Ǵalabalıq hám professional futboldı hár tárepleme rawajlandırıwdıń qosımsha ilajları haqqında

Ózbekstan Respublikası Prezidentiniń qararı

  Mámleketimizde futboldıń ǵalaba en jayıwın jáne de arttırıw, perspektivalı hám qábiletli futbolshılardı tańlaw hám professional dárejede tayarlawdıń jańa sistemasın jolǵa qoyıw, trener hám tóreshilerdi xalıqaralıq talaplar tiykarında tayarlaw hám sheberligin arttırıw, futbol infrastrukturasın jaqsılaw jáne ornatılǵan standartlarǵa sáykeslendiriw maqsetinde:

1. Tómendegiler futboldı jáne de ǵalaba en jaydırıw hám rawajlandırıwdıń qosımsha baǵdarları etip belgilensin.

Xalıqaralıq futbol associaciyaları federaciyası (FIFA)nıń xalıq, ásirese, jaslar arasında futboldı jáne ǵalaba en jaydırıwǵa qaratılǵan arnawlı baǵdarlamalar tiykarında hár jılı máhálle jasları arasında, sonıń ishinde, mektepke shekemgi bilimlendiriw shólkemlerinde «Ǵalabalıq futbol» (Grassroots) festival hám jarıslar, ulıwma orta bilim beriw mektepleriniń oqıwshıları arasında «Mekteplerde futbol», joqarı bilimlendiriw mákemeleri studentleri arasında «Studentler ligası» respublikalıq jarıslardı ótkeriw; jaslardıń futbolǵa qızıǵıwshılıǵın arttırıw, bul baǵdardaǵı úgit-násiyatlaw jumısların jáne de kúsheytiw, olardıń futbol menen shuǵıllanıwı ushın jeterli sharayatlardı jaratıw; hayal-qızlar arasında futboldı rawajlandırıw, bul baǵdarda uzaq jıllarǵa mólsherlengen perspektivalı reje hám baǵdarlamalardı islep shıǵıw hám ámelge asırıw; fizikalıq imkaniyatı sheklengen hám mayıplıǵı bolǵan shaxslardıń futbol menen shuǵıllanıwı ushın zárúr sharayatlardı jaratıw jáne olardıń arasında turaqlı jarıslar shólkemlestiriw; saylandı komandalar hám professional futbol klubları ushın sapalı sport rezervin jaratıw, qábiletli futbolshılardı anıqlaw, tańlaw hám saylap alıw (selekciya)dıń sanlastırılǵan sistemasın engiziw; futbol infrastrukturasın materiallıq-texnikalıq jaqtan jáne de jaqsılaw hám xalıqaralıq talaplarǵa sáykeslendiriw; futbol boyınsha maman trenerler, tóreshiler hám qánigelerdi tayarlaw, olardıń mamanlıǵın arttırıw hám qayta tayarlaw sistemasın jáne de jetilistiriw, oqıw-metodikalıq qollanbalar islep shıǵıw; aymaqlarda futbol klubların, balalar hám jas óspirimler, ǵalabalıq futboldı rawajlandırıw maqsetinde sırt elli qánigelerdi tartıw hám xalıqaralıq birge islesiwdi jáne de keńeytiw; ǵalaba xabar quralları hám sociallıq tarmaqlarda futboldı úgit-násiyatlaw jáne bul processte joqarı dárejeli málimleme hám multimedia ónimlerinen paydalanıwdı jáne de keńeytiw.

2. a) hár jılı Ózbekstan associaciyası qarjıları esabınan:

mart-iyun aylarında máhálle jasları hám qızları arasında «Ǵalabalıq futbol» baǵdarlaması sheńberinde futbol festivalları; 10-dekabr – Dúnya júzilik futbol kúni múnásibeti menen xalıqtıń arasında ǵalabalıq «fleshmob» ilajları; sentyabr-may aylarında ulıwma orta bilim beriw mekteplerinde «Mekteplerde futbol» baǵdarlaması sheńberinde futbol jarısları, sheberlik sabaqları hám festivallar ótkerip barılatuǵını; b) hár jılı sentyabr-may aylarında joqarı bilimlendiriw mákemelerinde Ózbekstan studentlar sportı associaciyası qarjıları esabınan qarjılandırılatuǵın «Studentler ligası» baǵdarlaması sheńberinde úsh basqıshlı respublikalıq futbol jarısları ótkeriletuǵını belgilep qoyılsın.

3. Ózbekstan futbol associaciyası (A.Azizov) Jaslar siyasatı hám sport ministrligi (A.Ikramov), Mektepke shekemgi hám mektep bilimlendiriwi ministrligi (H.Umarova) hám Joqarı bilimlendiriw, ilim hám innovaciyalar ministrligi (I.Abduraxmonov) menen birgelikte bir ay múddette:

«Ǵalabalıq futbol», «Mekteplerde futbol» hám «Studentler ligası» baǵdarlamaları sheńberinde futbol ilajların ótkeriwdiń birden-bir tártibin tastıyıqlasın; bul jarıslar hám turnirlerge puqta tayarlıq kóriw hám joqarı dárejede ótkeriw boyınsha ilajlar rejesin qabıl etsin; bul jarıslar hám turnirlerdi ótkeriw procesiniń jergilikli hám sırt el ǵalaba xabar quralları hám basqa da kommunikaciya dáreklerinde keńnen sáwlelendiriliwin támiyinlesin.

4. Joqarı bilimlendiriw, ilim hám innovaciyalar ministrligi (I.Abduraxmonov) Ózbekstan futbol associaciyası (A.Azizov) menen birgelikte eki ay múddette:

mámleketlik joqarı bilimlendiriw mákemelerinde olardıń materiallıq-texnikalıq bazasınan kelip shıǵıp, futbol boyınsha turaqlı jumıs alıp baratuǵın sekciyalardıń jumısın jolǵa qoysın; mámleketlik joqarı bilimlendiriw mákemelerindegi sport imaratları hám futbol maydanlarınıń turaqlı jumıs alıp barıwın támiyinlew ilajların kórsin; hár bir mámleketlik joqarı bilimlendiriw mákemesiniń futbol hám futzal boyınsha komandaların qáliplestirsin jáne olardıń «Studentler ligası» baǵdarlaması sheńberinde ótkeriletuǵın respublikalıq jarıslarda tolıq qatnasıwın támiyinlesin; joqarı bilimlendiriw mákemeleri reytingin anıqlawda usı bánt  talaplarınıń esapqa alınıwın názerde tutsın.

5. Tómendegiler:

futbol boyınsha aymaqlıq hám milliy saylandı komandalar hám professional futbol klubları ushın sapalı sport rezervin jaratıw maqsetinde Jaslar siyasatı hám sport ministrligi sistemasındaǵı futbol sheberlik mektepleri ámeldegi qarjılandırıw tártibin saqlap qalǵan halda Ózbekstan futbol associaciyası qaramaǵına ótkerilsin hám olar futbol akademiyaları sıpatında qayta dúzilsin; Qaraqalpaqstan Respublikası, wálayatlar hám Tashkent qalasında Ózbekstan futbol associaciyası janındaǵı futbol mektepleri (keyingi orınlarda – futbol mektepleri) shólkemlestirilsin; jaslar siyasatı hám sport ministrligi sistemasındaǵı ayırım sport mektepleri hám qánigelestirilgen sport mektepleriniń futbol maydanları futbol mektepleriniń balansına ótkerilsin; beyimlestirilgen imaratlarda jaylastırılǵan, tómen nátiyjeli futbol mekteplerinde optimallastırıw esabınan olardıń múlki, sport inventarları hám trener kadrları futbol mektepleriniń materiallıq-texnikalıq hám oqıw bazasın bekkemlewge qaratılsın.

6. futbol mektepleri sport baǵdarındaǵı mektepten tısqarı sport-bilimlendiriw mákemesi esaplanatuǵını;

futbol mektepleriniń direktorları, direktorlardıń sport isleri boyınsha orınbasarları, trenerleriniń miynetine haqı tólew, sonday-aq, olardıń miynetin xoshametlewge sport mektepleri xızmetkerlerine miynetke haqı tólew hám xoshametlewde belgilengen sharayatlar engiziletuǵını; futbol mektepleri medicina xızmetkerleriniń miynetine haqı tólew Ministrler Kabinetiniń 2005-jıl 21-dekabrdegi «Medicina xızmetkeri miynetine haqı tólewdiń jetilistirilgen sistemasın tastıyıqlaw haqqında»ǵı 276-sanlı qararına muwapıq ámelge asırılatuǵını, sonday-aq, olardı materiallıq xoshametlewde sport mektepleri ushın belgilengen materiallıq xoshametlew shártleri qollanılatuǵını; kelesi jıllarda futbol mektepleri professional futbol klublarına basqıshpa-basqısh biriktiriletuǵını belgilensin.

7. Tómendegiler:

a) futbol mektepleriniń tiykarǵı wazıypaları etip belgilensin: joqarı qábiletke iye bolǵan jas futbolshılardı tańlap alıw (selekciya) sistemasın jolǵa qoyıw, balalar hám jas óspirimlerdi futbol menen turaqlı shuǵıllanıwǵa tartıw; balalar hám jas óspirimler arasında olardıń densawlıǵın bekkemlewge, hár tárepleme fizikalıq jaqtan jetilisiwine hám salamat turmıs tárizine umtılısın qáliplestiriwge baǵdarlanǵan sport hám tárbiya jumısların alıp barıw; balalar hám jas óspirimlerde futbol menen shuǵıllanıw qábiletin erte anıqlaw jáne olarda futbolǵa bolǵan turaqlı qızıǵıwshılıǵın rawajlandırıw; futbol shınıǵıwların ótkeriw ushın maman trenerler quramın tańlaw, oqıw-tárbiya sistemasın shólkemlestiriwdiń eń jańa usılların qollanǵan halda sport rezervi hám joqarı sheber futbolshılar tayarlaw boyınsha oqıw-shınıǵıw procesin jolǵa qoyıw; barlıq jas kategoriyalar boyınsha futbol akademiyaları hám klublarına sheber sportshılardı jetkerip beriw; tájiriybe almasıw maqsetinde túrli futbol shólkemleri menen birge islesiwdi rawajlandırıw, futbolshılardıń sport sheberligin, sonday-aq, trenerler hám basqa da qánigelerdiń kásiplik mamanlıǵın arttırıw; b) futbol mekteplerin qarjılandırıw dárekleri etip belgilensin: Qaraqalpaqstan Respublikası byudjeti, wálayatlar hám Tashkent qalası jergilikli byudjetleriniń qarjıları; jumıs qánigeligi boyınsha tovarlardı (jumıslardı, xızmetlerdi) realizaciyalawdan hám mektep ustavındaǵı wazıypalarǵa muwapıq bolǵan basqa da jumıs túrlerinen alınǵan dáramatlar; tiykarǵı shınıǵıwlar ótkerilmeytuǵın waqıtta bos turǵan múlkti ijaraǵa beriwden túsken dáramatlar; yuridikalıq hám fizikalıq táreplerdiń qáwenderlik qayırqomlıqları; nızamshılıq hújjetlerinde qadaǵan etilmegen basqa da dárekler.

8. Ózbekstan futbol associaciyası (A.Azizov):

a) úsh ay múddette: futbol mektepleri hám futbol akademiyalarınıń ustavın tastıyıqlaw, sonday-aq, olardı belgilengen tártipte mámleketlik dizimnen ótkeriw; futbol mektepleri hám futbol akademiyaların zamanagóy pedagogikalıq texnologiyalardı iyelegen maman trenerler hám pedagog kadrlar menen basqıshpa-basqısh tolıqtırıw ilajların kórsin; b) Ózbekstan Milliy olimpiya komiteti menen birgelikte futbol mektepleri hám futbol akademiyalarında sportshılardı tayarlaw sapası boyınsha turaqlı qadaǵalawdı ámelge asırsın; v) Kámbaǵallıqtı qısqartıw hám bántlik ministrligi hám Ekonomika hám qarjı ministrligi menen birgelikte futbol mektepleri hám futbol akademiyalarınıń basqarıw, texnikalıq, xızmet kórsetiw hám oqıw-járdemshi xızmetkerlerdiń shtat kestesin islep shıqsın hám tastıyıqlasın; g) Mektepke shekemgi hám mektep bilimlendiriwi ministrligi menen birgelikte ulıwma orta bilim beriw mektepleriniń oqıwshıların futbol mektepleri hám futbol akademiyalarında shuǵıllanıw ushın tartıw ilajların kórsin.

9. Ózbekstan futbol associaciyası (A.Azizov) Jaslar siyasatı hám sport ministrligi (A.Ikramov) menen birgelikte úsh ay múddette Ministrler Kabinetiniń «Ózbekstan futbol associaciyası janındaǵı futbol akademiyaları hám futbol mektepleriniń basqarıw, texnikalıq, xızmet kórsetiwshi hám oqıw-járdemshi xızmetkerlerin qosımsha materiallıq xoshametlew ilajları haqqında»ǵı qarar joybarın Húkimetke kirgizsin.
10. Ózbekstan futbol associaciyası hám Jaslar siyasatı hám sport ministrliginiń 2023-jıl 1-iyulden baslap tómendegilerdi názerde tutatuǵın usınısları maqullansın:

mámleketlik emes futbol mektepleri hám futboldı rawajlandırıw tarawında jumıs alıp barıp atırǵan basqa da mámleketlik emes shólkemler (mámleketlik emes futbol mákemeleri) ushın Ózbekstan futbol associaciyasınıń aǵzası bolıw talabı ornatıladı; Ózbekstan futbol associaciyası tárepinen mámleketlik emes futbol mákemeleriniń reytingi júrgiziledi hám reyting nátiyjeleri keń jámiyetshilikke járiyalanıp barıladı.

11. Jaslar siyasatı hám sport ministrligi (A.Ikramov) hám Ózbekstan futbol associaciyası (A.Azizov) tómendegilerdi ámelge asırsın:

Xorvatiya, Yaponiya hám basqa da mámleketlerdiń tájiriybesin maman qánigelerdi tartqan halda ózbek futbolına engiziw. Onda, Ózbekstan futbol associaciyası hám aymaqlıq balalar-jas óspirimler futbol akademiyalarınıń «texnikalıq direktor» lawazımına sırt mámleketlerdiń tájiriybesin hám sistemasın engiziw boyınsha maman qánigelerdi tartıw; Xalıqaralıq futbol associaciyaları federaciyası (FIFA), Aziya futbol konfederaciyasınıń talaplarına muwapıq futbol ushırasıwlarında ádillik hám ashıq-aydınlıqtı támiyinlew maqsetinde VAR (Video Assistant Referee, video járdemshi tóreshi) sistemasınan paydalanıwdı jáne de keńeytiw; Ózbekstan futbol associaciyası janındaǵı Futbol boyınsha qánigelerdi tayarlaw orayında futbol boyınsha «futbol izertlewshisi», «futbol selekcioneri» (skaut), «futbol menedjeri», «futbol marketologi», «futbol shıpakeri», «futbol psixologi», «sport farmakologi», «sport dietologi» sıyaqlı qánigelerdi tayarlaw sistemasın jolǵa qoysın.

12. sport mektepleri hám qánigelestirilgen sport mektepleriniń futbol boyınsha trenerlerine basqıshpa-basqısh Aziya futbol konfederaciyasınıń trenerler bilimlendiriwi boyınsha talapları engiziletuǵını;

Ózbekstan futbol associaciyası sport mektepleri hám qánigelestirilgen sport mektepleriniń futbol toparlarınıń jumısın nátiyjeli shólkemlestiriw hám qábiletli futbolshılardı selekciyalaw arqalı olardı keyingi basqıshtaǵı futbol mektepleri hám akademiyalarına baǵdarlap barıw boyınsha turaqlı monitoring ornatsın.

13. «Ózmetkombinat» AJ (R.Pirmatov), «Almalıq KMK» AJ (A.Xursanov), «Nawayı KMK» AJ (Q.Sanaqulov) hám «Ózbekneftgaz» AJ (B.Sidiqov)lardıń futboldı rawajlandırıwǵa qáwenderlik qayırqomlıq járdemdi kórsetiw haqqındaǵı usınısına kelisim berilsin.

Ministrler Kabineti (A.N.Aripov): bir ay múddette futbol boyınsha Ózbekstan Superligası hám Proligasınıń professional futbol klubların qáwender shólkemlerge biriktirsin; Ózbekstan olimpiya saylandı komandasınıń 2024-jıl Parij qalası (Franciya) hám 2028-jıl Los-Andjeles qalası (AQSh)nda bolıp ótetuǵın jazǵı Olimpiada oyınlarında qatnasıwın támiyinlew maqsetinde Ózbekstan Milliy olimpiya komiteti janındaǵı «OLYMPIC Professional futbol klubı»n qosımsha finanslıq qollap-quwatlaw boyınsha zárúr ilajlardı belgilep barsın. Onda, Ózbekstan futbol associaciyası, onıń aymaqlıq bólimleri, Ózbekstan Professional futbol ligası hám professional futbol klublarınıń jumısın qarjılandırıwǵa yuridikalıq tárepler jaqtan qaratılatuǵın qáwenderlik hám qayırqomlıq járdem túrindegi qarjılar summası payda salıǵın esaplawda salıq salınatuǵın paydadan qaytarıp taslanadı.

14. Ózbekstan futbol associaciyası (A.Azizov) Jaslar siyasatı hám sport ministrligi (A.Ikramov), Ekonomika hám qarjı ministrligi (Sh.Kudbiev), Mámleketlik aktivlerdi basqarıw agentligi (A.Ortiqov) menen birgelikte úsh ay múddette Ózbekstan Superligası hám Proligasınıń professional futbol klublarına qáwenderlik hám qayırqomlıq kórsetken, sonday-aq, ǵalabalıq sawdalarǵa qoyılǵan futbol klubların satıp alǵan investorlardı mámleket tárepinen qollap-quwatlaw jáne olarǵa qosımsha jeńillikler jaratıw boyınsha usınıslardı kirgizsin.
15. 2026-jıl 1-aprelge shekem Ózbekstan futbol associaciyası, onıń aymaqlıq bólimleri, Ózbekstan Professional futbol ligası, Ózbekstan futbol tóreshiler orayı, professional futbol klubları hám akademiyaları belgilengen tártipte qáliplestiriletuǵın dizimge tiykarlanǵan futbol boyınsha sport obektleriniń materiallıq-texnikalıq bazasın bekkemlew ushın zárúr bolǵan, Ózbekstan Respublikasında islep shıǵarılmaytuǵın sport ásbap-úskeneleri hám texnologiyaları, inventarları, translyaciyalawǵa baylanıslı barlıq ásbap-úskeneler hám texnikalar, farmakologiya ónimleri, sport azıqlıq zatları, futbol (futzal) maydanları ushın jasalma shópler, shokpad, granulalar, arnawlı jelim hám arnawlı professional sport kiyimleri, arnawlı texnika hám transport quralların alıp kirgeni ushın bajıxana bajısın tólewden azat etilsin.
16. Ustav fondında mámleketlik úlesi 50 procenti hám onnan aslam bolǵan professional futbol klublarına sport ásbap-úskeneleri, inventarları, farmakologiya ónimleri, sport azıqlıq zatları, futbol (futzal) maydanları ushın jasalma shópler, shokpad, granulalar, arnawlı jelim, arnawlı professional sport kiyimlerin, burınǵısınan basqasha tárizde, tikkeley shártnama tiykarında satıp alıwǵa ruxsat berilsin.
17. Ózbekstan futbol associaciyası janında yuridikalıq tárep statusına iye bolmaǵan Ózbekstan futbolın qollap-quwatlaw qorı (keyingi orınlarda – Qor) dúzilsin.
18. Tómendegiler Qor qarjıların qáliplestiriwdiń dárekleri etip belgilensin:

Mámleketlik byudjetten ajıratılatuǵın qarjılar; «Ózmetkombinat» AJ, «Almalıq KMK» AJ, «Nawayı KMK» AJ hám «Ózbekneftgaz» AJlardıń qáwenderlik qayırqomlıqları; fizikalıq hám yuridikalıq táreplerdiń, sonıń ishinde, Ózbekstan Respublikası rezidenti emeslerdiń qáwenderlik qayırqomlıqları; Qordıń waqtınsha bos turǵan qarjıların kommerciyalıq banklerdiń depozitlerine jaylastırıwdan alınatuǵın dáramatlar; Xalıqaralıq finans shólkemleri hám sırt mámleketlerdiń grantları hám texnikalıq járdemlesiw qarjıları; nızamshılıq hújjetlerinde qadaǵan etilmegen basqa da dárekler.

19. Ekonomika hám qarjı ministrligi (Sh.Kudbiev) 2023-jıldan baslap hár jılı Qordı qollap-quwatlaw ushın Mámleketlik byudjetten 25 milliard sum qaratsın.
20. Qor qarjıları tómendegi maqsetlerge jumsalatuǵını:

ǵalabalıq hám professional futboldı rawajlandırıw, zamanagóy ásbap-úskeneler satıp alıw; futbol qánigelerin aldınǵı oqıtıw metodikaları hám innovaciyalarǵa úyretiw sistemasın jolǵa qoyıw qárejetlerin qaplaw, sonıń ishinde, sırt elden tartılǵan qánigelerdi xoshametlew; zamanagóy futbol texnologiyaların satıp alıw hám engiziw; futbol boyınsha jergilikli qánigelerdiń tájiriybesin sırt mámleketlerde arttırıwǵa baylanıslı qárejetlerdi qaplaw; ayrıqsha úlgi kórsetken saylandı komandalardı materiallıq xoshametlew, qábiletli jaslardı futbolǵa tartıw, jańa futbolshılar áwladınıń isenimli rezervin qáliplestiriw; Ózbekstan futbolshıları, trenerler hám tóreshiler quramınıń professional sheberligin arttırıwda sırt el futbol klubları hám federaciyaları menen birge islesiwdi rawajlandırıw; joqarı sheberliktegi futbolshılar hám sport rezervin tayarlawdıń nátiyjeli metodların islep shıǵıw boyınsha ilimiy-metodikalıq izertlewler ótkeriwde járdemlesiw.

21. Jaslar siyasatı hám sport ministrligi (A.Ikramov) Sanlı texnologiyalar ministrligi (Sh.Shermatov), Ekonomika hám qarjı ministrligi (Sh.Kudbiev), Ádillik ministrligi (A.Toshqulov), Ózbekstan futbol associaciyası (A.Azizov) menen birgelikte arnawlı jumısshı topardı dúzgen halda 2023-jıldıń aqırına shekem aldınǵı sırt el tájiriybesi tiykarında futboldı qarjılandırıw sistemasın keńeytiwde bukmekerlik jumısın ámelge asırıw boyınsha usınıslardı Ministrler Kabinetine kirgizsin.
22. Ózbekstan futbol associaciyası (A.Azizov) Jaslar siyasatı hám sport ministrligi (A.Ikramov) menen birgelikte 2023-jıldıń aqırına shekem:

respublika aymaqlarındaǵı barlıq túrdegi  mámleketlik hám mámleketlik emes bilimlendiriw mákemeleri, klublarında futbol menen shuǵıllanıp atırǵan, sonday-aq, rayon (qala)lıq, wálayatlıq hám respublikalıq sport hám ǵalabalıq denetárbiya ilajlarınıń kalendarlıq rejesine kirgizilgen jarıslarda qatnasatuǵın futbolshılar haqqındaǵı birden-bir maǵlıwmatlar bazasın qáliplestirsin hám onıń Xalıqaralıq futbol associaciyaları federaciyası (FIFA)nıń FIFA-CONNECT platformasına integraciyalanıwın támiyinlesin; orınlarda futbol menen shuǵıllanıp atırǵan, sonday-aq, jarıslarda qatnasatuǵın barlıq futbolshılar haqqındaǵı maǵlıwmatlardı tolıq sanlastırsın hám birden-bir maǵlıwmatlar bazasın jaratsın. Onda, birden-bir maǵlıwmatlar bazasın jaratıw, iske qosıw hám keyin ala texnikalıq qollap-quwatlaw Qor qarjıları esabınan ámelge asırıladı.

23. Sanlı texnologiyalar ministrligi (Sh.Shermatov) úsh ay múddette Ózbekstan futbol associaciyasınıń múrájatına tiykarlanıp futbol boyınsha Superliga, Proliga hám Ózbekstan kubogi jarıslarınıń ótkeriletuǵın stadionlardı Ózbekstan futbol tóreshileri orayı menen baylanıstıratuǵın optikalıq baylanıs liniyaları menen támiyinlesin.
24. Jaslar siyasatı hám sport ministrligi (A.Ikramov) Joqarı bilimlendiriw, ilim hám innovaciyalar ministrligi (I.Abduraxmonov), Ózbekstan futbol associaciyası (A.Azizov), Ózbekstan mámleketlik denetárbiya hám sport universiteti menen birgelikte:

a) 2023-2024-oqıw jılına shekem xalıqaralıq tájiriybe tiykarında Ózbekstanda futbolshılardı tayarlaw modelin islep shıqsın; b) 2023-jıldan baslap hár jılı: futbol tarawındaǵı xalıqaralıq shólkemlerdiń ilimpazları, qánigeleriniń qatnasıwında seminar-treningler, sonday-aq, ilimiy-ámeliy konferenciyalar ótkeriw ilajların kórsin; Ózbekstan mámleketlik denetárbiya hám sport universitetiniń futbol baǵdarı boyınsha studentleri pitkeriw aldı ámeliyatın aymaqlıq futbol akademiyaları hám professional futbol klublarında shólkemlestirsin; Milliy hám sırt el professional futbol klubları qánigelerin Ózbekstan mámleketlik denetárbiya hám sport universitetiniń futbol boyınsha sabaq-processlerine tartsın.

25. Tómendegiler:

Ózbekstan futbol associaciyası qaramaǵındaǵı sport-bilimlendiriw mákemeleri hám imaratların rekonstrukciyalaw hám kapital ońlawdıń mánzilli dizimi 1-qosımshaǵa muwapıq; Ózbekstan futbol associaciyası janındaǵı futbol mektepleriniń dizimi 2-qosımshaǵa muwapıq; Professional futbol klubları janındaǵı jumısı optmallastırılǵan futbol mektepleriniń dizimi 3-qosımshaǵa muwapıq tastıyıqlansın.

26. Tashkent wálayatı, Joqarı Shırshıq rayonında jaylasqan «Doslıq» stadionında Xalıqaralıq futbol associaciyaları federaciyası (FIFA) tárepinen 2022-2023-jıllarda 4 zamanagóy futbol maydanın qurıw ushın 4,2 million AQSh dolları muǵdarındaǵı qarjılar ajıratılǵanı maǵlıwmat ushın qabıl etilsin.

Jaslar siyasatı hám sport ministrligi, Qurılıs hám turaq jay kommunal xojalıǵı ministrligi, Ózbekstan futbol associaciyası hám Tashkent wálayatı, Joqarı Shırshıq rayonında jaylasqan «Doslıq» stadionı aymaǵında futbol boyınsha barlıq jas kategoriyasındaǵı saylandı komandalardıń shuǵıllanıwı ushın byudjet qarjıları esabınan qarjılandırılatuǵın Saylandı komandalar orayın qurıw haqqındaǵı usınısına kelisim berilsin. Onda, Saylandı komandalar orayında 280 orınǵa iye zamanagóy miymanxana, mini-futbol ushın jabıq sport maneji, ilimiy-izertlew, medicina hám reabilitaciya orayı, júziw basseyni, asxana imaratlarınıń qurılısı, sonday-aq, bul imaratlarda Respublikalıq balalar-jas óspirimler futbol akademiyası jaylastırılıwı esapqa alınsın.

27. Qurılıs hám turaq jay kommunal xojalıǵı ministrligi (B.Zakirov) usı qarar tiykarında qurılısı hám ońlanıwı názerde tutılǵan imaratlardıń joybar hújjetlerin islep shıǵıwda eń optimal arxitekturalıq hám texnikalıq sheshimler qollanıwın, olardı innovaciyalıq texnologiyalarǵa tiykarlanǵan, energiya únemleytuǵın hám tez qurılatuǵın jeńil konstrukciya hám materiallardan qurıw, ıqshamlıq hám ekologiyalıq qáwipsizlik talaplarına muwapıqlıq boyınsha joybarlaw-smeta hújjetlerin kompleksli ekspertizadan ótkeriwdi támiyinlesin hám qurılıs-montajlaw jumıslarınıń sapalı orınlanıwı ústinen turaqlı mámleketlik arxitektura-qurılıs qadaǵalawın ornatsın.

usı qarar tiykarında qurılısı hám ońlanıwı názerde tutılǵan imaratlardıń joybarlaw hújjetleri Jaslar siyasatı hám sport ministrligi hám Ózbekstan futbol associaciyası menen kelisiletuǵını belgilensin.

28. Ekonomika hám qarjı ministrligi (Sh.Kudbiev) 2023-2024-jıllarda Mámleketlik byudjet qarjıları esabınan usı qarardıń 1-qosımshası menen tastıyıqlanǵan Ózbekstan futbol associaciyası qaramaǵındaǵı sport-bilimlendiriw mákemeleri hám imaratların rekonstrukciyalaw hám kapital ońlawdıń mánzilli dizimine muwapıq qurılıs-ońlaw jumısların alıp barıw ushın zárúr qarjılar ajıratılıwın názerde tutsın.
29. Kámbaǵallıqtı qısqartıw hám bántlik ministrligi (B.Musaev) Jaslar siyasatı hám sport ministrligi hám Ózbekstan futbol associaciyasınıń talaplarına bola ornatılǵan tólemlerdi óndirmegen halda Ózbekstan Respublikasına sport túrleri boyınsha sırt elli trener, sportshı hám basqa da qánigelerdi tartıwǵa ruxsatnamalar, sonday-aq, bul sırt el puqaralarına Ózbekstan Respublikası aymaǵında jumıs islewin ámelge asırıw huqıqına tastıyıqlaw xatı beriliwi (sozılıwı)n belgilengen tártipte támiyinlesin.
30. Qaraqalpaqstan Respublikası Ministrler Keńesi Baslıǵı, wálayatlar hám Tashkent qalası hákimleri aymaqlıq futbol associaciyalarınıń basshıları etip belgilensin.

Qaraqalpaqstan Respublikası Ministrler Keńesi, wálayatlar hám Tashkent qalası hákimlikleri: aymaqlıq futbol associaciyaları, sonday-aq, futbol mektepleriniń infrastrukturası hám materiallıq-texnikalıq bazasın jáne de bekkemlew, olardı zamanagóy ásbap-úskeneler menen támiyinlew ilajların kórsin; túrli jas kategoriyasındaǵı aymaqlıq saylandı komandalardıń oqıw-shınıǵıw orayların Xalıqaralıq futbol associaciyaları federaciyası (FIFA) talaplarına muwapıq qurıw ushın Qaraqalpaqstan Respublikası byudjetiniń, wálayatlar hám Tashkent qalası jergilikli byudjetleriniń qosımsha qarjıları, fizikalıq hám yuridikalıq táreplerdiń qáwenderlik qayırqomlıqları hám nızamshılıq hújjetlerinde qadaǵan etilmegen basqa da dárekler esabınan qarjı ajıratılıwın támiyinlesin; hár bir rayon (qala)da keminde birewden erler, hayal-qızlar futbolı hám mini-futbol boyınsha futbol komandalarınıń dúziliwi jáne olardıń jarıslarda turaqlı qatnasıwın támiyinlesin.

31. Ózbekstan Milliy málimleme agentligi (A.Kwchimov), Ózbekstan Milliy teleradiokompaniyası (A.Xadjaev) Jaslar siyasatı hám sport ministrligi hám Ózbekstan futbol associaciyası menen birgelikte usı qarardıń mazmun-mánisi hám ámeliy áhmiyetin sáwlelendiriwge baylanıslı maqalalar, brifingler, tematikalıq telekórsetiwler shólkemlestirsin.
32. Jaslar siyasatı hám sport ministrligi mápdar shólkemler menen birgelikte úsh ay múddette nızamshılıq hújjetlerine usı qarardan kelip shıǵatuǵın ózgerisler hám qosımshalar haqqında Ministrler Kabinetine usınıslar kirgizsin.
33. Usı qarardıń orınlanıwın nátiyjeli shólkemlestiriwge juwapker hám jeke juwapker etip Jaslar siyasatı hám sport ministri A.I.Ikramov hám Ózbekstan futbol associaciyasınıń direktorı A.A.Azizov belgilensin.

Qarardıń orınlanıwın dodalap barıw, juwapker shólkemlerdiń jumısın muwapıqlastırıw hám qadaǵalaw Ózbekstan Respublikasınıń Bas ministri A.N.Aripovqa hám Ózbekstan Respublikası Prezidentiniń keńesgóyi O.Q.Abduraxmonovqa júklensin.  

Ózbekstan Respublikası Prezidenti       Sh.MIRZIYOEV