı Amanbay Orınbaev qatnasıp, jıynalǵanlardı múbárek ramazan ayı múnásibeti menen qutlıqladı. Iftarlıq dasturxanı átirapında búgingi tınısh, abadan turmısımızǵa shúkirshilik keltirilip, keńpeyil xalqımızdıń awızbirshiligi, tatıwlıǵı dawamlı bolsın degen jaqsı niyetler bildirildi.

Qaraqalpaqstan Respublikası Joqarǵı Keńesiniń Málimleme xızmeti