Qaraqalpaqstan Respublikası Konstituciyası qabıl etilgeniniń 30 jıllıǵı keń túrde belgilendi
2732
Usı jıldıń 9-aprel kúni Berdaq atındaǵı Qaraqalpaq mámleketlik akademiyalıq muzıkalı teatrında Qaraqalpaqstan Respublikası Konstituciyası qabıl etilgeniniń 30 jıllıǵına baǵıshlanǵan «Konstituciyamız – baxtımız tiykarı» atamasında saltanatlı bayram ilajı bolıp ótti.
Onda Joqarǵı Keńestiń deputatları, ministrlikler, mákeme hám kárxanalardıń, oqıw orınlarınıń, huqıq qorǵaw uyımlarınıń basshıları, student-jaslar, jámiyetlik shólkemlerdiń, ǵalaba xabar qurallarınıń wákilleri qatnastı.
Saltanatlı bayram ilajında dáslep Ózbekstan hám Qaraqalpaqstan Respublikalarınıń mámleketlik gimnleri jańladı.
Qaraqalpaqstan Respublikası Joqarǵı Keńesiniń Baslıǵı Amanbay Orınbaev jıynalǵanlardı Qaraqalpaqstan Respublikası Konstituciyası qabıl etilgeniniń 30 jıllıǵı múnásibeti menen qızǵın qutlıqladı.
Ilajda atap ótilgenindey, Konstituciyamız – bul milliy huqıq sistemasınıń tiykarın quraw menen birge, insanlardıń huqıq hám erkinligin belgilewde áhmiyetli hújjet bolıp tabıladı.
Elimizdiń ǵárezsiz rawajlanıw basqıshlarına názer taslar ekenbiz, álbette jámiyetlik-siyasiy turmısımızda júz berip atırǵan ózgerisler menen jańalanıwlar, sociallıq- ekonomikalıq tarawlarda erisilip atırǵan nátiyjeler – Tiykarǵı Nızamımız jaratıp bergen imkaniyatlardıń nátiyjesi sanaladı.
Usı orında sonı da atap ótiwimiz tiyis, elimizde húrmetli Prezidentimizdiń basshılıǵında uzaqtı gózlegen mámleketlik siyasat, islep shıǵılǵan nızamlar, Qaraqalpaqstan Respublikası boyınsha ayrıqsha qabıl etilgen qararlar, mámleketlik baǵdarlamalar turmısımızda úlken orın iyelep kelmekte. Búgingi kúnde respublikamızda usı qabıl etilgen qarar hám pármanlar, mámleketlik baǵdarlamalar tiykarında úlken qurılıs-ońlaw hám abadanlastırıw jumısları, salmaqlı dóretiwshilik baslamalar ámelge asırılmaqta.
Ótkerilgen ilajda sózge shıqqanlar jıynalǵanlardı bayram menen qutlıqlap, respublikamızdıń xalqına, sonıń ishinde, jaslarımızǵa ayrıqsha húrmet hám itibarı ushın Prezidentimizge sheksiz minnetdarshılıǵın bildirdi.
Ilaj kórkem óner sheberleri tárepinen tayarlanǵan koncert baǵdarlaması menen dawam etti.
Qaraqalpaqstan Respublikası Joqarǵı Keńesiniń Málimleme xızmeti