Kóshe biyleri xalıqtıń eń isenimli wákilleri
1089
Qaraqalpaqstan Respublikası Joqarǵı Keńesiniń Baslıǵı Amanbay Orınbaev jaqında xalıq arasındaǵı bar bolǵan mashqalalarǵa sheshim tabıw, eń áhmiyetli máselelerdi anıqlap, belgilep alıw maqsetinde kóshe biyleri menen óz ushırasıwların baslaǵan edi. Búgin Joqarǵı Keńes Baslıǵı Tórtkúl rayonındaǵı kóshe biyleri menen ushırastı. Ótkerilgen ushırasıw ashıq-aydın sóylesiw usılında bolıp, kóshe biyleri menen jaqınnan sheshimin kútip turǵan áhmiyetli máseleler átirapında pikirlesildi.
Ushırasıwda Joqarǵı Keńes Baslıǵı shıǵıp sóylep, sonǵı jılları húrmetli Prezidentimiz basshılıǵında elimizde ámelge asırılıp atırǵan reformalar, keń kólemli qurılıs-ońlaw hám abadanlastırıw jumısları haqqında keń túrde atap ótti. Sonday-aq, húrmetli Prezidentimizdiń Qaraqalpaqstanǵa bolǵan saparında ayrıqsha respublikamız xalqı turmısın jaqsılaw baǵdarında kóterilgen bir qatar áhmiyetli baslamalar haqqında atap ótti. Sonnan, usı baslamalar qatarında, Qaraqalpaqstan máhállelerin abat etiw, suw, jol, elektr támiynatın jaqsılaw, mektep, baqsha hám medicina punktlerin qurıw hám ońlaw ushın 452 máhálleniń hár birine tikkeley 500 million sumnan qosımsha qarjı ajıratılatılǵanlıǵı, onıń ushın óz aldına Qaraqalpaqstan máhállelerin qollap-quwatlaw qorı shólkemlestirilip, oǵan usı jılı 250 milliard sum baǵdarlanatuǵınlıǵı aytıp ótildi. Endigiden bılay mashqala máhálleniń ózinde kóterilip, máhálle aqsaqalları, belsendiler, kóshe biyleri hám puqaralardıń qálewi menen sol máhálleniń ózinde sheshim tabıw imkaniyatına iye boladı. Máhálledegi bir qatar eń áhmiyetli máseleler óz sheshimin tabadı.
Bunnan tısqarı, kadastrı joq 47 mıń turaq jay hám kóshpes múlklerge tiyisli hújjetler islep beriliwi, xalıqtıń talabın inabatqa alıp, usı jılı 4 mıń turaq jay qurılıwı, oǵan qosımsha zamanagóy joybar tiykarında 4 mıń jeke tártiptegi turaq jay qurıwǵa 4 sotixdan jer ajıratılıwı belgilep berildi. Ótkerilgen ushırasıwda usı sıyaqlı xalıqtıń abadan turmısın támiyinlew baǵdarındaǵı turmısqa engizilip atırǵan jańalıqlar, túpkilikli reformalar keń túrde sóz etildi. Óz náwbetinde kóshe biyleri bul baǵdardaǵı jumıslardı ámelge asırıwda belsendilik kórsetetuǵınlıǵın atap ótip, búgingi kúndegi ózgeris hám jańalanıwlar hár bir máhállege kirip barıp atırǵanlıǵı ushın Prezidentimizge, respublika basshılarına minnetdarshılıǵın bildirdi. Tórtkúl rayonında búgingi kúnde bir qatar jetiskenlikler menen birge, máhállelerde ayırım sheshimin kútip turǵan mashqalalar da barshılıq. Joqarǵı Keńes Baslıǵı menen ótkerilgen ushırasıwda kóshe biyleri aymaqlarındaǵı áhmiyetli máselelerdi kóterdi.
Óz náwbetinde kóshe biyleri tárepinen kóterilgen máselelerge sheshim tabıw Joqarǵı Keńes Baslıǵınıń jeke qadaǵalawına alındı.
Qaraqalpaqstan Respublikası Joqarǵı Keńesiniń Málimleme xızmeti