Joqarǵı Keńes Baslıǵı Jaslıq PPJ puqaraları ushın jeke qabıllawın ѳtkerdi
1489
Búgin Joqarǵı Keńes Baslıǵı tárepinen respublikamızdıń alıs, eń shetki aymaqlarınan esaplanǵan Qońırat rayonınıń Qaraqalpaqstan hám Jaslıq posyolka puqaralar jıyınları, Bostan awıllıq punkti puqaraları ushın jeke qabıllawın ѳtkeriw rejelestirilgen edi. Kúnniń ekinshi yarımında Joqarǵı Keńes Baslıǵı Jaslıq PPJ turǵınlarınıń múrájatların tıńlaw hám olarǵa sheshim tabıw maqsetinde aymaqta boldı.
Qabıllaw dawamında bir qatar máseleler, sonnan, kommunallıq xızmet kѳrsetiw, sociallıq qollap-quwatlaw, medicinalıq járdem beriw, bántligin támiyinlew, turaq jayların ońlaw, kontrakt pulların tѳlep beriw hám basqa da kúndelikli turmısında ushırasıp atırǵan mashqalalar boyınsha múrájatlar bildirildi. Óz náwbetinde, barlıq bildirilgen múrájatlar Joqarǵı Keńes Baslıǵınıń qadaǵalawına alınıp, basım kѳpshiligi ornında sheshimin taptı.Sonıda ayrıqsha atap ótiw orınlı"Jaslıq" posyolkasına da 450 mıń dollar muǵdarındaǵı Sociallıq oray qurılısı ushın joybar tastıyıqlandı. Sociallıq orayda puqaralar ushın sapalı medicinalıq xızmetler kórsetiw menen birge xalıqqa xızmet kórsetiw orınların shólkemlestiriw belgilengen. Máselen, tigiw cexı, oqıw orayı menen kásipke tayarlaw orayları usılar qatarınan. Joqarǵı Keńes Baslıǵı Amanbay Orınbaev óz sózinde “Hár bir múrájat artında bir insannıń huqıqı bar” dep atap ótken edi. Ótkerilgen qabıllaw arqalı bul sóz óz tastıyıǵın tawıp, olardıń huqıqları tiykarında múrájatlarınıń sheshimin tabıw boyınsha zárúrli ilajlar kórildi. Bunday iygilikli isler respublikamız boylap bunnan-bılayda dawam ettiriledi.
Qaraqalpaqstan Respublikası Joqarǵı Keńesiniń Málimleme xızmeti