Insan qádiri uluǵlanǵan elde hár bir múrájat itibardan shette qalmaydı

Nókis qalasında 8-aprelde baslanǵan qabıllaw 2 kún yaǵnıy 9-aprel kúni de túngi saat 23:00 ge shekem dawam etti. Búgingi kúnde elimizde «Insan qádiri ushın» principi tiykarında puqaralardıń mashqalalarına sheshim tabıw, olardıń turmıs abadanlıǵın, eń baslısı, búgingi turmısınan razılıǵın támiyinlew baǵdarında barlıq ilajlar kórilmekte. Bunda barlıq ilajlar hám gózlengen maqsetler «Insan mápleri hámme nárseden ústem»-degen princip átirapında jamlengen.

Usı jıldıń 8-aprel kúni Nókis qalasındaǵı Sawda-sanaat palatası imaratında Nókis qalası puqaraları ushın Joqarǵı Keńes Baslıǵı Amanbay Orınbaevtıń gezektegi jeke qabıllawı bolıp ótti. Qabıllaw 9-aprelde Istiqlol balalar dem alıw baǵında túngi saat 23:00 ge shekem dawam etti.

Ótkerilgen eki kúnlik qabıllawda óziniń mashqalaları menen 650 puqara  Joqarǵı Keńes Baslıǵına múrájat etti hám olarǵa ornında sheshim tabıw ilajları kórildi.Ótkerilgen qabıllawda Ministrler Keńesiniń Baslıǵı F.Ermanovta qatnasıp, puqaralardıń múrájatların qabılladı. Puqaralar tárepinen tiykarınan medicinalıq járdemler kórsetiw, operaciya tólemlerin tólep beriw, sociallıq qollap-quwatlaw, bilimlendiriw, mektepke shekemgi tálim, bank kreditleri menen baylanıslı máseleler, jumıssız puqaralardıń bántligin támiyinlew, isbilermenlik jumısında ushırasıp atırǵan mashqalalar, máhállelerdegi jol, ishimlik suw, gaz máseleleri, turmıslıq, sociallıq mashqalalar, turaq-jayların ońlap beriw hám basqa da bir qatar máseleler boyınsha múrájatlar bildirildi.

Aytıp ótiw orınlı, qabıllawda puqaralar tárepinen bildirilgen múrájatlardıń basım kópshiligi yaǵnıy 580 múrájat ornında unamlı sheshimin taptı, waqıt talap etiletuǵın múrájatlar Qaraqalpaqstan Respublikası Joqarǵı Keńesi Baslıǵınıń jeke qadaǵalawına alınıp, tez pursatta unamlı sheshiw boyınsha tiyisli taraw basshılarına tapsırmalar berildi.

Húrmetli Prezidentimiz basshılıǵında búgin barlıq orınlarda xalqımızdıń múshkilin jeńilletiw, olardıń mashqalalarına sheshim tabıw, eń baslısı insan qádiri uluǵlanǵan elde hár bir insan qádirlenetuǵınlıǵın ámelde xalqımızǵa kórsetip beriw boyınsha barlıq zárúrli is-ilajlar hám iygilikli jumıslar dawam ettirilmekte. Usı iygilikli ideyalarǵa tiykarlanǵan kóshpeli qabıllawlar da orınlarda ótkeriliwi dawam etedi.

Qaraqalpaqstan Respublikası Joqarǵı Keńesiniń Málimleme xızmeti